1 Samuel 5
5
E arka e Devleki maskar e filisteura
1E filisteura lie e arka e Devleki ta inllarde la katar o Eben Ezer llik kai o Asdod. 2Mapalal ande e arka e Devleki kai o cher katar lengo del o Dagon, ta thode la pasa le. 3Thiarinako e llene katar o Asdod dikhle kai o Dagon saia peradino angla e arka e Devleki, ta thode e Dagone pe porrne pe po than. 4Ta pale thiarinako dikhle kai o Dagon saia peradino angla e arka e Devleki. Ta o soro e Dagoneko ta leke dui va sea chinde pasa o udar, samo achili leki esnaga. 5Goleke llik akana e popura e Dagoneke ta sa e llene ni ustaven o udar katar o cher e Dagoneko kai si ando Asdod.
6Ta o Del dukhada zurale e llenen katar o Asdod ta ande sa lengi phuv. Cherda te barion lenge gute bare ta te avel lenge bari dar. 7Ta kana e llene katar o Asdod dikhle so nakhela, phende:
E arka katar o Del e Israeleko nasti achel maskar amende soke pala gua o Del dukhavel amen ta zatril e Dagone.
8Goleke ikharde te aven e mai preche katar e filisteura, ta phende lenge:
¿So ka chera amen e arkaia katar o Del e Israeleko?
Von phende:
Tumen sai inllaren la ando foro katar o Gat.
Ta inllarde incha e arka katar o Del e Israeleko.
9Ta kana thode e arka e Devleki ando foro katar o Gat, o Del cherda te avel pe llene iek bari dar. O Del dukhada e murusen, bare ta minone, ta pherdile gute. 10Ondaka e filisteura inllarde e arka e Devleki ando Ekron. Ta kana e llene katar o Ekron dikhle kai anena e arka e Devleki, urkisarde ta phende:
¡Ande e arka katar o Del Israeleko samo te mundaren amen ta amare foro!
11Ta ikharde te aven e mai preche katar e filisteura, ta phende lenge:
Inllaren e arka katar o Del e Israeleko. Irin la kai lako than te na mera sa. Soke ando foro e llene darana te meren pala e zor e Devleki kai sai but bari pe lende.
12Ta gola kai ni merena, bariona lenge gute bare. Sa e llene ando foro urkina zurale, pe gachin kai lengo urkipe avela llik kai o miloso.
Currently Selected:
1 Samuel 5: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
