1 Samuel 16

O David si thodo charo

1O Del phenda e Samueleke:

¿Gachin ios ka rove pala o Saul kana me chudiem le te na avel o charo ando Israel? Pher chi sing zeitino ta aide. Ka bichalav tut kai o Isai katar o Belen, soke maskar leke chave esvirisardem iekhe llene te avel o charo.

2A o Samuel puchla:

¿A sar ka llav? Te llanel le o Saul, ka mundarel man. Ta o Del phenda leke:

Le chuke iek telcha#16.2 Telcha si iek guruborri minoni. ta phen kai lla te chere mange iek kurbano. 3Ka ikhare e Isaie po kurbano ta me ka phenav chuke so morabi te chere. Ka thove o zeitino po lleno kai me ka phenav chuke.

4O Samuel cherda so phenda leke o Del. Kana avilo ando Belen e phure katar o foro likiste daraia te maladon lea, ta puchle le:

¿Avilan ande pas?

5Ta o Samuel phenda lenge:

Ea, me avav te cherav iek kurbano e Devleke. Suako tumendar te chistolpe te sai llal manchar po kurbano. Mapalal chistosarda e Isaie, leke chaven, ta ikharda len po kurbano.

6Ta kana von avile, o Samuel dikhla e Eliabe ta mislisailo:

Chachipe si kai gava si o lleno kai o Del esvirisarda te avel o charo.#16.6 Ande gua vreme thovena o zeitino po lleno kai saia te avel charo.

7Ta o Del phenda e Samueleke:

Na dik le sar dikhol ta kai si baro, soke gole llene ni esvirisardem. O manus dikhel samo so si angla leke akha, a o Del dikhel so si ande leko lio.

8Ondaka o Isai ikharda e Abinadabe ta anda le kai o Samuel. A o Samuel phenda:

Ni gole llene ni esvirisarda o Del.

9Mapalal o Isai anda e Samae. Ta o Samuel phenda:

Ni gole ni esvirisarda o Del.

10Ta o Isai anda pe efta chaven angla o Samuel. A o Samuel phenda e Jeseke kai o Del ni esvirisarda ni iekhe lendar. 11Ta o Samuel puchla e Jesee:

¿Inai tut ios chave? Ta o Isai phenda leke:

Achel man iek ios, o mai terno kai inai kate soke arakhel e bakren. Ta o Samuel phenda:

Lla ta ikhar le, soke ni ka chera o kurbano lligo ni ka avel vou.

12O Isai bichalda te ikharen le ta ande le. Ta o chaurro saia but sukar, leke bal sea sargo lole ta but sukar leke akha. Ta o Del phenda e Samueleke:

Uste, ta thov pe lete o zeitino soke vou si.

13Ta o Samuel lia e sing e zeitinoki ta thoda o zeitino po David maskar leke phlal. Sar kotar angle o duo e Devleko avilo po David. Ta o Samuel irisailo kai po cher ande Rama.

O David radil e Sauleke

14Ta o duo e Devleko mukla e Saule. Ta iek duo bilacho kai avela e Devletar patila le. 15Ondaka e sluge katar o Saul phende leke:

Dik, iek duo bilacho kai avel e Devletar patil tut. 16Goleke bichal che slugen te roden iekhe llene kai llanel te basalel e arpa, gia kana ka avel pale pe tute o duo bilacho katar o Del, gua lleno ka basalel chuke e arpa ta ka ache esmiro.

17Ta o Saul phenda pe slugenge:

Roden iekhe llene kai llanel te basalel sukar ta anen le karinga. 18Ondaka iek katar e sluge phenda:

Me dikhlem kai iek katar e chave e Jeseke kai zivil ando Belen llanel te basalel but sukar e arpa. Gua chavo si boñiko but tromano, del orba bizaimaia. Vou si sukar ta o Del si lea.

19Ta o Saul bichalda llenen kai o Isai te phenen leke gia:

Bichal mange che chave e Davide, gua kai arakhel e bakren. 20Ta o Isai thoda pe iek magarcho, marrno, iek morchi moliaki, iek busnorro ta bichalda len e Davidea kai o Saul. 21Gia o David avilo kai o Saul ta achilo te radil leke. Ta o Saul volisarda le but, ta thoda le te arakhel leke ezgode marimake. 22Ta o Saul bichalda llenen te phenen e Jeseke gia:

Me moliv man chuke te muke e Davide mande, soke sem veselo kai vou si manchar. 23Ta kana o duo bilacho avela katar o Del po Saul, o David lela e arpa ta basalela, ta o Saul achela sasto, ta mukela le o duo bilacho.

Currently Selected:

1 Samuel 16: BACHRO

Highlight

Copy

Compare