1 Samuel 14
14
O maripe katar o Jonatan
1Iek llive o Jonatan chavo e Sauleko, phenda pe slugake kai anela e ezgode marimake:
Aide pe ogoia rig katar o pai te mara amen e filisteonenchar.
Ta ni phenda le pe dadeke.
2Ta o Saul saia po than mai dur katar o burdo Gabaa, telal katar o kas kai si ando Migron. E llene kai sea lea sea preko sov stotine murusa. 3Ta o lleno kai inllarela o efod saia o Ajias chavo katar o Ajitub phlal katar o Ikabod chavo katar o Finees, unuko katar o Eli. Ta o foro ni llanela kai o Jonatan lleloiatar.
4Ta maskar e burdura kai o Jonatan mangela te nakhel karing o pero katar e filisteura sea dui pechine bare. Iekha ikharena la Boses, ta ogoia ikharena la Sene. 5Iek pechina saia karing o norte angla o Mikmas, a ogoia saia karing o sur angla o Gabaa. 6Ta o Jonatan phenda pe slugake:
Aide pe ogoia rig kote kai si o pero katar e llene kai blagosin avere delen. Sai avelpe kai o Del ka pomozil amen, soke leke inai trudno te braduil bute llenenchar o gachinone llenenchar.
7Ta leko sluga phenda e Jonataneke:
Cher sogo kamea kai me ka pomoziv tut.
8Ondaka o Jonatan phenda:
Aide te nakha pe ogoia rig te sai dikhen amen.
9Te phenena amenge gia:
Achen kote lligo ni ka ava amen. Ni ka lla lende ta ka acha isto kote. 10A te phenena amenge gia:
Aven karinga, ondaka ka lla lende soke gua si kai o Del ka cherel te dobi len.
11Ondaka o Jonatan ta leko sluga cherde te dikhon, ta e filisteura phende:
Dikhen sar e ebreura liken katar e pechine kai guruduna. 12Ta urkisarde e Jonataneke ta e slugake:
¡Aven karinga soke ka phena tumenge iek ezgoda!
Ondaka o Jonatan phenda pe slugake:
Aide, soke o Del ka cherel te dobin len o Israel.
13Ta o Jonatan likisto upral po burdo pe vastenchar ta pe porrnenchar, palal avela leko sluga. E filisteura kai perena angla o Jonatan, o sluga mundarela len. 14Kote o Jonatan ta leko sluga mundarde bis murusenpe iek than minono. 15Ando pero katar e filisteura ta avri letar peli iek bari dar. Ta sa e boñikura ta i gola kai prezona daraile. E phuv dermosaili, goleke ios mai but darana.
16Ta e boñikura kai sea e Saulea dikhle katar o burdo o Benjamin sar e filisteura sea ande bari burkania ta prastena pe suako rig. 17Ondaka o Saul phenda e llenenge kai sea lea:
Llinen amare boñikonen te dikha ko amendar llelotar. Llinde e boñikonen ta dikhle kai o Jonatan ta leko sluga ni sea lenchar.
18Ondaka o Saul phenda e Ajiaseke:
An mange e arka e Devleki, soke ande gua vreme e arka e Devleki saia kai e israelitura.
19Ta kana o Saul dela orba e popea, e burkania maskar e filisteura cherdili ios mai bari. Ta o Saul phenda e popoke:
Achi, na an la.
20Ta o Saul chidia sa e foro ta llele te marenpe e filisteonenchar. Pala e burkania kai saia e filisteura mundarenape maskar pete e jarnienchar. 21Ta e ebreura kai zivina but vreme maskar e filisteura, ta kai avilea ando pero katar e filisteura, thodepe e Saulea ta e Jonatanea te marenpe e filisteonenchar. 22Ta e llene katar o Israel kai sea gurudine po burdo o Efrain, kana asunde kai e filisteura naslea, i von likiste te marenpe e filisteonenchar. 23Gia gua llive o Del braduisarda e Israele, ta o maripe reslo llik kai o Bet Aven.
O Saul jal sovel
24Gua llive e llene katar o Israel sea but chinie soke niko ni jalaia niso pala e sovel kai jalaia o Saul kana phenda:
Vareko te jala fiso mai anglal te perel o kham, o mai anglal te dobiva me dusmanonen, proketo te avel. Goleke niko ando foro ni jala marrno. 25Ta sa o foro avilo ando iek vos. Kote saia aullin pe phuv. 26Kana dikhle o aullin kai llala sargo pai niko ni jala niso, soke darana katar e sovel kai jalaia o Saul. 27O Jonatan ni asundaia niso katar e sovel, goleke e kastea kai anela lia kotor aullin, jala ta bristosaile leke akha. 28Ondaka iek lleno phenda e Jonataneke:
Cho dad cherda te jal sovel o foro ta phenda kai kogo jala vareso allive ka avel proketo. Goleke o foro ni saia len zor bokhatar.
29O Jonatan phenda:
Mo dad cherel te diliaol o foro. Dik sar bristosaile me akha soke jalem cherricha aullin. 30¿Ni avela zuralo o foro te jala allive so lia katar pe dusmanura? ¿Ni avela e zatrania maskar e filisteura ios mai bari?
31Gua llive e israelitura dobisarde e filisteonen katar o Mikmas llik kai o Aialon. A o foro saia but chinio. 32Ta o foro llelo te jal katar so lie katar e filisteura. Ta lie bakren, guruven ta guruvorren. Ta mundarde len pe phuv ta jale len e ratea. 33Ta nesave llene llele te phenen e Sauleke:
O foro cherel o bilachipe angla o Del, soke jan mas e ratea.
Ta o Saul phenda lenge:
¡Tumen sen dusmanura! Anen mange iek pechina bari.#Jen 9.4; Lv 7.26-27; 17.10-14; 19.26; Dt 12.16,23; 15.23.
34Ta i phenda o Saul:
Llan kai suako lleno katar o foro te phenel lenge te anel suako lleno po guruv ta po bakro te mundarel len kate. Ta na jan o mas e ratea soke gua si iek bilachipe angla o Del.
Ta isto goia riat suako lleno katar o foro anda po guruv ta mundarda le kote.
35Ta o Saul vazdia iek altar e Devleke. Gava saia o purvo altar kai o Saul vazdia e Devleke. 36Ta o Saul phenda:
Aide orachaia te mara amen e filisteonenchar, ta ka la lenge ezgode llik kai e thiarin, ta ka mundara saurren. Ta saurre phende:
Cher sogo kamea.
A o popo phenda:
Mai anglal si te pucha e Devle.
37Ondaka o Saul puchla e Devle:
¿Morabi te llav kai e filisteura? ¿Ka de len ande va katar e israelitura?
A o Del ni phenda leke niso gua llive.
38Ta o Saul phenda:
Aven karinga sa e gazda katar e boñikura te dikhen ko cherda gava bilachipe allive, 39soke jav sovel ando anav e Devleko katar o Israel, i te avela mo chaurro o Jonatan kai cherda o bilachipe, ka merel.
Ta niko ando foro ni phenda leke niso.
40Mapalal phenda sa e llenenge katar o Israel:
Thoven tumen pe goia rig. A me ta mo chaurro o Jonatan ka thova amen pe gaia rig.
E boñikura phende leke:
Cher sogo kamea.
41Ta o Saul phenda e Devleke:
Phen amenge Devla, ko ka achel.
Ta achile o Jonatan ta o Saul, ta o foro likisto braduime.#Nm 27.21; 1 S 28.6. 42Ta o Saul phenda:
Dikhen akana ko ka achel maskar mo chaurro o Jonatan, ta me.
Ta achilo o Jonatan.
43Ondaka o Saul phenda e Jonataneke:
Phen mange so cherdan.
Ta o Jonatan phenda e Sauleke:
De istina si kai ikandem cherricha aullin e kastea kai anava, ta jalem, ¿ta pala gua ka merav?
44Ta o Saul phenda leke:
¡Te dukhavel man zurale o Del te na mundarava tut, Jonatan!
45Ta o foro phenda e Sauleke:
¡Sar ka merel o Jonatan kana cherda te dobil o Israel! Ni ka avelpe gia. Te na del o Del te perel pe phuv ni iek bal e Jonataneko, soke so cherda allive, cherda le e Devlea.
Gua llive o foro ni mukla te merel o Jonatan.
46Ta o Saul mukla e filisteonen, ta e filisteura irisaile kai pi phuv.
47Kana o Saul cherdilo baro charo ando Israel, mardape pe dusmanonenchar kai sea truial:
E forura katar o Moab, o Amon, ta o Edom. Ta i mardape e charonenchar katar e phuv kai ikhardol Soba, ta mardape e filisteonenchar. Ta kaigo llala o Saul te marelpe, dobila. 48Ta o Saul chidia boñikonen ta dobisarda e Amaleke, ta braduisarda e Israele katar e chorane.
49Ta e chave katar o Saul sea o Jonatan, o Isui ta o Malkisua. Ta e anava katar leke chorra sea Merab, kai saia e mai purani, ta e Mikal kai saia e mai terni. 50Ta e rromi e Sauleki saia e Ajinoam, kai saia e chorri katar o Ajimaaz. O gazda katar e boñikura ikhardola Abner kai saia chavo katar o Ner, a o Ner saia o kako katar o Saul. 51O dad katar o Saul saia o Kis, ta o dad katar o Abner saia o Ner kai sea chave katar o Abiel.
52Ta ande sa e llivesa katar o Saul saia baro maripe e filisteonenchar, goleke suako murus kai o Saul dikhela le zuralo, lela le te avel boñiko.
Currently Selected:
1 Samuel 14: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
