2 Relles 17
17
E siriura dobin e Israele
1Kana nakhle desudui burs sar kana thodape te charoil o Ajaz ando Juda, o Oseas chavo katar o Ela thodape te charoil ando Israel. Ta charoisarda inia burs ande Samaria. 2O Oseas cherda o bilachipe angla e akha e Devleke, a na gachin sargo e charura kai sea ando Israel mai anglal letar.
3O Salmanasar charo katar e Asiria mardape e Oseasea ta cherda le po sluga, ta pe zor cherda le te pochinel leke love suako drom. 4Ta o Salmanasar llangla kai o Oseas mislila te mundarel le soke o Oseas bichalda llenen kai o So, o charo katar o Ejipto. Ta Oseas ni pochinela e love e charoke sar cherela le suako burs. Goleke o charo katar e Asiria phangla le ande rubie. 5Mapalal o Salmanasar dia pe sa e phuv ta mardape trin burs e foroia katar e Samaria. 6Ta kana nakhle inia burs sar kana thodape te charoil o Oseas, o charo katar e Asiria dobisarda e Samaria ta inllarda phangle e israelen ande Asiria ta thoda len ando Jalaj ande phuv katar o Jabor pasa o pai Gozan ta ande forura katar e medura.#Dt 4.27-28; 28.36.
7Soke e israelitura cherde o bilachipe angla o Del kai ikanda len katar o Ejipto ta braduisarda len katar o Faraon, soke blagosisarde avere delen, 8ta cherde prema e zakonura katar e forura kai o Del chudiaia angla e chave katar o Israel, ta i cherde prema e zakonura kai cherdea e charura e Israeleke.
9Ta i e israelitura cherde po chorial ezgode kai e Devleke ni saia drago, ta vazdie thana vazdine pe sa e forura, katar sea e torre kai thovenpe te dikhen llik kai e forura zidome, 10ta vazdie estatue ta slike katar e Asera pe suako burdo ta telal katar suako kas baro,#1 R 14.23. 11gia sar cherena le e llene kai o Del chudia katar e phuv, i von phabarde o taimano ta cherde ezgode bilache kai joliarde e Devle. 12Blagosisarde delen kana o Del phendaia lenge te na cheren le.#Ek 20.3-5; Dt 5.7-9.
13O Del dia po Israel ta i po Juda sa pe profetonenchar ta phenela lenge:
Irin tumen katar tumare bilache droma, guruven me zakonura ta me alava kai diem tumare puranen kai bichaldem len me slugenchar e profetonenchar. 14A von ni asunde ta ni kamle, ta zuriarde po soro gia sar cherde le lenge purane kai ni pachaie ando Del, 15ta ni kandie e Devleke alava ni o alav kai achiloia lenge puranenchar, ta cherde so cherena e forura kai sea truial lendar kai o Del phendaia lenge te na cheren sar cherde gola forura. 16Mukle o zakono e Devleko ta cherde katar o tuch dui guruva ta slike katar e Asera. Blagosisarde sa e cheraien katar o miloso ta e Baale.#1 R 12.28-29. 17Phabarde pe minonen ande iag, thodepe te cheren chirimate ta te apogodin, ta cherde o bilachipe angla e akha e Devleke, ta joliarde le.
18Goleke o Del jolailo but po Israel ta chudia len petar. Samo mukla e vicha katar o Juda. 19Ta i o Juda ni kandia e zakonura Devleke, soke cherde e ezgode kai cherena e israelitura. 20Goleke o Del chudia petar sa e chaven katar o Israel ta dia len ande va katar e kochkaria te na aven ios angla le. 21Fulada katar o Israel e vicha e Davideki. Ta e israelitura thode te charoil e Jeroboame chavo katar o Nabat kai fulada e Israele katar o Del, ta cherda len te cheren iek baro bilachipe. 22Gia e llene katar o Israel cherde e ezgode bilache kai cherela o Jeroboam, ta ni mukle gola bilache ezgode, 23lligo ni ikanda e Israele petar, gia sar phendaia le sa pe slugenchar e poraukura. Goleke phangle e israelen ta inllarde len ande Asiria llik akana.
Pale aven te zivin ande Samaria
24O charo katar e Asiria anda llenen katar e Babilonia, katar e Kuta, katar e Ava, katar o Jamat ta katar o Sefarvaim, ta thoda len te zivin ande Samaria po than katar e chave katar o Israel, ta zivisarde ande lenge forura. 25Ta gala llene kana thodepe te zivin kote ni blagosina e Devle, goleke o Del bichalda lionura te mundaren gole llenen. 26Ta llele te phenen e charoke katar e Asiria:
E llene kai tu inllardan te zivin ande forura katar e Samaria ni pinllaren o zakono katar o Del katar goia phuv, goleke o Del bichalel lionura maskar lende ta gola lionura mundaren len.
27Ondaka o charo katar e Asiria phenda gia:
Inllaren incha iek katar e popura kai anden phangle kotar, te zivil kote ta te sikavel o zakono sar morabi te blagosin e Devle katar goia phuv.
28Ondaka iek katar e popura kai andea phanglo katar e Samaria llelo te zivil ando Betel ta sikada e llenen sar te blagosin e Devle. 29A ande suako foro e llene cherde peke dela, ta thode len pe thana vazdine kai cherdea e samaritanura. 30E llene kai avilea katar e Babilonia cherde e Sukot benote, e llene katar e Kuta cherde e Nergale, ta e llene katar o Jamat cherde e Asimae. 31E llene katar e Ava cherde e Nibjaze ta e Tartake, ta e llene katar o Sefarvaim phabarena pe chaven kurbano e delenge o Adramelek ta o Anamelek. 32Ta blagosina e Devle, a thode katar po foro llenen te aven popura kai cherena kurbanura ande chera katar lenge dela pe thana bazdine. 33Gia blagosina e Devle ta ni mukle te blagosin lenge delen sar cherena le ande phuvia kotar katar andea len.
34Llik akana cheren isto gia sar cherena le omanglal, soke ni blagosin e Devle, ni guruven leko zakono ta ni cheren so phenda e chavenge katar o Jakob, kai thoda leko anav Israel.#Jen 32.28; 35.10. 35Kana o Del achilo po alav lenchar, phenda lenge:
Na blagosin avere delen, na radin lenge ta na den len kurbanura.#Ek 20.5; Dt 5.9. 36Blagosisaren e Devle kai ikanda tumen katar o Ejipto bare zoriaia. Blagosisaren samo le ta samo le den kurbanura.#Dt 6.13. 37Cheren sa so phenda tumenge ta guruven o zakono kai dia tumen pisime. Na den liubao avere delen. 38Na bristaren tumen katar o alav kai achilem tumenchar, na den liubao avere delen, 39samo man den liubao kai sem tumaro Del, ta me ka braduiv tumen katar sa tumare dusmanura.
40A von ni asunde ta ni mukle te cheren e ezgode kai cherena omanglal. 41Blagosina e Devle ta i dena liubao pe delen. Ta lenge chave ta unukura ni mukle te cheren so cherena lenge purane, ta gia cheren le llik allive.
Currently Selected:
2 Relles 17: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
