1 Relles 3
3
O Salomon zinilpe pala e chei e Faraonoki
1Ondaka o Salomon cherdilo o llamutro katar o Faraon, o charo katar o Ejipto, soke zinisailo pala leki chorri, ta inllarda la ando foro e Davideko kana vazdena leko cher, o cher e Devleko ta o zido kai si truial katar o Jerusalem. 2Ande gua vreme o foro dela kurbanura pe thana vazdine, soke ni saia cherdo o cher e Devleko.
O Salomon mangel e Devletar bizaipe
2 Kr 1.1-13
3O Salomon volila e Devle ta cherela e volia e Davideki leko dad, samo kai dela kurbanura ta phabarela taimano pe thana vazdine, 4ta i llala ando Gabaon te del kurbanura, soke kote saia o than vazdino mai baro te den kurbano phabardo. Milia kurbanura dela o Salomon pe gua altar.
5Iek riat ando Gabaon, o Del sikadilo e Salomonoke ande sune, ta o Del phenda leke:
Mang mandar sogo kamea, ta me ka dav le chuke.
6Ta o Salomon phenda e Devleke:
Tu sana but lacho me dadea e Davidea, soke vou saia orta angla tu ta saia chacho tuia. Goleke volisardan le ta dian le iek chavo te besel pe leko trono, sar si akana. 7Tu Gazda ta Del murno, thodan man po than me dadeko, a me sem iek lleno terno kai ni llanel niso. 8Ta cho sluga si maskar cho foro kai tu esvirisardan. Iek foro baro kai nasti llindol soke si but baro. 9De che sluga iek lio bizai te sai krisil che foro, te sai llanel o lachipe ta so si o bilachipe, soke ¿Ko sai gazdaril pe gava foro chiro kai si gia baro?
10Ta pela drago e Devleke so mangla letar o Salomon, 11ta o Del phenda e Salomonoke:
Soke manglan mandar gava, ta ni manglan te zivi but bursa, ta ni manglan barvalipe ta te meren che dusmanura, a manglan bizaipe te llane sar te gazdari, 12me ka dav tut so manglan. Me ka dav tut bizaipe kai nika ni saia, ta ni ka avel aver lleno sargo tu. 13Ta i ka dav tut barvalipe ta baripe, te na avel aver charo sargo tu. 14Ta te llelan orta angla ma, ta te cherdan mi volia, te cherdan so phenen me zakonura gia sar cherda le cho dad o David, me ka cherav te zivi but bursa.
15Kana o Salomon llungadilo, dikhla kai saia iek suno. Ta kana avilo ando Jerusalem, avilo angla e arka katar o Del o Gazda ta dia kurbanura ta ezgode dine te sai avel pas. Mapalal cherda iek jape sa pe slugenge.
O Salomon, o krisari bizai
16Ande gua vreme avile dui kurvichke te dikhen e charo. Ta kana von avile angla le, 17iek lendar phenda:
¡Ioi, glamno charo! Gaia diskinia ta me zivia ande iek cher. Ta maladila mange iek minono kana voi saia manchar chere. 18Kana nakhle trin llive sar kana maladila mange, i gaia diskinia maladila lake, ta amen sama korkorre. Niko ni saia chere, samo amen. 19Iek riat o minono katar gaia diskinia mulo, soke voi inzili pe lete kana sovela. 20Ondaka voi ustili po dopas katar e riat kana me sovava, lia mo minono ta thoda le pasa pete, ta thoda e minone kai mulo pasa ma. 21Kana ustilem thiarinako rano te dav me minone te piel kolin, dikhlem kai saia mulo. A kana llivosaila thodem sama kai vou ni saia mo minono.
22Ta ogoia diskinia phenda:
Iok, o minono llundo si murno, ta o mulo si chiro. Ta ogoia diskinia phenda:
Iok, o mulo si chiro, ta o llundo si murno. Gia denape orba angla o charo.
23Ondaka o charo phenda:
Gaia phenel kai lako minono si o llundo, ta kai o mulo si katar ogoia, a ogoia phenel:
¡Iok, o llundo si murno ta o mulo si chiro! 24Ta o charo phenda:
¡Anen mange iek jarni! Ta ande leke o jarni.
25Ta o charo phenda:
Chinen e minone e llunde pe dui kotora, ta den suakone diskinia iek kotor.
26Ondaka e diskinia kai saia e dei katar o minono o llundo, phenda e charoke:
¡Mo glamno charo! ¡Na mundar, e minone! ¡Dele mai sukar late! A ogoia phenda:
¡Ni mange ni chuke! ¡Te chinen le po dopas!
27Ondaka o charo phenda:
Na mundaren e minone ta den le late, soke voi si leki dei.
28Ta sa o foro katar o Israel asunda sar krisisarda o charo, ta daraile letar soke acharde kai ande le saia bizaipe e Devleko te sai krisil.
Currently Selected:
1 Relles 3: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
