2 Kronikas 30
30
O Ezekias cherel e paskua
1O Ezekias bichalda llenen ande sa o Israel ta o Juda, ta bichalda lila e Efraineke ta e Manaseseke, te ikharen len te aven ando cher e Devleko ando Jerusalem te cheren e paskua e Devleki, o Del e Israeleko. 2O charo achiloia pe iek orba e mai bare gazdenchar ta sa e foroia katar o Jerusalem, te cheren e paskua ando duito chon, 3soke llik kote nasti cherena e paskua soke ni resena e popura kai ni santifikisardeape, ta o foro ni chidiniaola ando Jerusalem. 4E charoke ta e foroke pela drago kana achile pe iek orba. 5Ta cherde te asundol ande sa o Israel, katar o Berseba llik kai o Dan, te aven te cheren e paskua e Devleke, o Del e Israeleko, soke ollikana ni cherenale sar saia pisime.
6Ta llele sa e llene bichalde ande sa o Israel ta o Juda e lilenchar katar o charo ta katar e gazda, sar phendaia le o charo, ta gia phenena e lila:
Israelitura, irin tumen kai o Del, o Del e Abraameko, e Isaakeko, ta e Israeleko, ta vou ka irilpe tumende kai naslen katar e charura e Asiriake. 7Te na aven sargo tumare purane ta tumare phlal kai o Del zatrisarda len soke ni kandie le. 8Te na aven bilache sargo tumare purane, a cheren so phenel o Del. Radisaren e Devleke tumaro Gazda, aven ande leko santuario kai vou chistosarda ostade, ta ka lelpe letar e joli pe tumen. 9Te irin tumen kai o Del, tumare phlalen ta tumare chaven ni ka patin len e dusmanura kai phangle len. Ta ka irinpe kaim pi lengi phuv, soke o Del si lacho ta si leke zalba, goleke ni ka mukel tumen te irina tumen lete.
10E llene kai sea bichalde llele pe sa e phuv katar o Efrain ta o Manases. Llele foro forote llik kai o Zabulon. A e llene asana ta marena lendar espurnia. 11A nesave llene katar o Aser, o Manases ta o Zabulon keisaile angla o Del ta llele ando Jerusalem. 12Ta i o Del cherda ando Juda te asunen e orba e charoki ta te kanden e charo ta e gazden, prema sar phendaia le o Del.
13Gia, ando duito chon avile but llene ando Jerusalem te cheren e slava katar e marrne kai inai len levadura. 14Ta e llene ikande e thana kurbanoke ta e thana te phabaren o taimano kai sea ando Jerusalem ta chudie len po pai katar o Sedron. 15O desustarto llive katar o duito chon cherde o kurbano katar e paskua. Ta e popura ta e levitura lallaile but santifikisardepe, ta inllarde e kurbanura ando cher e Devleko, 16thodepe pe po than prema sar si pisime ando zakono e Moiseseko, manus e Devleko. E popura thovena o rat kai dena lende e levitura. 17Soke sea but llene kai ni sea chiste, goleke e levitura mundarde e zivirinie katar e paskua pala sa e llene kai ni sea chiste te sai chiston len e Devleke. 18But llene katar o Efrain, o Manases, o Isakar ta o Zabulon ni chistosaile, goleke jale e paskua bi te cheren le sar phenel ando zakono. A o Ezekias molisailo pala lende ta phenda e Devleke:
Tu Devla san lacho prostisar sa golen kai roden tut sa pe liea, 19makar te na chistosaile sar phenel le ando zakono. Tu san o Gazda, o Del lenge puranengo.
20Ta o Del asunda o molipe katar o Ezekias ta sastarda e foro. 21Gia, ande efta llive e israelitura kai sea ando Jerusalem cherde veselimaia e slava katar e marrne kai inai len levadura, ta e popura blagosina e Devle ta llilabena ta basalena ande basalde. 22Ondaka o Ezekias dia orba volimaia e levitonenge kai radina e Devleke, ta ande efta llive katar e glamni slava jale katar e kurbanura, ta die kurbanura pala e pas, ta die fala e Devle, o Del katar lenge purane.
23Ta sa e llene kai sea chidine, mangle te cheren e slava efta llive ios, ta gia cherde le veselimaia. 24O charo o Ezekias katar o Juda diaia e llenen kai chidinailea milia guruva ta efta milie bakre, ta i e gazda die e foro milia guruva ta des milie bakre, ta but popura chistosaile. 25Gia sa e llene katar o Juda veselisaile, ta i e popura ta e levitura, ta sa o sueto kai aviloia katar o Israel, ta e llene katar aver phuvia kai avilea ande phuv katar o Israel ta o Juda. 26Saia iek bari veselia, soke katar e llivesa e Salomonoke, chavo katar o charo o David katar o Israel, ni saia iek slava gia bari ando Jerusalem. 27Mapalal e popura ta e levitura thodepe pe porrne ta blagosisarde e foro, ta lengo molipe avilo llik kai o miloso, ando cher kai zivil o Del ta o Del asunda len.
Currently Selected:
2 Kronikas 30: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
