1 Samuel 6
6
E filisteura irin e arka e Devleki
1E arka e Devleki achili efta chon ande phuv katar e filisteura. 2Ta e filisteura ikharde e poponen ta golen kai apogodin te puchen len:
¿So ka chera e arkaia e Devleki? Phenen amenge sar ka iri la kai lako than.
3A von phende lenge:
Te sai irin e arka katar o Del e Israeleko kai lako than, morabi te den ofrende e Devleke pala tumari dos. Gia tumen ka aven saste ta ka llanen soke si joliariko pe tumende o Del.
4A von puchle:
¿Savi ofrenda sai da te na avel o Del joliariko pe amende?
A e popura phende lenge:
Panch slike sunakune sargo gute, iek pe suako gazda katar e filisteura. Panch misiakura sunakune, soke isto goia muka peli pe tumende ta i pe tumare gazda. 5Cheren tumen slike sargo gute ta sargo e misiakura kai zatrin e phuv. Den liubao e Devle katar o Israel, gia sai avelpe kai ni ka dukhavel tumen ios, ta ni ka dukhavel ios tumare delen ta tumare phuvia. 6¿Soke zuriaven tumare lie sargo e ejipsiura ta sargo o Faraon kana o Del dukhada len? ¿Ni mukle von te llantar e israelitura? 7Cheren tumen iek bordon nevo. Anen dui guruven kai si len telchura ta kai nikada ni thode pharipe pe lende te radin. Thoven len te chirden o bordon, ta na muken te llan pala lende lenge telchura. 8Thoven e arka e Devleki ando bordon, ta pe iek rig, ande baulicha, thoven o sunakai kai tumen ka den ofrenda pala tumari dos. Mapalal muken te llaltar korkorre o bordon. 9Morabi te dikhen kai llal o bordon, soke te llal ando Bet Semes kai goia si lengi phuv, gua si kai o Del dukhada amen. A te na llana incha, gua si kai so nakhla amenge nakhla samo gia.
10Ta e filisteura cherde isto gia. Thode dui guruven te chirden o bordon ta phangle lenge telchura chere. 11Thode ando bordon e arka e Devleki, ta pasa la e baulicha ta andre e slike sunakune katar e misiakura ta e slike sunakune katar lenge gute. 12Ondaka e guruva llele po drom kai llal ando Bet Semes. E guruva basena ta llana orta po drom. E gazda filisteura llele palal pala e guruva llik kai o Bet Semes. 13Ondaka e llene katar o Bet Semes chidena o lliu ande umal, ta kana dikhle e arka katar o Del o Gazda kai avela veselisaile but. 14O bordon avilo ando Bet Semes kai e umal katar o Josue, ta achilo pasa iek bari pechina. E llene katar o Bet Semes ikande e kasta katar o bordon, ta die e guruven kurbano e Devleke. 15A e levitura fuliarde e arka e Devleki ta i e baulicha kai saia pasa la kai andre sea e ezgode sunakune, ta thode len upral pe pechina. Gua llive e llene katar o Bet Semes die kurbanura ta ofrende phabarde e Devleke. 16Kana e panch gazda filisteura dikhle gava, isto o gua llive irisaile ando Ekron.
17Gala si e gute sunakune kai e filisteura die te na avel ios joliariko pe lende o Del. Pala o Asdod iek, pala e Gaza iek, pala o Askalon iek, pala o Gat iek, pala o Ekron iek. 18A e misiakura sunakune sea pala sa e forura katar e panch filisteura, forura zidome, ta forichura minone kai truial ni sea len zido. E bari pechina kai pe late thode e arka katar o Del o Gazda, si ando umal katar o Josue ando Bet Semes llik akana.
19A o Del cherda te meren e llene katar o Bet Semes, soke dikhle so saia andre ande e arka e Devleki. Mule pinda milie ta eftavardes llene. Ta sa o foro rovda soke o Del cherda te meren lendar but llene. 20Ta e llene katar o Bet Semes phende:
¿Ko sai te avel angla o santo Del? ¿Pe ka ka joliaol kana ka duriol amendar? 21Ta bichalde llenen ando Kiriat Jearim, te phenen gia:
E filisteura irisarde e arka e Devleki. Aven ta inllaren la tumende tumen.
Currently Selected:
1 Samuel 6: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
