Ukunukuo 5

Gëtabu nanë Mwankhoo

1Kangë, mu mukhono wa gëlëlo wamwa wasuu nënaa wikhee gunto a itumbë ra utemi, nëgaona gëtabu; gëëso naagëandëkiwe mukhatë na gunji na utungwa na mëhuri ëmufungati. 2Kangë nëgamwona malaëka në munyanguu ugutanantya gwa ruri üküü: “Anyu nëunoneye guunanga mëhuri ëyoo na ugëkunukua gëtabu ëkoo?” 3Ëgweeso inahangëka muntu woong'e girunde, mbesa muurëmi, mbesa fang'e gwarungu, nëagadaha ugëkunukua gëtabu gasëë nanë ugërarava mukhatë. 4Uvii, nene nëgarëa nanguu gusoko ënahangëka muntu nëunoneye ugëkunukua nanë ugërarava mukhatë. 5Kangë umwedu wa anyampaa vasaa agankhanëa, “Khondya gwëëra! Rarava! Ng'imba a ndughu amwa Yuda, mwijukuu nëukumukie wamwa Daudi, wahumie. Mweeso ugudaha umëunanga mëhuri ësëë në ëmufungatë nanë ugëkunukua gëtabu gasëë.”

6Kangë nëgaona mukhatëkhatë a itumbë ra utemi Mwankhoo wëmëkie, ukungëywe mbaru yoong'e na ntundo ëyoo në ine në yina ufanga, nanë anyampaa avoo. Mwankhoo wasuu agadwëëra mwino ukikitiwe. Naa wina mpembe ëmufungatë, nanë miho ëmufungatë unë nkhoo ya Muungu nënaa yatowe ng'andë yoong'e muurëmi. 7Mwankhoo agenda, agagëhora gëtabu gasëë ufuma umukhono wa gelelo wamwa wasuu nënawikhee gitumbë ra utemi. 8Gënyafaafo gutufu nënaa wagëhora gëtabu gasëë, ntundo ëyoo në ine në yina ufanga itambëëmwe nanë anyampaa avoo në vëmakumi avëë na vane vëgagwa uumbama usonge amwa Mwankhoo. Muu gëmwedu na gëna isumbë nanë bakuri ya sahabu yijue urumba, unë marombë a antu va Muungu. 9Uvii, vëgaimba wëmbo uruu në ufya,

“Veve unoneye ugëhora gëtabu gasëë,

nanë umëunanga mëhuri ësëë.

Gusoko veve wakigitiwe,

na gwa saghami ako

wamughurëye Muungu antu

ufuma muu ndughu,

mërighëtiyo, antu nanë makako oong'e a antu.

10Veve waatendie vëtëndeke utemi

wa akumbëki

vëmutumamëe Muungu witu,

veesono vigëbala muurëmi.”

11Kange nëgararava, negategheeya ruri wa vamalaëka vingë ino, isabu nërëtimanyëkie, maghana a njou na maghana a njou. Naa vikhee urëkungëya itumbë ra utemi, ntundo ëyoo në ine në yina ufanga nane anyampaa avoo; 12vëgahanya gwa ruri üküü:

“Mwankhoo nëwakigëtiwe

unoneye ughenyifa udaho, ughwarë

ihaa, nguu, üküü nanë ükumu.”

13Nëgategheeya ntundo yoong'e girunde, muurëmi, fang'ë gwarungu nanë gërambo ntundo yoong'e muurëmi ëgahanya, “kunë mweeso nëwëkhee gitumbë rakwe ra utemi, na gwa Mwankhoo, ëtendeke ukumo nanë ikuryo nanë üküü na utemi khae na khae!” 14Na ntundo ëyoo në ine në yina ufanga igahanya, “Amina!” Nanë anyampaa avoo vëgagwa uumbama, vëgakurya.

Currently Selected:

Ukunukuo 5: RIMRC

Highlight

Copy

Compare