1 Relles 1
1
O phuripe e Davideko
1Kana o charo o David saia phuro ucharena le bute patavenchar soke ni lelape letar o sil. 2Ta leke sluge phende: Roden me gazdake o charo, iekhe chea te avel e charoia te sai sovel lea ta te del le tatipe.
3Ta rodie iekhe chea sukar ande sa e phuv katar o Israel, ta malade e Abisaga e sunamita, ta ande la kai o charo. 4Ta e chorri saia sukar. Voi ucharela e charo ta radila leke, a vou nikada ni amisailo laia.
O Adonias charoil bi te llanel o David
5Ondaka o Adonias chavo katar o Jagit jolailo ta phenda kai vou ka charoil. Cherda bordona, ikharda llenen kai llan pe gra, ta pinda murusen te llan angla le.#2 S 3.4. 6O dad e Adoniaseko, nikada ni dia pe lete te phenel leke: ¿Soke chere gia? A o Adonias biandiloia mapalal katar o Absalon, ta vou saia but sukar. 7O Adonias achiloia pe iek alav e Joabea, chavo katar o Sarvia, ta e popoia o Abiatar kai pomozina e Adoniase. 8A o popo Sadok ta o Benaias chavo katar o Jodaia, o profeta o Natan, o Simei, o Rei, ta sa e llene kai uzdilape ando David, ni kamle te llan pala o Adonias.
9O Adonias cherda iek jape pasa e pechina ando Zoelet kai achel pasa o pai katar o Rogel. Mundarda bakren, guruven ta telchonen e mai thule, ta ikharda pe phlalen, e chave katar o charo, ta sa e murusa katar o Juda kai radina e charoke. 10A ni ikharda e profeta e Natane, ni e Benaiase, ni e tromanen katar o David, ta ni ikharda pe phlale e Salomone. 11Ondaka o Natan dia orba e Betsabeke, e dei katar o Salomon, ta phenda lake:
¿Ni llanglan kai o Adonias, o chavo katar o Jagit phenda kai akana vou si o charo, bi te llanel le o David amaro gazda?#2 S 12.24. 12Akana asun man ta cher so me ka phenav chuke, te sai bradui tut ta i te bradui o zivoto katar cho chavo o Salomon. 13Lla kai o charo o David ta phen leke gia: ¿Ni jalan sovel che slugake kana phendan gia:
Cho chavo o Salomon ka charoil mapalal mandar, ta vou ka besel pe mo trono? ¿A soke akana charoil o Adonias? 14Ta kana tu ka de orba e charoia, me ka dav andre palal pala tu ta ka phenav kai so phene tu si o chachipe.
15Ondaka e Betsabe dia ande soba e charoki. Ta o charo saia but phuro, ta e Abisag e sunamita radila leke. 16Ta e Betsabe dia tenemava angla o charo. Ta o charo puchla la:
¿So si chuke?
17Ta voi phenda leke:
Mo glamno gazda, tu jalan sovel che slugake ando anav e Gazdako cho Del, kai mo chavo o Salomon ka charoil mapalal tutar, ta kai vou ka besel pe cho trono. 18Ta akana o Adonias charoil, a tu mo glamno charo ni llane le. 19Mundarda bute guruven, telchonen, ta bakren. Ikharda po jape e chaven katar o charo, e popo o Abiatar, e Joabe gazda e boñikonengo. A che sluga e Salomone ni ikharda. 20Mo glamno charo, sa o foro katar o Israel aduricharel te phene ko ka besel pe cho trono mapalal tutar. 21Soke te na phendan le, kana tu ka sove che dadenchar, ka phenen kai me ta mo chavo o Salomon sam dosale.
22Ta kana voi dela orba e charoia, avilo o profeta o Natan. 23Ta phende e charoke kai avela o profeta o Natan. Ta kana o Natan avilo, dia changenchar angla o charo lligo ni dodisarda pe phuv pe chikatea, 24ta o Natan puchla le:
Mo glamno charo, ¿Tu phendan gia: o Adonias ka charoil mapalal mandar ta ka besel pe mo trono?
25Soke vou allive mundarda bute guruven, telchonen, ta bakren te cherel iek jape, ta ikharda e chaven katar o charo, e gazden katar e boñikura ta e popo o Abiatar. Ta etalen kote, jan, pien ta urkin:
¡Te zivil o charo o Adonias! 26A ni ikharda man kai sem cho sluga, ni e popo e Sadoke, ni e Benaiase chavo katar o Joiada, ni e Salomone. 27Mo glamno charo, ¿Tu cherdan te avel o Adonias o charo bi te phene le che slugenge ko saia te besel po trono mapalal tutar?
O Salomon chinado te avel o charo
28Ondaka o charo o David phenda te ikharen e Betsabea. Ta kana voi avili lete, achili pe porrne angla le. 29Ta o charo jala sovel gia:
Ando anav e Devleko kai braduisarda man katar sa e brige kai nakhlem, 30sogo jalem sovel ando anav e Devleko katar o Israel, ka cherav le isto allive. Cho chavo ka charoil mapalal mandar, ta vou ka besel pe mo trono.
31Ondaka e Betsabe dia changenchar angla o charo ta bangili llik pe phuv, ta phenda:
¡Te zivil ostade mo gazda o charo o David!
32Ta o charo phenda te ikharen e popo e Sadoke, e profeta e Natane ta e Benaiase chavo katar o Joiada. Ta von avile angla o charo. 33Ta o charo phenda:
Len tumen e slugen katar tumaro gazda, thoven me chave e Salomono pe murni magarcha, ta inllaren le ando Gijon. 34Kote o popo o Sadok ta o profeta o Natan ka thoven zeitino pe leko soro, ta ka thoven le charo katar o Israel, ta ka basalen e tuturuge ta ka urkin:
¡Te zivil o charo o Salomon! 35Mapalal tumen ka llan palal pala le, ta vou ka avel ta ka besel pe mo trono, ta ka charoil pe mo than, soke me esvirisardem le te avel vou o gazda ande phuv katar o Israel ta o Juda.
36Ondaka o Benaias chavo katar o Jodaia phenda e charoke:
¡Gia te avelpe! ¡Gia te phenel le o Del, o Del me gazdako o charo! 37Ta isto gia sar o Del si e charoia, te avel e Salomonea, ta te bariol e charoina ios mai but neko e charoina katar mo glamno gazda o David.
38Ta o popo o Sadok, o profeta o Natan, o Benaias chavo katar o Jodaia, e kereteura ta e peleteura, thode e Salomone pe magarcha katar o David ta inllarde le ando Gijon. 39Kote o popo o Sadok lia e sing e zeitinoki katar e chara e Devleki ta thoda o zeitino po Salomon. Basalde e tuturuga ta sa o foro phenda:
¡Te zivil o charo Salomon! 40Mapalal sa o foro llelo palal pala le ta llilabena prema e firura. E veselia saia gia bari kai e phuv dikhola sargo kana phagola pala lengo urkipe.
41Ta o Adonias ta e gostura kana getosarde te jan, asunde e tuturuga ta o Joab puchla:
¿Soke si gaia burkania ando foro?
42Kana o Joab dela orba, avilo o Jonatan chavo katar o popo o Abiatar, ta o Adonias phenda leke:
Nak andre, soke tu san iek lleno tromano ta ane amenge lachi viasta.
43O Jonatan phenda e Adoniaseke:
Iok, ni anav lachi viasta, soke amaro gazda o charo o David thoda te charoil e Salomone, 44ta o charo bichalda e popo e Sadoke, e profeta e Natane, e Benaiase chavo katar o Joiada, e kereteonen ta e peleteonen te llan e Salomonea. Ta von thode le pe magarcha katar o charo 45a o popo o Sadok ta o profeta o Natan thode pe leko soro o zeitino ta cherde le charo ando Gijon, mapalal irisaile kotar but vesele. Goleke ando foro si e bari burkania kai tumen asunen, 46ta i o Salomon beslo po trono katar e charoina, 47ta e sluge e charoke llele te blagosin e Davide ta te phenen leke, te bariarel o Del o anav katar o Salomon mai but neko o anav e Davideko, ta i te avel leko gazdaripe mai baro. Ta o charo pe po kerveto blagosisarda e Devle, 48ta i phenda:
Blagosime te avel o Del e Israeleko, kai allive dia iekhe llene te besel pe mo trono, ta me dikhav le.
49Ondaka e llene kai o Adonias ikharda po jape daraile but. Sa ustile, ta suako lleno llelotar kai po cher. 50O Adonias darailo katar o Salomon, ustilo ta naslo kai e chara e Devleki ta istardilo pe singa katar o altar#1.50 E singa katar o altar sea riga kai gurudona e llene te na mundaren le. 51Iek lleno llelo ta phenda e Salomoneke:
O Adonias daral katar o charo o Salomon ta istardilo pe singa katar o altar, ta phenel te jal leke sovel o Salomon kai ni ka mundarel le.
52Ta o Salomon phenda:
Te avela vou iek lleno posteno, ni iek katar leke bal ka perel pe phuv, a te avela vou bilacho, ka merel.
53Ondaka o charo o Salomon phenda te anen e Adoniase katar o altar, ta vou avilo ta dia changenchar angla o charo o Salomon. Ta o Salomon phenda leke te llaltar chere.
Currently Selected:
1 Relles 1: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
