2 Kronikas 6
6
O cher e Devleko
1 R 8.12-66
1Ondaka o Salomon phenda:
Tu Devla phendan
kai ka zivi ande tufina katar iek oblako.
2A me vazdiem chuke
iek cher te sai zivi,
iek than te sai zivi kote ostade.
3Mapalal o charo boldinailo ta blagosisarda e llenen katar o Israel, ta sa o foro saia pe porrne, 4ta phenda:
Blagosime te avel o Del o Gazda e Israeleko kai pe vastea cherda so achilo po alav e Davidea mo dad, kana phenda leke:
5Sar kana ikandem me foro katar o Ejipto, ni esvirisardem ni iekhe vicha katar o Israel te sai vazden mange iek cher te avel mo anav ande le, ta ni esvirisardem ni iekhe llene te gazdaril pe mo foro o Israel, 6a esvirisardem te avel mo anav ando Jerusalem, ta esvirisardem e Davide te gazdaril pe me foro o Israel. 7Ta o David, mo dad mangla te vazdel cher e Devleke, o Del e Israeleko. 8A o Del phenda me dadeke e Davideke:
Sukar si kai mange te vazde mange iek cher te blagosin mo anav, 9a tu ni ka vazde mange iek cher te blagosin mo anav, cho chavo ka cherel le.#2 S 7.1-13.
10Ta o Del cherda so achilo po alav, soke thoda man po than me dadeko e Davideko, ta beslem po trono katar o Israel, ta vazdiem cher e Devleke, o Del e Israeleko. 11Ta thodem andre e arka, kai andre si o alav kai o Del dia e chaven katar o Israel.
12Ondaka o Salomon thodape angla o altar e Devleko, angla sa o foro katar o Israel, ta inzarda pe va. 13Soke o Salomon cherdaia iek stali tuchno kai sea le dui pole ta iek cheperko ando lungipe, isto gia o bulipe. Iek pola ta iek cheperko llik upre. Ta o Salomon thodaia le ande bar e chereki. Mapalal dia changenchar angla sa e israelitura kai chidinialea, ta inzarda pe va karing o miloso, 14ta phenda:
Devla, o Del e Israeleko, inai ando miloso ta ande phuv ni iek Del sargo tu kai chere so ache po alav ta kai si chuke zalba e llenendar kai llan sa pe liea angla tu, 15kai cherdan so achilan po alav me dadea e Davidea. Phendan le katar cho mui, ta cherdan le che vastea, gia sar dikhol allive. 16Goleke Devla e Israeleko, cher so jalan sovel che slugake o David mo dad, kana phendan leke kai suako drom ka avel iek murus leko, kai ka besel po trono katar e charoina, samo te llan prema cho zakono sar cherda le mo dad.#2 S 7.11-16; 1 R 2.4. 17Akana, Del Israeleko cher so achilan po alav me dadea e Davidea.
18A ¿istina sai zivil o Del e manusenchar pe phuv? Soke o miloso katar o miloso ni resel chuke, ¿a sar ka resel chuke o cher kai me vazdiem chuke?#2 Kr 2.6. 19Asun man Devla, asun o molipe katar cho sluga ta thov mange sama, me moliv man chuke 20Na muk te dikhe pe gava cher ni ollivesea ta ni orachaia, soke gava cher si o than kai tu phendan:
Mo anav ka avel kote. Asun o molipe katar cho sluga kai molilpe kate.#Dt 12.11. 21Asun o molipe katar cho sluga ta katar cho foro o Israel. Kana ka moli amen pe gava than tu ka asune amen ando miloso kote kai zivi, ta ka prosti amen.
22Fiko te cherela o bilachipe avereke, ta cherela le te jal sovel angla cho altar katar gava cher, 23tu ka asune e milosotar ta ka krisi che slugen. Ka dukhave e bilache ta ka chere te perel pe leko soro sa leko bilachipe, ta e lache ka lline le lacho prema leko lachipe.
24Te dobina e dusmanura che foro e Israele pala fisavo bilachipe kai cherde angla tu. Ta te irinape tute, ta blagosina cho anav, ta te molinape chuke ande gava cher, 25tu ka asune e milosotar ta ka prosti o bilachipe katar cho foro o Israel, ta ka chere te aven pale kai e phuv kai tu dian len ta lenge daden.
26Te na diapeke soke cho foro cherda o bilachipe angla tu, ta te molinape chuke karing gava cher, ta te phenena cho anav, ta te irinape tute, kana tu ka dukhave len, 27tu ka asune len e milosotar ta ka prosti o bilachipe katar che sluge ta katar cho foro o Israel, ta ka sikave len o drom o lacho kai morabi te llan, ta ka chere te delpeke pe gaia phuv kai muklan te achel che foroke.
28Kana ka avel e bok ande phuv, o kana ka aven muke, o ka sukon e patra pala o baro tatipe, o kana ka aven e langoste ta e pisoma. Kana ka aven e dusmanura pe amare forura te den pe lende, o kana ka avel fisavi aver ezgoda bilachi o nasualipe, 29asun suako molipe katar suako lleno, o katar sa cho foro o Israel, kana ka nakhen bari patnia ta ka inzaren pe va karing gava cher, 30tu ka asune e milosotar, kote kai zivi, ta ka prosti ta ka de suakone llene prema e ezgode kai cherda, ta prema so si ande leko lio, soke samo tu pinllare o lio e manusengo. 31Gia ka den tut liubao ta ka llan pe che droma suako llive kai ka zivin pe phuv kai dian amare puranen.
32Ta i o lleno kai inai katar cho foro o Israel, te avela duratar pala cho baro anav ta pala chi bari zor te molilpe ande gava cher, 33tu ka asune e milosotar kote kai zivi, ta ka chere sa so ka mangel tutar o lleno kai inai katar cho foro. Te sai pinllaren cho anav sa phuvia ta te daran tutar, sargo cho foro o Israel, ta te acharen kai cho anav si blagosime pe gava cher kai me vazdiem.
34Te likela cho foro po maripe kaigo tu bichalela len, te molinape karing o foro kai tu esvirisardan ta karing o cher kai me vazdiem che anaveke, 35tu ka asune e milosotar lengo molipe ta ka pomozi len.
36Ta te cherena chuke o bilachipe, soke inai ni iek lleno kai ni cherel o bilachipe, ta ande joli pe lende tu cherea te dobin lenge dusmanura ta te inllaren len phangle, dur o pase katar lengi phuv, 37ta ande phuv kai von avena phangle, te irinape tute ta te molinape chuke ta te phenena kai cherde o bilachipe. 38Te keinape sa pe liea ta sa pe duoia ande phuv katar lengo dusmanura, ta te molinape chuke karing e phuv kai dian lenge puranen, karing o foro kai tu esvirisardan, ta karing o cher kai me vazdiem che anaveke, 39tu ka asune lengo molipe ando miloso, kote kai tu zivi, ta ka avel chuke zao lendar, ta ka prosti o bilachipe kai cherde chuke.
40Murno Del, dik ta asun sar molinpe pe gava than.
41Uste Devla, ta aide kote kai ka bese,
tu ta e arka katar chi zor,
che popura te furiadon ando braduipe,
ta che llene sante te veselinpe ando cho lachipe.
42Devla Gazda, na de e zea kai o charo kai esvirisardan.
De tut golli katar cho volipe po David cho sluga.#Sal 132.8-10.
Currently Selected:
2 Kronikas 6: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
