2 Korintios 1
1
Salami
1Me o Pablo apostol e Jesukristoko pala e volia e Devleki ta o Timoteo, bichala salami e llenenge katar e khanlliri e Devleki kai si ando Korinto ta sa e phlalenge kai si ande Akaia.#Ech 18.1. 2O Del amaro Dad, ta o Gazda o Jesukristo te del tumen po volipe ta pi pas.
O Pablo del fala e Devle
3Blagosime te avel o Del, o Dad amare Gazdako e Jesukristoko, soke vou si o Dad kai si leke zalba amendar ta o Del kai suako drom pomozil amen. 4Vou pomozil amen ande sa amare nuzde ta ande amare dukha te sai i amen pomozi golen kai si ande nuzda, ta gia sar o Del pomozisarda amen isto gia amen te pomozi averen. 5Nakha but patnia sargo o Kristo ta cheres lete o Del pomozil amen. 6Amen te nakha patnia, si te sai tumen aven braduime. O Del pomozil amen te sai pomozi tumen, ta gia sai ka terpin esmiro e duk ta e patnia kai i amen nakha. 7Amen si but vera ande tumende, ta llana kai te nakhena patnia, o Del ka pomozil tumen. 8Phlalalen, manga te llanen e bari patnia kai nakhlam ande Asia. Gia bari saia kai nasti terpia la ta mislia kai ka mera.#1 Kor 15.32. 9Acharaia amen sargo e llene kai pe iek kris chinen lenge te meren. A sa gala ezgode nakhle te sai sikiva te na avel amen vera ande amende, te sai pacha ando Del kai sai cherel te usten e mule katar o meripe. 10O Del arakhla amen katar o meripe, ta pacha kai vou pale ka arakhel amen. 11Molintumen pala amende ta gia ka pomozin amen. Te si but llene kai molinpe, ondaka but llene ka den fala e Devle cheres e ezgode kai o Del cherel, ta pala sa e ezgode lache kai vou del amen.
¿Soke o Pablo ni llelo ando Korinto?
12Amen veselia amen, soke llana kai cherdam ezgode lache ta avilam chache saurrenchar ta mai anglal tumenchar. Ni cherdamle amare bizaimaia, ta da fala e Devle, soke vou si kai pomozisarda amen pe volimaia. 13A kana kai pisi tumenge ni cherale alavenchar kai si trudne te acharen len kana ka chitinlen. Ta aduricharav te sai acharen sa gala orbe, 14soke akana acharden mai but so sam amen, ta kana ka avel o Gazda o Jesukristo, tumen sai ka aven vesele amendar, gia sar i amen ka ava vesele tumendar. 15Goleke mangava te llau mai anglal te dikhav tumen, gia te sai llau dui droma tumende. 16Soke me mislivaman te llau ande Masedonia, ta mapalal te sai iriv man pale tumende, ta gia tumen sai pomozisardena man te resav ande phuv katar e Judea.#Ech 19.21. 17¿A so, tumen mislin kai me ni mislisailem mai anglal so te cherav? ¿O mislin tumen kai me sem sar si sa e llene, kai mai anglal phenav ea ta isto ande gua vreme phenav iok? 18O Del llanel kai amen cherdam so phendam. 19O Timoteo, o Silas ta me phendam tumenge e alava katar o Jesukristo, o Chavo e Devleko. Ta o Jesukristo ni phenda ea ta iok isto ande iek vreme. O Del phenda ea suako drom ando Jesukristo.#Ech 18.5. 20Ta sa e alava kai mukla o Del cherdon ando Jesukristo. Goleke kana blagosi e Devle ando Jesukristo phena Gia te avelpe. 21Man ta i tumen, o Del cherel amen zurale ande iek than e Kristoia ta vou esvirisarda amen, 22ta te sikavel kai sam leke, dia amen po Santo Duo.#Ef 1.14.
23Te na llelem te dikhav tumen, gua si soke me tradau tumaro liubao, ¡o Del te mundarel man te kojavava! 24Amen ni gazdari pe tumaro pachape, so amen manga si te pomozi tumen, te sai aven vesele soke tumen sen zurale ando pachape.
Currently Selected:
2 Korintios 1: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
