1 Relles 2
2
E alava kai mukla o David
1Ta avile e llivesa kana o David saia po meripe, ta mukla gala alava pe chaurreke e Salomonoke:
2Me llautar po drom kai sa llan pe gaia phuv. De tut zor ta lla sargo murus tromano. 3Cher e volia e Devleki, lla pe leke droma ta guruv leke alava sar si pisime ando zakono e Moiseseko, te sai llal chuke sukar pe sa so ka chere, 4te sai cherel o Del so phenda mange, kai te avena me chave orta angla le ta te avela lengo lio chacho, suako drom ka avel iek murus te besel po trono e Israeleko.#2 S 7.11-16.
5Tu llane so cherda mange o Joab chavo katar o Sarvia ta so cherda e duie gazdenge katar e boñikura katar o Israel, so cherda e Abnereke chavo katar o Ner, ta e Amasaeke chavo katar o Jeter kai mundarda len ta chordilo o rat kana ni saia ni iek maripe, ta makhilo ando rat o kavisi kai saia pe leke dume ta i leke minie.#2 S 3.27; 20.10. 6Tu cher e ezgode bizaimaia. Na muk te merel phuro ande pas. 7A tu ka ave lacho e chavenchar katar o Barzilai katar e vicha e Galaadeki, te aven pe chi sinia, soke von pomozisarde man kana me naslem katar cho phlal o Absalon.#2 S 17.27-29. 8Ta i si tuia o Simei chavo katar o Gera katar e vicha e Benjamineki katar o foro o Bajurim. Vou dia man bare armaia kana me llava karing o Majanaim. A isto vou avilo te lel man karing o Jordan, ta me jalem leke sovel ando anav e Devleko kai ni ka mundarav le e jarniea.#2 S 16.5-13; 19.16-23. 9Tu ni ka prosti le, tu san bizai ta llane so si te chere lea. Cher te avel leko meripe sa ando rat.
O meripe e Davideko
1 Kr 29.26-30
10O David mulo ta prajosarde le pasa leke dada ando limori katar leko foro. 11O David charoisarda ando Israel saranda burs. Efta burs charoisarda ando Jebron, ta tranda ta trin burs charoisarda ando Jerusalem.#2 S 5.4-5; 1 Kr 3.4. 12Ta o Salomon beslo pe Davideko trono, ta leki charoina cherdili zurali.#1 Kr 29.23.
O meripe katar o Adonias ta leke sluge
13Ondaka o Adonias chavo katar o Jagit avilo kai e Betsabe e dei e Salomonoki, ta voi phenda leke:
¿Ave ande pas? Ta o Adonias phenda lake:
Ea, avav ande pas. 14Mapalal phenda lake:
Si man te phenav chuke iek ezgoda. Ta voi phenda leke:
Phen. 15Ta o Adonias phenda:
Tu llane kai e charoina saia murni, ta sa o Israel mangela te avav me o charo. A chinade me phlale o Salomon te charoil, soke gua saia e Devletar te avel vou o charo. 16Akana mangav tutar iek sebapi, na phen mange kai iok. Ta e Betsabe phenda leke:
¿So mange?
17Me moliv man chuke te mange katar o charo o Salomon te del man e Abisage e sunamita, te avel mi rromi. Vou ni ka phenel chuke kai iok.
18Ta e Betsabe phenda leke:
Ako, me ka dav orba cheres tu e Salomonoke. 19Ondaka e Betsabe avili kai o Salomon te del e orba pala o Adonias. O charo ustilo soke avili leki dei, ta bangilo llik kai e phuv angla la. Mapalal pale beslo po trono ta phenda te anen iek estolicha te sai besel leki dei, ta voi besli pe leki rig e chachi. 20Ondaka e Betsabe phenda leke:
Cher mange iek sebapi. Na phen mange iok. Ta o charo phenda lake:
Mang sogo kamea, soke ni ka phenav chuke kai iok.
21Ta voi phenda:
De e Abisage e sunamita pala o Adonias. 22Ta o charo o Salomon phenda pe dake:
¿Soke mange e Abisage pala o Adonias? ¡Te si gia mang mandar te dav le e charoina samo soke vou si mo phlal o mai purano, ta soke o popo o Abiatar ta o Joab chavo katar o Sarvia pomozin le! 23Ondaka o charo o Salomon jala sovel ando anav e Devleko, ta phenda:
¡Te dukhavel man o Del te na pochinda o Adonias pe zivotoia pala so phenda! 24¡Jav sovel angla o Del, kai thoda man po trono e Davideko mo dad, ta kai cherda te avav charo, ta ka cherel i me porodo, kai o Adonias ka merel isto allive!
25Ondaka o charo o Salomon bichalda e Benaiase chavo katar o Joiada te mundarel e Adoniase. Ta o Benaias llelo ta mundarda le. 26Mapalal o Salomon tradia e popo e Abiatare, ta phenda leke:#2 S 15.24; 22.20-23.
¡Llatar ando Anatot, kai chi phuv! Tu morabi te mere, a ni ka mundarav tut soke inllardan e arka katar o Del o Gazda, ta soke nakhlan isto gala brige kai nakhla mo dad. 27Gia o Salomon tradia e Abiatare katar o rado e poponengo, ta gia cherdilo so phendaia o Del ando Silo katar e familia katar o Eli.#1 S 2.27-36.
28Ta gaia viasta avili kai o Joab, kai pomozila e Adoniase, a ni lleloia e Absalonea. Ta kana o Joab asunda e viasta, naslo kai e chara e Devleki, ta istardilo pe singa katar o altar#2.28 E singa katar o altar sea riga kai gurudona e llene te na mundaren le. 29Ta phende e Salomonoke kai o Joab nasloa ta kai gurudilo ande chara e Devleki pasa o altar. Ondaka o Salomon bichalda e Benaiase chavo katar o Joiada te mundarel le. 30Ta o Benaias dia andre ande chara e Devleki ta phenda e Joabeke:
O charo phenel te like. A o Joab phenda:
¡Iok! ¡Kate ka merav!
Ta o Benaias llelo kai o charo te phenel leke so phendaia o Joab.
31Ta o charo phenda:
Cher so phenda vou. Mundar le ta prajosar le, ta duriar katar me dadeko cher ta i mandar e dos katar e llene lache kai vou mundarda 32O Del ka cherel te perel pe lete sa e dos, goleke o Joab ka merel soke mundarda e jarniea duie llenen orta, e Abnere chavo katar o Ner gazda katar e boñikura katar o Israel, ta e Amase chavo katar o Jeter, gazda katar e boñikura e Judaeke. 33Lengo rat ka perel po soro e Joabeko, ta ostade pe leki familia. A e pas e Devleki ka avel ostade po David ta pe leko porodo, pe leki charoina ta pe leko trono.
34Ondaka o Benaias llelo ta mundarda e Joabe. Ta prajosarde le po pusto ande leko cher. 35Ta o charo thoda e Benaiase chavo katar o Joiada gazda e boñikonengo, ta e Sadoke thoda le po rado e poponengo, po than katar o Abiatar. 36Mapalal o charo ikharda e Simeie, ta phenda leke:
Vazde chuke iek cher ando Jerusalem te sai zivi kote. Na like kotar ta na lla ninde, 37soke te likistan ta te nakhlan o pai katar o Sedron, chachimaia ka mere ta ka avel chiri dos.
38Ta o Simei phenda e charoke:
Ako. Me ka cherav gia sar phendan le, mo glamno charo. Ta o Simei zivisarda ando Jerusalem but vreme.
39Kana nakhle trin burs, dui sluge katar o Simei nasle kai o Akis chavo katar o Maaka, o charo katar o foro Gat. Ta phende e Simeieke kai dui katar leke sluge sea ando foro o Gat. 40Ondaka o Simei llelo po magarcho kai o Akis ando foro Gat te anel leke slugen. Ta kana o Simei irilape pe slugenchar, 41o Salomon llangla kai o Simei likistoia katar o Jerusalem karing o foro o Gat, ta kai irisailo. 42Ta ikharda e Simeie, ta phenda leke:
¿Ni jalan sovel kai ni ka like katar o foro, soke te likistana chachimaia ka mere? ¿Ni phendam mange kai gia ka chere? 43¿Soke phaglan o alav kai dian e Devle, ta ni cherdan so me phendem chuke? 44Tu llane sa o bilachipe kai cherdan me dadeke e Davideke, goleke o Del cherda te perel pe cho soro sa o bilachipe kai cherdan. 45A o charo o Salomon ka avel blagosime, ta o trono e Davideko ni ka murilpe nikada soke si ostade angla o Del.
46Ondaka o charo phenda e Benaiaseke chavo katar o Joiada te mundarel e Simeie, ta o Benaias mundarda le. Gia e charoina cherdili zurali ande va e Salomonoke.
Currently Selected:
1 Relles 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
