2 Relles 15
15
O Azarias charoil ando Juda
2 Kr 26.3-5,16-23
1Kana nakhle bis ta efta burs sar kana thodape te charoil o Jeroboam ando Israel, thodape te charoil ando Juda o Azarias, chavo e Amasiaseko, charo katar o Juda. 2Kana o Azarias thodape te charoil sea leke desusov burs, ta charoisarda ando Jerusalem pinda ta dui burs. Leki dei saia e Jekolias katar o Jerusalem.
3O Azarias cherda so si a orta angla e akha e Devleke gia sar cherda le leko dad o Amasias. 4A ni ikande e thana vazdine kai e llene dena kurbanura ta phabarena o taimano. 5Ta o Del dukhada e charo ta cherda te nasuaol katar e lepra llik kana mulo, goleke zivisarda ande aver cher korkorre, ta leko chavo o Jotam arakhela o cher katar e charoina ta dikhela e ezgode katar o foro.
6Sa so cherda o Azarias si pisime ando lil katar so cherde e charura e Judaeke. 7Kana o Azarias mulo prajosarde le pasa leke purane ando foro katar o David. Mapalal charoisarda pe leko than leko chavo o Jotam.#Is 6.1.
O Zakarias charoil ando Israel
8Kana nakhle tranda ta ojto burs sar kana thodape te charoil o Azarias ando Juda, o Zakarias chavo katar o Jeroboam thodape te charoil ando Israel. O Zakarias charoisarda ande Samaria sov chon. 9Ta cherda o bilachipe angla e akha e Devleke gia sar cherde le leke purane, soke cherda isto e ezgode bilache kai cherda o Jeroboam chavo e Nabateko kai cherda e Israele te cherel o bilachipe.
10O Salum chavo katar o Jabes vazdinailo te mundarel e Zakariase ta mundarda le angla e llene katar leko foro, mapalal isto vou thodape te charoil.
11Sa so cherda o Zakarias si pisime ando lil katar so cherde e charura e Israeleke. 12Gia cherdilo o alav kai o Del dia e Jeue kana phenda kai leke chave ka besen po trono llik kai e star viche.#2 R 10.30.
O Salum charoil ando Israel
13Kana nakhle tranda ta inia burs sar kana thodape te charoil o Uzias ando Juda, thodape te charoil ando Israel o Salum chavo katar o Jabes. A charoisarda samo iek chon ande Samaria, 14soke o Menajem chavo katar o Gadi llelo katar e Tirsa ande Samaria ta mundarda e Salume, ta charoisarda pe leko than.
15Sa so cherda o Salum ta sa o bilachipe kai mislisailo te cherel, sa si pisime ando lil katar so cherde e charura e Israeleke.
16Ondaka o Menajem zatrisarda e foro katar o Tifsa ta sa e llenen kai sea kote, ta sa so saia truial llik katar e Tirsa. Lia sa so saia ando foro ta putarda o lli katar e diskinie kai sea khamne. Gua cherda le soke ni putarde leke o udar katar o foro.
O Menajem charoil ando Israel
17Kana nakhle tranda ta inia burs sar kana thodape te charoil o Azarias ando Juda, thodape te charoil ando Israel o Menajem chavo katar o Gadi. Charoisarda des burs ande Samaria. 18O Menajem cherda o bilachipe angla e akha e Devleke, soke ni mukla o bilachipe kai cherela o Jeroboam chavo e Nabateko kai cherda e Israele te cherel o bilachipe.
19Ondaka avilo o Pul o charo katar e Asiria te marelpe e phuviaia. Ta o Menajem dia kai o Pul tranda ta trin kile katar o rup te sai llal angle leko gazdaripe ande charoina. 20Te sai pochinel e charoke katar e Asiria, o Menajem phenda e barvalenge katar o Israel te pochinen dopas kila katar o rup. Gia o charo katar e Asiria ni achilo ande phuv ta irisailo kai pi phuv.
21Sa so cherda o Menajem si pisime ando lil katar so cherde e charura e Israeleke. 22Mapalal kana mulo o Menajem, thodape te charoil pe leko than leko chavo o Pekajias.
O Pekajias charoil ando Israel
23Kana nakhle pinda burs sar kana thodape te charoil o Azarias ando Juda, thodape te charoil ando Israel o Pekajias chavo katar o Menajem ta charoisarda ande Samaria dui burs. 24O Pekajias cherda o bilachipe angla akha e Devleke, soke ni mukla o bilachipe kai cherela o Jeroboam chavo e Nabateko kai cherda e Israele te cherel o bilachipe.
25A o Pekaj chavo katar o Remalias, kai saia iek katar leke gazda, vazdinailo pe lete. Ta pomozisarda le o Argob ta o Arie ta pinda murusa katar o Galaad. Ta mundarda le ando cher e charoko kai saia ande Samaria. Mapalal isto vou thodape te charoil pe leko than.
26Sa so cherda o Pekajias si pisime ando lil katar so cherde e charura e Israeleke.
O Pekaj charoil ando Israel
27Kana nakhle pinda ta dui burs sar kana thodape te charoil o Azarias ando Juda, o Pekaj chavo katar o Remalias thodape te charoil ando Israel. O Pekaj charoisarda ande Samaria bis burs. 28O Pekaj cherda o bilachipe angla e akha e Devleke soke ni mukla o bilachipe kai cherda o Jeroboam chavo e Nabateko kai cherda e Israele te cherel o bilachipe.
29Ando vreme kana o Pekaj saia o charo katar o Israel, avilo o Tiglat Pileser charo katar e asiriura ta lia peke o Ijon, o Abel Bet Maaka, o Janoaj, o Kedes, o Jasor, o Galaad, e Galilea ta sa e phuv katar o Neftali. Inllarda phangle ande Asiria sa e llenen katar gala forura. 30Ondaka o Oseas chavo katar o Ela vazdinailo po Pekaj chavo katar o Remalias, ta mundarda le ta charoisarda pe leko than. Gua saia kana nakhle bis burs sar kana thodape te charoil o Jotam chavo katar o Uzias.
31Sa so cherda o Pekaj si pisime ando lil katar so cherde e charura e Israeleke.
O Jotam charoil ando Juda
2 Kr 27.1-9
32Kana nakhle dui burs sar kana o Pekaj chavo katar o Remalias, thodape te charoil ando Israel, thodape te charoil o Jotam chavo katar o Uzias ando Juda. 33Sea leke bis ta panch burs kana thodape te charoil, ta charoisarda ando Jerusalem desusov burs. Leki dei saia e Jerusa chorri katar o Sadok.
34O Jotam cherda so si orta angla e akha e Devleke, isto gia sar cherda leko dad o Uzias, 35soke vazdia o udar mai baro katar o cher e Devleko. A ni ikande e thana vazdine kai o foro dela kurbanura ta phabarena o taimano.
36Sa so cherda o Jotam si pisime ando lil katar so cherde e charura e Judaeke.
37Ande gua vreme o Del thoda te bichalel e Resine charo katar e Siria ta e Pekaje chavo katar o Remalias, te den po Juda. 38Kana mulo o Jotam prajosarde le pasa leke purane ando foro katar o David. Mapalal charoisarda pe leko than leko chavo o Ajaz.
Currently Selected:
2 Relles 15: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
