2 Korintios 3
3
1Kana phena sa gala ezgode inai te da orba lachi isto amen amendar. Soke ni trubul amen lila te phenen kai amen sam lache, ta ni manga tumendar te pisinlen te sikavalen averenge. Aver llene trubul len te cheren gala ezgode. 2Tumen sen o lil kai del orba lachi amendar, gua si so trubul amen, iek lil pisime ande amaro lio, kai saurre pinllaren ta sai chitin. 3Ta dikhol bristomaia kai tumen sen iek lil pisime isto e Kristotar ta kai isto amen diamle, iek lil kai pisisardale o Duo e Devleko kai si llundo, pisisardale ando lio e manusengo, na pe kotora barrustune.#Ek 24.12; Jer 31.33; Ez 11.19; 36.26.
4Soke pala o Jesukristo si amen vera ando Del, ta pacha gala ezgode. 5Amen inai e zor te chera niso, soke o Del si kai del amen e zor te cherale. 6Soke o Del sikada amen te phena saurrenge kai achilam pe iek nevo alav lea. Gava nevo alav inai istardo po zakono, vou si istardo po Duo e Devleko. Soke o zakono dosarel e bilache te merel, a o Duo e Devleko del zivoto.#Jer 31.31.
7O Del pisisarda o zakono pe kotora barrustune, ta kana diale kai o Moises, o baripe e Devleko sikadilo ta o mui e Moiseseko klichila pe gachin kai e israelitura nasti dikhena pe leko mui. A gua klichipe chinado saia te lelpe letar.#Ek 34.29. 8A kana ka phendol o braduipe, gua ka avel ios mai but baripe, soke si cherdo ando Duo. 9A te saia dino gia barimaia gua zakono kai phenel kai amen morabi te mera cheres amaro bilachipe, ¡ios mai baripe ka avel kana ka phendol e orba kai o Del llinel amen chache! 10Soke so saia le baripe, inai le gua baripe prema o baripe mai glamno. 11A te saia le baripe so saia te getolpe, but mai baro ka avel so achel ostade.
12Isto goleke, soke si amen gava pachape ni dara te da gala orbe. 13Ta ni chera sargo o Moises, kai ucharela iekhe dikhlea po mui te na dikhen e israelitura kai o klichipe sa polokorre lelape letar.#Ek 34.33. 14A von ni kamle te acharen gaia ezgoda, ta llik akana, kana chitin e lila e Moiseseke, isto gua dikhlo ni mukel len te acharen, soke inai ikando lendar, ta gua dikhlo lelpe samo e Kristoia. 15Ta llik allive, kana chitin e lila e Moiseseke, iek dikhlo ucharen len te na acharen. 16A kana iek lleno irilpe kai o Gazda, gua dikhlo lelpe letar. 17Soke o Gazda si o Duo, ta kote kai si o Duo e Gazdako, si mukliardipe. 18Goleke, akana kai saurre sam bi e dikhlea kai ucharela amaro mui, sam sargo iek geldala kai sikavel o baripe e Gazdako, ta amaro zivoto pharudol prema lete, ta suako drom si amen mai but katar leko baripe, ta gava si cheres e buchi kai cherel o Duo e Gazdako.#Ro 8.29; Gl 4.19; Flp 3.10.
Currently Selected:
2 Korintios 3: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
