1 Kronikas 23
23
O rado katar e levitura
1Kana o David saia but phuro, thoda pe chave e Salomone charo ando Israel.#1 R 1.1-40. 2Ta chidia sa e llenen kai sea gazda katar o Israel, e poponen ta e levitonen, 3ta llinde e levitonen kai sea lenge mai but katar e tranda burs. Llinde len iek po iek ta sea tranda ta ojto milie murusa. 4Lendar thode bis ta star milie te radin ando cher e Devleko, ta sov milie te aven gazda ta krisaria. 5Star milie te arakhen e udara, aver star milie te blagosin e Devle ande basalde kai o David bichaldaia te cheren te sai blagosin. 6O David fulada len prema e chave katar o Levi: O Gerson, o Keat ta o Merari.
7E chave katar o Gerson: O Laadan ta o Simi. 8E chave katar o Laadan sea trin: O Jejiel o mai purano, o Zetam ta o Joel. 9E chave katar o Simi sea trin: O Selomit, o Jaziel ta o Jaran. Gala sea gazda katar e familia e Laadaneke. 10E chave katar o Simi sea star: O Jajat, o Zira, o Jeus ta o Beria. 11O mai purano saia o Jajat mapalal o Zira. Ta soke e Jeuse ta e Beriae ni avile len but chave, llinde len sargo iek familia.
12E chave katar o Keat sea star: O Amram, o Isar, o Jebron ta o Uziel. 13E chave katar o Amram sea o Aaron ta o Moises. O Aaron thoda le o Del te cherel e ezgode mai sante, vou ta leke chave. Te phabaren o taimano angla o Del, te cheren o rado katar o cher e Devleko ta te blagosin ando anav e Devleko ostade.#Ek 28.1. 14Ta e chave katar o Moises, manus e Devleko, i len llinde ande vicha e Levieki.
15E chave katar o Moises sea o Gerson ta o Eliezer. 16O chavo katar o Gerson saia o Sebuel o gazda. 17O chavo katar o Eliezer saia o Rejabias, ta ni sea le ios chave. A e Rejabiase sea but chave. 18O chavo mai purano katar o Isar saia o Selomit. 19E chave katar o Jebron sea: o Jeraias o mai purano, o Amarias o duito, o Jajaziel o trito ta o Jekaman o starto. 20E chave katar o Uziel sea, o Mikaias o gazda ta o Isias o duito.
21E chave katar o Merari sea o Majli ta o Musi. E chave katar o Majli sea o Eleazar ta o Kis. 22Kana o Eleazar mulo ni sea le chave samo chorra kai zinisaile e chavenchar katar leko phlal o Kis. 23E chave katar o Musi sea trin, o Majli, o Eder ta o Jeremot.
24Sa gala llene sea o porodo katar o Levi ta lenge familie. Von sea llinde prema e anava katar lenge gazda kai sea lenge mai but katar e bis burs, ta radina ando cher e Devleko.
25Soke o David phendaia:
O Del e Israeleko dia e pas pe foro e Israele, a vou ka zivil ostade ando Jerusalem, 26goleke e levitura ni ka inllaren ios e chara e Devleki ta e ezgode kai si te blagosin e Devle.#Dt 10.8.
27Gia prema o alav e Davideko, llinde e chaven katar e vicha e Levieki kai sea lenge mai but katar e bis burs, 28ta achile telal tala o gazdaripe katar e chave e Aaronoke te sai cheren o rado katar o cher e Devleko, te arakhen e sobe, te chistosaren sa e ezgode sante e Devleke, ta te cheren sa o rado kai trubula ando cher e Devleko, 29te arakhen o marrno dino e Devleke, te arakhen e mai lachi arina pala e kurbanura, e marrne kai inai len levadura, e ofrende peke ande chiai, ta sogo si phariado ta llindo. 30Suako thiarin saia te den fala ta te blagosin e Devle, ta i pasa e racha katar o llive, 31te den e kurbanura phabarde ande sabadura, ande mesechine ta ande glamne slave prema o vreme kai si te cheren len ta sar morabi te cheren le, suako drom angla o Del. 32Ta i te arakhen e chara kai chidiniaon, te arakhen o santuario ta te cheren o rado katar o cher e Devleko prema o gazdaripe katar lenge phlal, e chave e Aaronoke.#Nm 3.5-9.
Currently Selected:
1 Kronikas 23: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
