Ukunukuo 22

1Kangë agandaghëëra yongo ra majë a ufanga meruchwë mwino gërore ëgufuma mwitumbë ra utemi ra Muungu nanë Mwankhoo. 2Mukhatëkhatë a ifanda në ëkuu ra muji. Umpeompeo a yongo rasëë na gwina mutë wa ufanga nëugufaa nkhari makhakho ikumi na ivëë gwa mwakha, mu mweri; na matutu ayo në mahuka oforya antu va ana arime. 3Gutië ijumi roong'e nërëutendeka rërëfo gange.

Itumbë ra utëmi ra Muungu nanë ramwa Mwankhoo rëutëndeka rërëfo mukhatë ayo, na atumami vakwe vëjie umwitumamëa. 4Veeso vëmwona usyu wakwe, na rina rakwe rëutendeka rë umasyu awe. 5Utiku utëudwëëra kangë; vëtijieufenja weru wa gëmwëë mba yuva, gusoko Müküü Muungu ugeuvamwëkëa, veesonoo vëjiegibala khae na khae.

Uja kune Yesu

6Kangë agankhanëa, “Nkhani iyëë në ya tutë na ya uhuvëëka. Na Müküü Muungu wa khoo ya anyagedaghu, agamutuma malaëka wakwe avaraghëëre atumami vakwe mantu nëë udwëëra fifeyii.

7“Na rarava! naja ruvë bahu akwe nëuguyikunyatëa nkhani ya udaghui në wë mugëtabu ëkëë.”

8Nene Yohana, unë nategheye nkhani iyii, na uyaona mantu ayoo, utëgheeya mantu ayaa. Nënaa natëgheeya na goona nëgagwa fang'ë nëkuriye usonge a mëghuu amwa malaëka uyoo nënaa wandaghëëre mantu ayoo. 9Mweeso agankhanëa; “Rarava! Utatende vii, nene në mutumami wako na aunako anyandughu, na avoo woong'e nëvëyikunyatëe nkhani ya gëtabu ëkëë. Mukurye Muungu!” 10Agankanëa, “Utayifihe mwino gëmpihë nkhani ya udaghui nëërefo mu gëtabu ëkëë, gusoko itungo raukhondekeka gwayo rahumbeera. 11Munya utenda në mavë neafwaghëëre utenda në mave. Na muntu në muvaya na afwaghëëre na uvaya wakwe. Na munya tütë na afwagheere utenda tütë. Nanë mweru na afwaghëëre ueriwa.”

12“Na rarava Yesu, ‘Nëjie ruvë, itambëëmwe na gënyamwëmo në nëjieumufa mu muntu uhonga na ntendo yakwe. 13Nene në Alfa na Omega, Mwandyo nanë Mpeo, wa mwandyo nanë wa mpeo.’”

14Bahu awe vasaa nëvëuhomboa masaa awe, vëtendeke vina udaho uwendea mutë uroo wa ufanga, gëngëa u muji gwa ukëree vinyamwango vyakwe. 15Uko gunji irifo mbwa, aroghi, alehadi, anyaguragha, anyaukurya sanamu, nanë woong'e nëvëurëghëtëa wegheghe, vëjiegëkhaa gunji a muji. 16“Nene, Yesu, namutumie malaëka wane umusudangëa nyenye mantu ayaa u makanisa. Nene unë nëitina na ufafo wa umwango mwa Daudi. Nene unë nëgënkungu!” 17Mwahu nanë musyëda vehanye, “Nju!” Mu muntu nëugutëgheeya ërëë, në ahanye, “Nju!” Na wasuu në wina nyweta në aje; na wasuu nëugufenja ayahoe maje a ufanga ndende.

Mpeo

18Ngumusudangëa mu muntu nëugutegheya nkhani ya udaghui wa gëtabu ëkëë, muntu gëkaku nëwongeeya roong'e mu mantu ayaa, Muungu ugumwongeeya makhuvi nëëandëkiwe mu gëtabu ëkëë. 19Na muntu gëkaku nëwaheya roong'e mu nkhani ya udaghui wa gëtabu ëkëë, Muungu ugumuhegheya mpamba akwe mu mutë wa ufanga, nanë mpamba akwe u muji në weru, mwino ërëghëtiywe mu gëtabu ëkëë. 20Mweesonoo nëuguduya usudangëe wakwe gwa mantu ayaa uguhanya, “Nhaa! Nëjie ruvë.” Amina. Nëëtëndeke uvii! Njuu Müküü Yesu!

21Mboto ya Müküü Yesu itëndeke itambëëmwe nanyee nyoong'e. Amina!

Currently Selected:

Ukunukuo 22: RIMRC

Highlight

Copy

Compare