1 Kronikas 21
21
David llinel e foro
2 S 24.1-17
1Ta o satanas cherda te phenel o David te llinen e llenen katar o foro o Israel.#Job 1.6; Zak 3.1; Apo 12.10. 2Ondaka o charo phenda e Joabeke ta e llenenge kai gazdarina po foro:
Llan kai sa e viche katar o Israel, katar o Berseba llik kai o Dan te llinen e foro te llanav gachin llene si.
3A o Joab phenda:
Te del o Del te bariol leko foro stotina droma mai but neko so si akana, glamno charo. ¿Inai sa gala llene che sluge? ¿Soke te avel o Israel dosalo?
4A o alav e charoko saia mai zuralo neko o alav e Joabeko. Goleke o Joab llelo pe sa e phuv katar o Israel te sai llinel e foro, mapalal irisailo ando Jerusalem. 5Ta o Joab phenda e charoke gachin llene sea ande sa e phuv. Ando Israel sea millono ta stotina milie murusa kai sai llana po maripe, ta ando Juda star stotine ta eftavardes milie murusa kai sai llana po maripe. 6A ni llinde e llenen kai sea ande viche katar o Levi ta o Benjamin soke ni saia drago e Joabeke so cherela o charo.
7Ta gaia ezgoda ni pela drago e Devleke, goleke dukhada e Israele. 8Mapalal o David phenda e Devleke:
Devla, cherdem iek baro bilachipe. Mangav tutar Devla te prosti man pala so cherdem, soke cherdem iek dilipe.
9Ondaka avilo o alav e Devleko e Gadeke, kai saia iek lleno kai o Del phenela leke so saia te cherel o David, ta phenda:
10Lla ta phen e Davideke kai trin ezgode si man te dav le. Te phenel savi katar e trin mangel, ta me ka cherav le. 11Ondaka o Gad llelo kai o David ta phenda leke e orbe e Devleke:
Gia phenel o Del:
12Esvirisar:
Trin burs te avel e bok, o te dobin tut e jarniea trin chon che dusmanura ta von te roden tut, o te avel ande chi phuv trin llive iek bari muka kai si o jarni e Devleko, ta te zatril sa e phuv o suecho e Devleko. Mislisao ta phen mange so esvirisardan, te phenav le goleke kai bichalda man.
13Ta o David phenda e Gadeke:
Sem but dukhado. Mai sukar si te pera ande Devleke va soke vou si but lacho, a na te pera ande va e manusenge.
14Ondaka o Del cherda te avel iek bari muka ando Israel ta mule eftavardes milie llene. 15Ta o Del bichalda iek suecho te zatril o Jerusalem. Ta kana o suecho zatrila, avila zalba e Devleke ta phenda e suechoke:
¡Dosta akana, achi!
Ta o suecho e Devleko saia po than kai moren o lliu kai saia katar o Ornan o jebuseo.
16Ta o David dikhla kai o suecho e Devleko saia maskar o miloso ta e phuv, ta ande leko va iek jarni inzardo po Jerusalem. Ondaka o David ta e phure thodepe patave zalosne, ta die changa. 17Ta o David phenda e Devleke:
¡Me bichaldem te llinen e foro! ¡Me sem gua kai cherda o bilachipe! ¿A so cherde gala llene bi dosale? ¡Te perel e duk pe ma ta pe mi familia!
O David vazdel iek altar
2 S 24.18-25
18Ondaka o suecho e Devleko phenda e Gadeke te phenel e Davideke te vazdel iek altar e Devleke po than kai moren o lliu katar o Ornan o jebuseo. 19Ta o David llelo te cherel so phendaia leke o Gad ando anav e Devleko. 20Kana o Ornan drebola o lliu dikhla e suecho e Devleko, goleke star katar leke chave kai sea lea gurudile. 21Ta o Ornan dikhla kai avela o David, ta likisto katar o than kai moren o lliu ta dia changenchar angla le, 22Ta o David phenda leke:
Me avav te chinav tutar chi phuv te sai vazdav iek altar e Devleke. Me ka pochinav chuke so mol le, gia ni ka meren ios llene ando foro.
23Ta o Ornan phenda e Davideke:
Mo glamno charo, le sogo mangea te de kurbano phabardo e Devleke. Kate si guruva, e kasta ta o lliu e kurbanoke. ¡Sa me dav len tute, mo glamno charo!
24Ta o charo phenda e Ornaneke:
Iok, me ka chinav le pe so mol le. Ni ka lav tutar niso te dav le kurbano e Devleke ta kai ni pochindem niso pala le.
25Ondaka o David pochinda e Ornaneke pala gua than sov stotine tolaria sunakune. 26Ta o David vazdia kote iek altar e Devleke, ta dia kurbanura phabarde ta ofrende pala e pas. Ta o Del asunda o molipe e Davideko ta bichalda iag katar o miloso po altar kai phabarena o kurbano. 27Ondaka o Del dia orba e suechoke, ta o suecho guruda po jarni.
O than te cherdol o cher e Devleko
28Ta kana o David dikhla kai o Del asunda le ande umal katar o Ornan jebuseo, dia kurbanura kote. 29Ta e chara e Devleki kai vazdiaia o Moises po pusto ta o altar e kurbanoko, sea po than vazdino ando Gabaon. 30Ta o David ni llelo incha te puchel e Devle soke darailo but kana dikhla o jarni katar o suecho e Devleko.
Currently Selected:
1 Kronikas 21: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
