2 Relles 14
14
O Amasias charoil ando Juda
2 Kr 25.1-28
1Kana nakhle dui burs sar kana thodape te charoil ando Israel o Joas chavo katar o Joakaz, thodape te charoil ando Juda o Amasias chavo katar o Joas. 2E Amasiaseke sea bis ta panch burs kana thodape te charoil. Charoisarda bis ta inia burs ando Jerusalem. Leki dei saia e Joadan katar o Jerusalem. 3O Amasias saia orta angla o Del a na gachin sargo o David kai saia katar leke purane, soke cherda isto sargo po dad o Joas, 4ta ni perade e thana vazdine kai o foro phabarela o taimano ta dela kurbanura.
5Kana o Amasias saia zuralo ande charoina, mundarda sa e slugen kai mundardea leke dade, 6ta ni mundarda lenge chaven soke saia pisime ando lil e zakonoko katar o Moises kana o Del phenda:
E dada nasti meren pala so cheren lenge chave, ta e chave nasti meren pala so cheren lenge dada. Suako iek ka merel pala piro bilachipe.#Dt 25.16; Ez 18.2-4.
7O Amasias mundarda des milie edomitonen ande bari Umal katar o Lon, ta po maripe lia peke o foro kai ikhardol Sela, ta thoda leko anav Jokteel llik akana.
8Ta o Amasias bichalda llenen e Joaseke chavo katar o Joakaz ta unuko katar o Jeu, charo ando Israel, te phenen leke:
Aide te dikha amen. 9A o Joas bichalda te phenen e Amasiaseke gia:
O karrno katar o Libano phenda e sedroke:
De che chorra pala mo chavo. A iek zivirinia nakhli ta ustada e karrne. 10Llanav kai dobisardan e edomitonen. Veselisao pala so cherdan, a mai sukar achi chere. ¿Soke mange te avel pe tu ta po Juda e zatrania?
11A o Amasias ni thoda leke sama. Ondaka o Joas llelo te marelpe e Amasiasea ando Bet Semes kai si ande phuv katar o Juda. 12Ta o Israel dobisarda e Judae, ta suako lleno katar o Juda naslo kai pi chara. 13O Joas charo katar o Israel phangla e Amasiase charo katar o Juda, chavo katar o Joas ta unuko katar o Okozias, ando Bet Semes. Mapalal llelotar ando Jerusalem ta cherda iek putardipe ando zido e foroko. O putardipe kai cherda saia katar o udar katar o Efrain llik kai o udar kai bangarel o drom, stotina ta ojtovardes pole. 14Lia sa o sunakai o rup ta sa e ezgode kai sea ando cher e Devleko ta ando cher e charoko. Inllarda phangle nesave llenen, ta irisailo ande Samaria.
15Sa so cherda o Joas, sa e bare ezgode kai cherda, ta sar mardape e Amasiasea charo katar o Juda, sa si pisime ando lil katar so cherde e charura e Israeleke. 16Kana o Joas mulo prajosarde le ande Samaria pasa e charura katar o Israel. Mapalal charoisarda pe leko than leko chavo o Jeroboam.
17O Amasias chavo e Joaseko charo katar o Juda, zivisarda ios desupanch burs sar kana mulo o Joas chavo e Joakazeko, charo katar o Israel. 18Sa so cherda o Amasias si pisime ando lil katar so cherde e charura e Judaeke. 19Ando Jerusalem mislisaile te mundaren e Amasiase, goleke naslo ando Lakis. Ta rodie le llik kai o Lakis ta kote mundarde le. 20Mapalal ande le pe gra ta prajosarde le pasa leke purane ando Jerusalem, ando foro katar o David. 21Ondaka sa e llene katar o Juda lie e Azariase ta thode le te charoil po than katar leko dad o Amasias. E Azariaseke sea desusov burs. 22O Azarias mapalal kana mulo leko dad, vazdia pale o Elat ta irisarda le e Judaeke.
E charoina katar o duito Jeroboam ando Israel
23Kana nakhle desupanch burs sar kana thodape te charoil o Amasias ando Juda, thodape te charoil o Jeroboam chavo e Joaseko ando Israel ta ande Samaria, ta charoisarda saranda ta iek burs. 24Ta saia bilacho angla o Del, soke cherda isto gola ezgode bilache kai cherda o Jeroboam chavo e Nabateko, kai cherda e foro katar o Israel te cherel o bilachipe.
25O Jeroboam lia pale e phuv e Israeleke kai resel katar o Jamat llik kai e mora ande Araba sar phendaia le o Del pe slugake e Jonaseke chavo katar o Amitai, kai saia profeta ando Gat Jefer.#Jon 1.1. 26Soke o Del dikhla sar sa o foro katar o Israel nakhela but bari patnia, ta ni sai ni sluga ni gazda ta niko te pomozil len. 27Ondaka braduisarda len e Jeroboamea chavo katar o Joas, soke o Del ni phenda te ikanel katar o sueto o anav e Israeleko.
28Sa so cherda o Jeroboam, ta sa e droma kai llelo po maripe ta sar irisarda e Israeleke e forura katar o Damasko ta o Jamat kai sea katar o Juda, sa si pisime ando lil katar so cherde e charura e Israeleke. 29Kana o Jeroboam mulo prajosarde le pasa e charura katar o Israel. Mapalal charoisarda pe leko than leko chavo o Zakarias.
Currently Selected:
2 Relles 14: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
