1 Samuel 17
17
O David mundarel e Goliate
1E filisteura avile te marenpe ta chidinaile ando Soko kai si ande phuv katar o Juda, ta logle maskar o Soko ta e Azeka, ando Efes Damim. 2O Saul ta e murusa katar o Israel chidinaile ande bari umal katar e Ela, ta lachardepe te marenpe e filisteonenchar. 3E filisteura sea pe iek burdo ta e israelitura pe aver burdo, ta maskar lende saia iek bari umal. 4Ondaka katar o pero katar e filisteura likisto iek boñiko kai ikhardola Goliat kai saia katar o foro o Gat. O Goliat saia but baro, soke sea le trin pole llik upre, 5ta saia pe leko soro iek challi cherdi katar o tuch. Pe leki esnaga iek kora tuchni kai phariavela pinda ta efta kile, 6a leke porrne sea ucharde ande kotora tuchne, ta pe po dumo inllarela iek jarni cherdo katar o tuch. 7E rig kai jiravel o jarni saia sargo o kas kai ulin pe lete o chiti. O sastri kai saia ando jarni phariavela sov kile ta leko sluga llala angla lete. 8Ta o Goliat thodape pe porrne te urkil e boñikonenge katar o Israel ta phenela:
¿Soke lachardilen te marenpe? ¿Ni sem me o Goliat a tumen e sluge katar o Saul? Esvirin iekhe llene tumendar te avel mande te marelpe manchar. 9Te dobila man, amen ka ava tumare sluge. A me te dobiva le, tumen ka aven amare sluge. 10Ta i phenda:
Me ikharav e boñikonen katar o Israel:
¡Te avel mande iek lleno tumendar te marelpe manchar!
11Kana o Saul ta sa o foro katar o Israel asunde so phenela o filisteo, daraile but.
12Saia iek lleno ando Belen katar o Juda kai ikhardola Isai, ta ando vreme kana gazdarila o Saul o Isai saia but phuro, ta sea le ojto chave. Iek lendar saia o David. 13Ta o Eliab, o Abinadab ta o Sama, kai sea e mai purane chave katar o Isai, llele e Saulea te marenpe e filisteonenchar. 14Sar o David saia o mai terno, ogola trin mai purane llele e Saulea. 15A o David llala ta avela katar o pero e Sauleko, ta irilape ando Belen te arakhel pe dadeke bakren.
16Ta o filisteo avilo saranda llivesa te kusel e israelen. Avela thiarinako ta kana perela e riat.
17Iek llive o Isai phenda e Davideke:
Inllar akana bis ki le lliu peko ta des marrne che phlalenge kai si ando pero, 18ta ka inllare gala des chirala e gazdake katar e milia boñikura. Dik sar si che phlal ta an mange fiso lengo.
19Ta o Saul, e phlal katar o David, ta sa e israelitura sea ande bari umal katar e Ela ta marenape e filisteonenchar.
20Thiarinako rano o David ustilo, mukla pe bakren te arakhel len aver lleno, ta llelo po drom e ezgodenchar kai diaia le o Isai. Ta avilo ando pero kana e boñikura lachardile te marenpe ta urkina o urkipe marimako. 21Ta lachardile te marenpe e boñikura katar o Israel ta i e filisteura. Ta thodepe e boñikura katar o Israel angla e boñikura filisteura. 22Ondaka o David mukla so andaia ande va katar o lleno kai arakhela e ezgode marimake, ta prastia kai sea e boñikura te puchel len sar sea leke phlal. 23Ta kana dela orba lenchar, o filisteo o Goliat katar o Gat likisto te ikharel e israelen te marenpe lea sar cherelale suako drom. Ta o David asunda le.
24Ta sa e murusa katar o Israel kana dikhena gole llene, darana ta nasena letar. 25Ta phenena: ¿Dikhen sar likisto gua lleno? ¡Avel samo te del amen joli! Fiko te dobil le, o charo ka del le but barvalipe. Ka del le pe chea ta ni ka mangel ios katar leki familia te pochinen e love kai si te den.
26Ondaka o David phenda e llenenge kai sea lea:
¿So ka den e llene kai ka dobil gole filisteo te lel o lallao katar o Israel, soke ko si gava filisteo kai blagosil avere delen te del joli e boñikonen katar o Del o llundo?
27Ta o foro phenda isto gala alava:
Gia ka cheren e lleneke kai ka mundarel e Goliate. 28Ta o phlal mai purano katar o David kai ikhardola Eliab jolailo e Davidea kana asunda le, ta phenda leke:
¿Soke avilan karinga? ¿Kate muklan e bakren kai inai but? Me llanav soke avilan. Tu avilan samo te dikhe o maripe, soke andar o bilachipe katar cho lio avilan.
29O David phenda:
¿A so cherdem me? ¿Nasti dav orba?
30Ta llelo kai aver llene te puchel pale isto gua. Ta sa phenena leke isto gola alava. 31Ta so phenela o David, asundele nesave llene, ta llele kai o Saul te phenen le leke. Ta o Saul ikharda le. 32Ta o David phenda e Sauleke:
Na daran letar. Cho sluga ka llal te marelpe e filisteoia.
33Ta o Saul phenda e Davideke:
Tu nasti lla te mareto e filisteoia, soke tu san chaurro ta vou si murus marimako sar kana saia terno. 34Ta o David phenda e Sauleke:
Kana me kai sem cho sluga, sema chobano me dadeko ta avela iek liono o iek melledo, ta lela iek bakro katar e stoka, 35me marava le ta katar leko mui lava o bakro, a te dela pe ma, me istarava le katar leki falka ta mundarava le. 36Cho sluga mundarda e liono ta e melledo. Ta gua filisteo kai blagosil avere delen ka avel sargo o liono ta o melledo, soke kusla e boñikonen katar o Del o llundo. 37O Del kai braduisarda man katar o liono ta katar o melledo, ka braduil man katar gava filisteo. Ta o Saul phenda leke:
Lla akana, o Del te llal tuia.
38Ta o Saul cherda te thoven po David leke patave ta te thoven pe leko soro iek challi cherdi katar o tuch, ta te ucharen le iekhe koraia tuchni. 39Ta o David thoda o jarni pe po kavisi ta nasti phirela soke ni saia sikado te llal gale patavenchar. Ta o David phenda e Sauleke:
Nasti phirav soke ni sem sikado te phirav gale patavenchar. Ta o David ikanda petar gala patave.
40Ta lia pi rovli ande po va ta katar e len ikanda panch barra, ta thoda len ande pi anbava. Lia pi onda, ta llelo kai o filisteo. 41O filisteo avela polokorre kai o David ta angla le avela leko sluga. 42Ta kana o filisteo dikhla e Davide terno, leke bal sargo lole, ta chaurro sukar, mislisailo letar kai ni molale niso. 43Ta phenda e Davideke:
¿So sem me, iek llukel te ave mande e kastenchar? Ta dia armaia e Davide ande anava katar pe dela.
44Ta i phenda e Davideke:
¡Aide karinga soke me ka dav cho mas te jan le e chiriklia e milosoke ta e zivirinie katar o vos!
45A o David phenda leke:
Tu ave te mareto manchar e jarniea ta e churiaia, a me avav ta marav man tuia ando anav e Devleko kai si le sa e zor, o Del e boñikonengo katar o Israel kai tu joliardan. 46Allive o Del ka thovel tut ande me va, ta me ka mundarav tut ta ka chinav chi kor, ta e esnage mule katar e boñikura filisteura ka dav len e chiriklienge katar o miloso ta e zivirinienge katar e phuv te jan len. Ta ande sa e phuvia ka llanen kai ando Israel si o Del, 47ta sa e llene kai si chidine kate ka llanen kai o Del ni braduil e jarnienchar ni e churienchar, soke o Del si gazda ando maripe, ta vou ka cherel te aven tumen ande amare va.
48Ta kana o filisteo ustilo te marelpe e Davidea, o David prastia te marelpe e filisteoia. 49Ta o David ikanda katar pi anbava iek barr ta chudia le e ondaia, ta chalada ando chikat e filisteoko ta o barr achilo thodo ande leko chikat, ta o filisteo pelotar e moia pe phuv. 50Ta o David dobisarda e filisteo e ondaia ta e barrea. Ranisarda e filisteo ta mundarda le, ta ni saia ande Davideko va jarni. 51Ta o David prastia kai o filisteo ta thodape upral pe lete, lia leko jarni ta chinda leko soro. Ta kana e filisteura dikhle kai lengo mai zuralo boñiko mulo, nasle.
52Ondaka e llene katar o Israel ta o Juda urkisarde urkipe marimako, ta prastie palal pala e filisteura llik kai e bari umal, ta llik e udara katar o foro o Ekron. Ta e filisteura peletar ranime po drom katar o Saarim llik kai o foro o Gat ta o foro o Ekron.
53Ta irisaile e boñikura katar o Israel, ta lie sa e ezgode katar o pero e filistenengo. 54Ta o David lia o soro katar o filisteo ta anda le ando Jerusalem, a leke ezgode marimake mukla len ande pi chara.
55Ta kana o Saul dikhla e Davide kai llala te marelpe e filisteoia, puchla e Abnere o gazda katar e boñikura:
Abner, ¿kako si gava chaurro? Ta o Abner phenda:
56Jav chuke sovel mo charo kai ni llanav.
Ta o charo phenda:
Lla ta puch kako chaurro si vou.
57Ta kana o David mundarda e filisteo ta irilape, o Abner inllarda le kai o Saul, ta o David anela o soro katar o filisteo ande po va. 58Ta o Saul puchla le:
Phen mange bre chaurrea ¿kako chaurro san tu? Ta o David phenda leke:
Me sem che slugako e Isaieko katar o Belen.
Currently Selected:
1 Samuel 17: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
