2 Korintios 2
2
1Goleke, soke ni kamama te tristou tumen ni kamlem te llau pale te dikhav tumen. 2Soke me te tristova tumen ¿Ko ka veselil man? samo tumen kai me tristosardem. 3Me llanava kai ka veselin tumen manchar. Me ni kamama te triston man kana tumen saia te veselin man, goleke avila mange mai sukar te pisiv tumenge neko te llau tumende. 4A kana pisisarden tumenge gua lil, saia mange but zalba ta gia brigime sema kai rovava. Me ni kamama te tristou tumen, so me mangava saia te llanen kai voliv tumen but.
O Pablo prostil e llene kai dia orbe bilache letar
5Ni kamam te bariarav gaia ezgoda kai nakhla, gua lleno kai tristosarda man, sai avelpe kai tristosarda sa tumen. 6E duk kai dien saurre gole llene si dosta. 7So morabi te cheren akana si te prostin le ta te pomozin le, soke but zalba sai nasuarel le. 8Goleke, me moliv man tumenge te sikaven leke pale kai volin le. 9O lil kai pisisarden tumenge saia te zumavav tumen te sai llanav dal mangen te cheren sa so me phenav tumenge. 10Goleke, me ka prostiv gole llene kai tumen ka prostin, ta ka prostiv le te si vareso te prostilpe. Ka cherav le soke misliu man ande tumende, ta phenaule angla o Kristo. 11Ta gia o Satanas ni ka kojavel amen, soke amen llana save ezgode bilache mangel te cherel.
E briga e Pabloki ando Troas
12Kana avilem ando foro o Troas te phenav e lachi viasta e Jesukristoki, putaile mange e udara te radiu e Gazdake. 13A sema brigime, soke kote ni maladem amare phlale e Tito. Goleke llelemtar katar e phlal kai si ando Troade, ta llelem ande Masedonia.#Ech 20.1.
O Pablo del fala e Devle
14Dau fala e Devle soke cherel amen te dobisara ando Kristo, ta mukla amen te inllara leke alava, kai llan pe suako rig sargo kana khandel sukar iek meriso. 15Soke amen sam sargo e khand katar o taimano kai o Kristo del e Devle. 16A golenge kai jasaon, gava taimano si lenge iek khand merimaki, a golenge kai braduinpe, lenge si iek khand kai del len zivoto. ¿A ko sai cherel gaia buchi? 17Amen ni chera arli e alavenchar kai mukla o Del, sar cheren but llene, amen da orba chachimaia soke o Del bichalda amen ta sam ande iek than e Jesukristoia.
Currently Selected:
2 Korintios 2: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
