2 Korintios 4
4
E llene kai den orba e Jesukristoki
1Goleke ni chiniva, soke o Del ande po volipe thoda amen te chera gaia buchi. 2Ta ni kamlam te chera gaia buchi po chorial, sargo kana si amenge lallao, ta ni cherdam e ezgode kojaimaia ta ni bangardam e Devleke alava. Goleke o Del llanel kai phena samo o chachipe, ta angla o Del saurre sai aven len vera ande amende. 3A e lachi viasta kai phena te si uchardi sargo iekhe dikhlea, si samo golenge kai jasaon. 4Goleke sar von ni pachan, o del gale suetoko cherda len korre, te na acharen ta te na dikhen o villelo katar e lachi viasta katar Kristo o baro, soke letar sikadol o Del. 5Amen ni diam orbe amare. E orba kai diam si kai o Jesukristo si amaro Gazda, ta kai amen sam tumare esluge soke voli e Jesuse. 6Soke isto o Del kai cherda te likel o villelo katar o truniariko, vou si kai cherda te bariol leko villelo ande amare lie, te sai da gua villelo averen ta te sikava e zor e Devleki kai klichil po mui e Jesukristoko.#Jen 1.3.
O pachape ande e duk
7A si amen gava barvalipe ande piria cherde katar o glibo, te sai sikava kai goia zor avel katar o Del a na amendar. 8Goleke i te nakhaia patnia ni jasara o pachape, i te si amen brige acha esmiro. 9Llan pala amende te maren amen, a amen ni sam korkorre, peraven amen, a ni zatrin amen. 10Kaigo te llaia inllara ande amare esnage o meripe e Jesuseko, te sai dikhol leko zivoto ande amende. 11Soke amen so avaia llunde sam thode po meripe cheres o Jesus, te sai sikadol leko zivoto ande amari esnaga merimaki. 12Goleke, amen i te laia te mera, tumen len o zivoto nevo.
13O Pisipe phenel: Me pachaien, ta goleke diem orba. Ta isto gia amen, pacha ta da orba.#Sal 116.10. 14Soke llana kai o Del ka vazdel amen katar o meripe gia sar vazdia amare Gazda e Jesuse, ta ka inllarel amen tumenchar kote kai si vou. 15Sa gala ezgode nakha len soke voli tumen, soke te avena mai but llene kai len o volipe ta e dragostia e Devleki, gia ka aven mai but llene kai ka den le e fala te sai avel o baripe e Devleko.
16Goleke ni chiniva i te avela kai gaia esnaga murilpe avrial, soke andral cherdol nevi suako llive. 17E patnia kai nakha ande gava zivoto si lokhi ta oma ka nakhel, a fala kai cheres e patnia o Del ka pherel amen katar pi dragostia kai ka achel ostade, iek dragostia bari ta pherdi veselia. 18Soke amen ni brigi amen katar e ezgode kai dikhon soke gola ezgode meren, amen brigi amen katar e ezgode kai ni dikhon soke gala ezgode si ostade.
Currently Selected:
2 Korintios 4: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
