1 Samuel 4
4
E filisteura len e arka e Devleki
1Mapalal o Samuel phenela e orba e Devleki sa e llenenge katar o Israel. Ondaka avile e filisteura te marenpe e israelitonenchar. Goleke e israelitura likiste te marenpe e filisteonenchar ta inzarde pe chare ando Eben Ezer, a e filisteura ando Afek.
2Ta e filisteura mardepe e israelitonenchar. E filisteura dobisarde ta mundarde star milie llenen katar o Israel. 3Ta kana e israelitura irisaile kai o pero, e phure katar o Israel phende:
¿Soke o Del mukla te dobin amen e filisteura? ¡Aide te ana katar o Silo e arka e Devleki te ana la amende, gia o Del ka braduil amen katar e filisteura!
4Ondaka e israelitura bichalde boñikonen kai o Silo, ta ande e arka e Devleki, o Del kai si le sa e zor, kai leko trono si upral pe kerubinura. Ta e dui chave e Elieke o Ofni ta o Finees, i von llana pasa e arka katar o Del o Gazda.#Ek 25.18-22; 1 R 6.23-28; Sal 80.1; Is 37.16; Ez 1.26-28. 5Ta kana ande e arka e Devleki ando pero, e israelitura urkisarde veselimatar zurale, gia zurale kai dermosaili e phuv.
6Ta kana e filisteura asunde sar urkina e israelitura, puchle:
¿Soke gachin urkin e israelitura?
Ta kana llangle kai e arka e Devleki thodela ando pero, 7daraile but ta phende:
¡O Del avilo ando pero katar e israelitura! ¡Tesko amenge soke nikada ni avilape gia maskar amende! 8¡Ioi! ¿Ko ka braduil amen katar gala dela zurale? ¡Gala si e dela kai zatrisarde e ejipsionen po pusto! 9¡Len tumenge zor filisteura, na daran. Te na cherdon sluge e israelitonenge sargo von kai sea tumare sluge. Llan te maren tumen lenchar!
10Ta e filisteura mardepe e israelitonenchar ta dobisarde len. Ta e israelitura nasle kai pe chare. E filisteura mundarde tranda milie boñikonen katar o Israel. 11Ondaka e filisteura lie e arka e Devleki ta mundarde e Ofnie ta e Fineese kai sea e chave e Elieke. 12A iek lleno katar e vicha e Benjamineki naslo katar o maripe, ta isto ande gua llive avilo ando Silo. Leke patave sea sa pharrade ta chudela chik pe po soro. 13Kana gua lleno avilo, o Eli saia besindo pe iek estolicha kai saia pasa o udar, ta arakhela o drom soke darala but pala e arka e Devleki. Ondaka o lleno avilo ando foro ta phenda saurrenge so avilape, ta saurre thodepe te urkin. 14Ta o Eli asunda o urkipe, ta puchla:
¿Soke e llene gachin urkin?
Ta o lleno kai avilo te phenel so avilape, prastia kai o Eli ta phenda leke so nakhla.
15O Eli sea leke iniavardes ta ojto burs, ta nasuailo katar pe akha ta korrailo. 16O lleno kai avilo te phenel so nakhla phenda:
Naslem katar o maripe ta prastiem karinga.
O Eli puchla le:
¿So nakhla chavea?
17Ta o lleno phenda e Elieke:
E israelitura nasle katar e filisteura. Ando maripe mule but israelitura, che chave o Ofni ta o Finees i von mule. Ta na samo gua, soke e filisteura lie e arka e Devleki.
18Samo kana o lleno phenda kai e arka e Devleki lie la e filisterura, o Eli pelotar palpale pasa o udar ta phagla pi korr ta mulo, soke saia but pharo pala leko phuripe. O Eli saia krisari ando Israel saranda burs. 19Ta e rromi katar o Finees kai saia khamni, kana llangla kai e filisteura lie e arka e Devleki, ta kai lako sastro ta lako rrom mule, avile lake e dukha te bianel ta maladila lake. 20Kana e diskinie kai pomozina la te bianel dikhle kai voi lela te merel, phende lake:
Na dara, soke biandilo chuke iek minono.
A voi ni thoda lenge sama. 21Ta voi thoda e minoneko anav Ikabod, soke phenda:
¡Lie o baripe katar o Israel!
Voi phenela gua pala e arka e Devleki kai liela e filisteura, ta soke mulo lako rrom ta lako sastro. 22Mapalal phenda:
¡Lie o baripe katar o Israel, soke lie e arka e Devleki!
Currently Selected:
1 Samuel 4: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
