1 Kronikas 22
22
1Goleke o David vacharda:
Kate ka avel o cher e Devleko ta o altar katar o kurbano phabardo e Israeleke.
Lacharen o cher e Devleko
2Mapalal o David phenda te chidiniaon sa e llene kai sea katar aver phuvia ta zivina ando Israel, ta ikharda lendar llenen te radin ande barra te sai vazden o cher e Devleko. 3Ta i lacharda but sastri te cheren e kafrina katar e udara ta e alkave, ta but tuch, ta but kasta katar o sedro bi llinde, 4soke e llene katar o Sidon ta o Tiro andea e Davideke but kasta katar o sedro.
5Ta o David phenda:
Mo chavo o Salomon si but terno ta o cher e Devleko kai morabi te vazda si te avel o mai baro, o mai sukar ta o mai pinllardo katar o sueto, goleke ka lacharav leke so trubul. Ta o David lacharda but ezgode mai anglal te merel. 6Mapalal ikharda pe chave ta phenda te vazdel o cher e Devleko, o Del e Israeleko, 7ta phenda leke:
Chavea, me mangava te vazdav iek cher te blagosin e Devleko anav, mo Del. 8A o Del phenda mange:
Dikhlem kai tu cherdan te chordol but rat ta sana ande but maripe, goleke ni san tu kai ka vazdel mange iek cher te blagosin mo anav. 9A ka avel tut iek chavo kai ni ka marelpe, ta me ka cherav te na marenpe lea leke dusmanura. Goleke ka ikharen le Salomon, ta ande leke llivesa ka cherav te avel pas ando Israel. 10Vou ka vazdel mange cher te blagosin mo anav. Vou ka avel mange sargo chavo a me ka avav leke sargo dad, ta ka cherav te avel leko trono ando Israel ostade.#2 S 7.1-16; 1 R 5.3-5; 8.17-21; 1 Kr 17.1-14. 11Akana chavea, te avel o Del tuia, te llal chuke sukar ta te vazde cher e Gazdake cho Del, gia sar o Del phenda le. 12Te del tut o Del bizaipe ta llanglipe te chere so phenel o zakono e Devleko, kana vou ka thovel tut te gazdari ando Israel. 13Ka llal chuke sukar ande sa, samo te cherea so phenel o Del ando zakonura kai dia e Moisese. ¡Le chuke zor ta na dara!#Jos 1.6-9. 14Dik, bare zoriaia chidiem pala o cher e Devleko, trin milie ta trin stotine kile sunakai, tranda ta trin milie kile rup ta but tuch ta sastri kai nasti llindol soke si but. Ta i chidiem kasta ta barra, a tu ka chide ios. 15Tute si but llene kai radin ande barra, llene kai radin ande kasta ta llene kai llanen te radin ande suako ezgoda. 16Katar o sunakai, o rup, o tuch ta o sastri nasti llindol. Uste, ta vazde o cher. Te pomozil tut o Del.
17Ta o David phenda e llenenge mai glamne katar o Israel te pomozin leke chave e Salomone, ta phenda lenge:
18O Del si tumenchar ta vou dia tumen e pas pe suako rig, soke vou thoda telal tala mo va sa e llenen kai zivin ande gaia phuv, ta e phuv gazdaril la o Del ta leko foro. 19Roden akana e Gazda tumaro Del te sai vazden o santuario e Devleko, te sai anen e arka katar e alava e Devleke ta sa e ezgode katar o cher kai si dine e Devleke.
Currently Selected:
1 Kronikas 22: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
