1 Samuel 18
18
O Jonatan ta o David
1Mapalal kana o David dia orba e Saulea, o Jonatan volisarda e Davide sargo isto vou pe. 2Ta o Saul sar kotar ni mukla e Davide te irilpe kai pe dadeko cher. 3Ta o Jonatan ta o David achile pe iek orba, soke o Jonatan volila le but. 4Ta o Jonatan ikanda petar po gertachi, ta dia le e Davideke. Ta i dia le po jarni, po arko, ta po kavisi.
5Ta o David llala kaigo bichalela le o Saul, ta cherela sa so phenela leke. Goleke o Saul thoda le gazda katar e boñikura, ta gua pela drago e foroke ta e slugenge katar o Saul.
O Saul joliaol po David
6Kana irisaile e boñikura katar o maripe e filisteonenchar, mapalal kana o David mundarda e filisteo, likiste katar sa e forura katar o Israel e diskinie llilabindo ta chelindo ta basalena o pandero ta e ezgode kai basaldon, te sai len e Saule. 7Ta e diskinie llilabena ta chelena, ta phenena:
O Saul mundarda milia murusen,
a o David des milie murusen.#1 S 21.11; 29.5.
8Ta o Saul jolailo but kana asunda so urkina e diskinie, ta phenda:
Phenen kai o David mundarda des milie murusen, a mandar phenen kai me samo mundardem milie murusen. Akana ka mangen te thoven le charo.
9Sar kotar o Saul dikhela e Davide jolinaia.
10Thiarinako, iek duo bilacho kai avela katar o Del avilo po Saul ta o Saul llala sargo dilo ande po cher. A o David basalela e arpa gia sar cherela le suako drom, ta ande Sauleko va saia iek lansa. 11Ta chudia e lansa ando David te kafrol le po zido. A o David miskosailo dui droma te na jiravel le.
12O Saul darala katar o David soke llanela kai o Del arakhela e Davide ta kai muklaia e Saule. 13Goleke o Saul durilo katar o David, ta thoda le gazda katar milia boñikura. Ta o David llala anglal katar e boñikura kana likena po maripe ta i kana avena katar o maripe. 14Ta o David sa cherela le bizaimaia, ta o Del pomozina le ande sa. 15Ta o Saul kana dikhla kai sa so cherela o David cherela le sukar, darailo letar. 16Ta o foro katar o Israel ta o Juda volina e Davide, soke vou llala angal kana likena po maripe.
17Iek drom o Saul phenda e Davideke:
Me ka dav tut me chea e Meraba kai si mi chorri e mai purani, samo te avea iek boñiko tromano ta te marea tut o maripe e Devleko. Soke o Saul mislila gia:
Me ni ka mundarav le, e filisteura ka mundaren le.
18A o David phenda e Sauleke:
¿Ko sem me? ¿So si murni familia maskar e viche katar o Israel te avav me o llamutro e charoko?
19A kana avilo o vreme kana e Merab, e chorri e Sauleki saia te den la pala o David, die la pala o Adriel katar o foro o Mejola. 20A e Mikal, kai saia aver chorri e Sauleki, volila e Davide. Ta kana phende le e Sauleke, o Saul veselisailo but, 21soke o Saul mislisailo kai te del la pala o David, voi ka cherel te perel o David ande va e filisteonenge. Ta o Saul pale o duito phenda e Davideke:
Akana ka ave mo llamutro.
22Ta o Saul phenda pe slugenge:
Den tumen orba e Davidea po chorial ta phenen leke kai me, o charo, voliv le but ta kai sa me sluge cheren but pala le, ta kai vou morabi te avel mo llamutro.
23E sluge e Sauleke llele te phenen e Davideke sa gala ezgode, a o David phenda lenge:
¿So mislin tumen kai me sai avav o llamutro e charoko kana sem chorro ta sem sargo niso?
24Ta e sluge llele kai o Saul ta phende leke so mislila o David. 25Ta o Saul phenda lenge:
Llan kai o David ta phenen leke kai o charo ni kamel te pochinen e boria. So mangel vou si stotina morcha katar e sirkunsision e filisteonengi, te ikanel pi duk pe dusmanura e charoke. A o Saul mangela te perel o David ande va e filisteonenge.
26Kana e sluge phende e Davideke gale alava, o David mislisailo kai saia sukar so mangela o charo, te sai avel leko llamutro. Ta mai anglal te nakhel o vreme te zinilpe, 27o David llelo pe boñikonenchar ta mundarda dui stotine filisteonen, ta anda kai o charo e morcha katar sirkunsision, te sai avel leko llamutro. Ondaka o Saul dia pe chea e Mikala e Davide.
28A kana o Saul dikhla kai o Del arakhela e Davide, ta kai leki chorri e Mikal volila le, 29ios mai but darala katar o David, ta o Saul saia o dusmano katar o David sa po zivoto. 30Ta likiste te marenpe e gazda katar e filisteura, ta suako drom o David dobila len mai but neko so dobina e boñikura katar o Saul, goleke o anav e Davideko cherdilo but llanglo.
Currently Selected:
1 Samuel 18: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
