Ukunukuo 6

Mwankhoo ugumëunanga mehuri

1Kangë nëgamwona Mwankhoo uguwuunanga mühüri rumwedu wa mëhuri ëyoo në ëmufungatë. Nëgamutëghëëya umwedu wa ntundo ëyoo në ine në yina ufanga ëguhanya gwa ruri mwino wa irumo, “Njuu!” 2Nene nëgararava na ngwë naa gwina nyumbu ëmwedu njeru faafo. Na munyaumënatëa wayo na wina uta, agafewa nanë ngaa. Uvii, agadua mwino muhumi afwagheere uhuma.

3Kangë Mwankhoo agawuunanga mühüri wa gavëë. Nëgamëteghëëya ntundo a gavëë në ina ufanga ëguhanya, “Njuu!” 4Neeno nëgararava na ngwë na ërëfo nyümbü ëngëja faafo nkhooku. Munyaumënatëa wayo agafewa mwëmo wa uheya majëghana muuremi, antu viuraghe; agafewa itemeo ikuu.

5Kangë Mwankhoo agawuunanga mühüri wa gatatu. Nëgamëtëgheeya ntundo ëyoo a gatatu në ina ufanga ëguhanya, “Njuu!” Nëgararava na ngwë na ërëfo nyümbü ëngëja, njiutëki. Munyaumënatëa na wina intu ra ugheera urëto umukhono wakwe. 6Nëgategheeya intu mwino ruri ugufuma kunë ntundo ëyoo në ine në yina ufanga. Weesonoo ugahanya, “Gëbaba gëmwedu ga utü wa ngano gwa hela dinari ëmwedu, nane vibaba vëtatu vya sayiri gwa dinari ëmwedu. Ëgweeso utaruvange maküta mba divai.”

7Kangë Mwankhoo agawuunanga muhuri wa gane. Nëgametegheeya ntundo ëyoo në agane në ina ufanga iguhanya, “Njuu!” 8Neeno nëgararava, na ngwë na ërëfo nyümbü ëmwedu faafo, ikeru rayo rityuku. Na rina ra munyaumënatëa wayo na Ikuya, na Guurungu agamuhonga unyuma. Vasaa vëgafewa udaho gunto a gëfande #6:8 Gëfande: Uvaru numwedu. gëmwedu ga urëmi, vëvauraghe antu gwa itëmeo, njaa, sumida na gwa miimwana në makharë në a muuremi.

9Kangë Mwankhoo agawuunanga mühüri wa gatano. Nëgaona faafo fang'ë a Ikumbëkëo ra utunchëya urumba nkhoo ya vasaa nëyauraghiwe gusoko a ukhani wa Muungu, na gusoko a utanantya. 10Uvii, vëgarëa gwa ruri ukuu: “Vee Müküü në wëmweru, na umunyatüte, faka nanee nëugutinya uvarëfesya anya gëkhaa voong'e va muuremi gusoko a guuraghwa kunë sese?” 11Vëgafewa mu muntu isaa riiëfu ryëru, vëgakhanëwa vëfwaghëëre giëndeya gwa itungo ikufë, faka rëkhonde isabu ra atumami vauya nanë anyandughu nëvëguuraghwa mwino veeso aghonjo nëvauraghiwe.

12Kange nëgararava, na itungo nënaa Mwankhoo agawuunanga mühüri wa mutandatu, gugatëndeka gëtëtëmo giküü ga fang'ë; yuva rëgatënda kiti mwino musuta; mweri woong'e ugatënda ukhookuju mwino saghami; 13njota ya girunde noo igagwa gunto a fang'ë mwino nkhari ya mutini nëëfwagutëye nëyiugwa itugo në mutë wayo wahingisiwa na mpefo nënkuu. 14Nto ëgaheywa mwino ibada nërëubëdwabëdwa; vitanto vyoong'e na ndujë yoong'e vigaheywa fana naa vyërë. 15Kangë atëmi va muurëmi, aküü, ahomi në aküü, aghwarë, anyanguu, mu umutughwa na muntu nëtëmutughwa, vëgagëfiha mumpanga nanë umatalaghwe a muvitanto. 16Vëgavikhanëa vitanto visii nane matalaghwe asaa, “Gugwëëri, mugufihe kurengë na wasuu nëwikhee gunto a itumbë ra utemi, na kurengë na makuwo a Mwankhoo! 17Gusoko itiku ra makuwo awe rafikaa. Anyu nëudahete utang'anëya nayo?”

Currently Selected:

Ukunukuo 6: RIMRC

Highlight

Copy

Compare