1 Samuel 15

O Del joliaol po Saul

1Iek llive o Samuel phenda e Sauleke:

O Del bichalda man te thovav tut charo po Israel, kai si leko foro. Goleke asun o alav e Devleko.#1 S 10.1.

2Gia phenel o Del kai si le sa e zor:

Me ka dukhavav e amalekitonen pala so cherde e Israeleke kana avela katar o Ejipto.#Ek 17.8-14; Dt 25.17-19. 3Lla akana ta mar len, zatrisar sa so si len, te na avel chuke zalba lendar. Mundar e murusen, e diskinien, e minonen, ta i golen kai pien chuchi. Mundar lenge guruven, lenge bakren, ta lenge magarchen.

4O Saul chidia e foro ta llinda len ando Telaim. Von sea dui stotine milie boñikura ta des milie murusa katar o Juda. 5Mapalal o Saul avilo ando foro katar o Amalek ta thodape pasa iek pai. 6Ta o Saul phenda e kenitonenge:

¡Llantar tumen katar! ¡Liken katar e amalekitura, te na zatriv i tumen. Soke tumen sena lache e israelitonenchar kana von avena katar o Ejipto! Ta e kenitura fuladile katar e amalekitura.

7Ta o Saul mardape e amalekitonenchar ando Javila, po drom katar o Chur pasa o Ejipto, ta dobisarda len. 8Ta o Saul phangla e charo katar o Amalek kai ikhardola Agag, ta mundarda sa e llenen katar o foro e jarniea. 9A o Saul ta e boñikura mukle llundo e Agage ta ni mundarde e mai lache bakren, e mai lache guruven, e guruvorren mai thule, e busnien, ta ni zatrisarde e ezgode sukar, a zatrisarde sa e ezgode kai ni mola len but.

10Ondaka o Del dia orba e Samuelea ta phenda leke:

11Keime sem kai thodem e Saule charo, soke durilo mandar ta ni cherda murni volia. Ta o Samuel jolailo but, ta sorro riat molisailo e Devleke.

12Thiarinako rano o Samuel llelo te del orba e Saulea, ta phende e Samueleke kai o Saul aviloa ando Karmel, ta kai chidiaia barra pe iek than te denpe golli letar. Ta o Samuel llelo angle po drom kai llal ando Gilgal. 13Ta o Samuel avilo kai o Saul, ta o Saul phenda leke:

Balgosime san e Devletar. Me cherdem e volia e Devleki.

14Ondaka o Samuel phenda:

¿Katar likiste sa gala bakre ta sa gala guruva?

15Ta o Saul phenda:

Ande len katar o Amalek, soke e llene gurude e mai lache bakre ta e mai lache guruva te sai cheren kurbanura e Devleke, ta ogolen zatrisardem. 16Ondaka o Samuel phenda e Sauleke:

¡Dosta, soke me ka phenav chuke so phenda mange o Del ariat! ta o Saul phenda:

De orba.

17Ondaka Samuel phenda leke:

Tu mislia kai sana o mai minono angla o Del, ¿ni san tu akana o gazda katar e viche e Israeleke ta o Del thoda tut charo ando Israel?

18Ta o Del bichalda tut te zatri e amalekitonen kai si bilache, te mundare len lligo ni ka achel lendar ni iek. 19¿Soke ni cherdan e volia e Devleki ta lian e mai lache zivirinie katar e amalekitura, ta gia cherdan o bilachipe angla o Del?

20Ta o Saul phenda e Samueleke:

Me cherdem e volia e Devleki ta cherdem sa so phenda mange kai saia te cherav, andem e Agage kai si o charo katar o Amalek ta zatrisardem e amalekitonen. 21A e boñikura lie e mai lache bakren ta guruven. E mai sukar ezgode kai saia te zatri len, lie len te sai cheren kurbanura che Devleke ando Gilgal.

22Ondaka o Samuel phenda:

Mai but drago si e Devleke te cheren leki volia,

neko te cheren leke kurbanura,

ta te den le ezgode dine.

Mai lache si te asunen le, ta te cheren leki volia

ta te cheren so phenel vou,

neko e kurbanura katar e khoi e bakrengi.#Sal 40.6; Pr 21.3; Os 6.6; Am 5.22-24.

23Cherel o bilachipe o lleno kai ni asunel le

sargo o lleno kai cherel chirimate.

Sargo o lleno kai blagosil avere delen

si o lleno kai ni kandel le.

A tu, sar ni cherdan leki volia

vou chudel tut te na ave charo.

24Ondaka o Saul phenda e Samueleke:

Ea, cherdem o bilachipe angla o Del ta ni cherdem leki volia, soke darailem e forotar ta cherdem so mangena. 25Me moliv man chuke te prosti man ta aide manchar te blagosiv e Devle.

26Ta o Samuel phenda e Sauleke:

Ni llav tuia, soke ni kandian e Devle, ta akana vou chudel tut te na ave charo.

27Ta kana llalatar o Samuel, o Saul istarda le katar leko gertachi, ta o gertachi pharradilo. 28Ondaka o Samuel phenda e Sauleke:

Isto gia, o Del allive pharrada cho gazdaripe ando Israel, ta dia le iekhe lleneneke katar cho foro mai lacho neko tu. 29Soke o Del, kai si e dragostia katar o Israel, ni kojavel ta ni keilpe. Soke vou inai lleno te keilpe.

30Ta o Saul pale phenda:

Cherdem o bilachipe. A mangav tutar te na muke te de man pachiv angla mo foro ta angla o Israel, ta aide manchar te blagosi che Devle.

31Ta o Samuel irisailo e Saulea, ta o Saul blagosisarda e Devle. 32Mapalal o Samuel phenda:

Anen mange karinga e Agage kai si o charo katar o Amalek. Ta o Agag avilo lete veselo soke mislila kai ni ka merel.

33Ta o Samuel phenda leke:

Isto gia sar cho jarni mukla diskinien bi chavenge, chi dei ka achel bi chaveki maskar e diskinie. Ondaka o Samuel chinda pe kotora e Agage angla o Del ando Gilgal.

34Ta o Samuel llelotar ando Rama, ta o Saul llelotar kai po cher ando Gabaa. 35Ta nikada ios o Samuel dikhla e Saule. Ta o Samuel rovela pala o Saul, ta o Del keisailo soke thodaia e Saule charo ando Israel.

Currently Selected:

1 Samuel 15: BACHRO

Highlight

Copy

Compare