2 Relles 13
13
O Joakaz charoil ando Israel
1Kana nakhle bis ta trin burs sar kana thodape te charoil o Joas ando Juda, o Joakaz chavo katar o Jeu thodape te charoil ando Israel. Charoisarda ande Samaria desefta burs. 2A o Joakaz cherda o bilachipe angla e akha e Devleke, soke cherda isto e ezgode bilache kai cherela o Jeroboam kai cherda e Israele te cherel o bilachipe. Ta o Joakaz ni durilo katar po bilachipe. 3Goleke o Del jolailo po Israel ta cherda te dobil len o charo katar e Siria, o Jazael ta leko chavo o Ben Adad but vreme.
4Ondaka o Joakaz molisailo e Devleke, ta o Del asunda leko molipe, soke o Del dikhla sar o charo katar e Siria dukhavela e israelen. 5Ondaka o Del dia e Israele iek braduimari kai braduisarda len katar e siriura. Ta e israelitura pale zivisarde esmiro ande pe chare sargo omanglal. 6A ni mukle e ezgode bilache kai cherela o Jeroboam kai cherda e Israele te cherel o bilachipe, ta ni ikande e estatua katar e Asera kai saia ande Samaria.
7E Joakaze samo achila le pinda llene kai llana pe gra, des bordona marimake ta samo des milie boñikura kai llana peske, soke o charo katar e Siria zatrisardaia len ta cherda len sargo o prajo.
8Sa so cherda o Joakaz ta sa e ezgode tromane kai cherda, si pisime ando lil katar so cherde e charura e Israeleke. 9Kana mulo prajosarde le ande Samaria leke puranenchar. Mapalal charoisarda pe leko than leko chavo o Joas.
O Joas charoil ando Israel
10Kana nakhle tranda ta efta burs sar kana o Joas thodape te charoil ando Juda, o Joas chavo katar o Joakaz thodape te charoil ando Israel. O Joas charoisarda desusov burs ande Samaria. 11A o Joas cherda o bilachipe angla e akha e Devleke soke cherda isto e ezgode bilache kai cherela o Jeroboam kai cherda e Israele te cherel o bilachipe. Ta o Joas ni durilo katar po bilachipe.
12Sa so cherda o Joas ta sar mardape tromanimaia e charoia katar o Juda o Amasias, sa si pisime ando lil katar so cherde e charura e Israeleke. 13Kana o Joas mulo prajosarde le ande Samaria pasa e charura e Israeleke. Mapalal beslo pe leko trono o Jeroboam.
O meripe katar o Eliseo
14Kana o Eliseo saia po meripe o Joas charo katar o Israel llelo te dikhel le, ta kana dikhla le rovda ta phenda leke:
¡Dade, dade, sana e Israeleke sargo zurale boñikura!#2 R 2.12.
15Ta o Eliseo phenda leke:
Le iek arko ta nesave llide.
O charo lia iek arko ta nesave llide. 16Ondaka o Eliseo phenda leke:
Lachar tut te chude iek llida.
Ta kana o charo thovelape te chudel iek llida, o Eliseo thoda pe va upral pe va e charoke, 17ta phenda leke:
Putar e penllerava kai dikhel katar likel o kham.
O charo putarda e penllerava, ta o Eliseo phenda leke:
¡Chude e llida akana!
O charo chudia e llida. Ondaka o Eliseo phenda leke:
¡Llida e Devleki kai braduil! ¡Llida kai ka del pe Siria! ¡Tu ka chere te aven peradine e siriura ando Afek ta ka zatri saurren!
18Mapalal o Eliseo phenda e charoke:
Le e llide.
Ta kana o charo lia e llide, o Eliseo phenda leke:
Chalav ande phuv.
Ta o charo chalada ande phuv trin droma, ta achilo. 19Ondaka o profeta jolailo pe lete ta phenda leke:
Te chaladana ande phuv panch o sov droma dobisardana e sirionen llik te zatri saurren. Akana samo ka dobi len trin droma.
20O Eliseo mulo ta prajosarde le. Ta isto ande gua burs e kochkaria katar o Moab die ande phuv. 21Iek drom nesave israelitura prajona iekhe llene, ta kana dikhle kai avena e kochkaria, chudie e mule ando limori katar o Eliseo ta lleletar. Ondaka o mulo samo dodisarda e kokala katar o Eliseo, o mulo ustilo katar o meripe ta thodape pe porrne.
22O Jazael, charo katar e Siria, dukhada e Israele ande sa o vreme katar o Joakaz. 23A e Devleke avila zalva lendar ta ni zatrisarda len pala o alav kai achiloia e Abraamea, e Isaakea, ta e Jakobea. Llik akana ni zatril len.
24Ta mulo o Jazael. Mapalal charoisarda pe leko than leko chavo o Ben Adad. 25Ondaka o Joas chavo katar o Joakaz, lia katar o Ben Adad e forura kai vou liaia kana mardape leko dad. Ta o Joas dobisarda e Ben Adade trin droma ta irisarda e forura e Israeleke.
Currently Selected:
2 Relles 13: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
