Ukunukuo 21

Irunde në ifya na ng'ë në mpya

1Kangë nëgaona irunde në ifya na ng'ë në mpya. Gusoko irunde ëroo ra mwandyo na ng'ë ëyoo a mwandyo yakëire, irambo ryësonoo rënadwëëra kangë. 2Nëgaona muji uroo në weru, Yerusalemu në ufya, ugutununta ufuma kunë Muungu girunde. Naa uning'anëywe vija mwino musyëda nëworiwe ruku utang'ana na mughohi wakwe. 3Nëgatëgheeya ruri üküü ufuma mwitumbë ra utemi uguhanya, “Rarava! Muungu watëndaa mikhao akwe mukhatë a antu. Ugikhaa mukhatë awe, veesonoo vëutënda antu vakwe, mweesonoo ugutënda Muungu wawe. 4Mweeso uguyifyaghua ndighëgo yawe yoong'e; mbesa ikuya rëtiudwëëra kangë, mbesa uhongeya, mbesa gëëro, mbesa uvavi; atiutendeka arëfo kangë gusoko mantu ayoo në a kheengë akëire!”

5Kangë uyoo nënaawikhee gunto a itumbë ra utemi agaanya, “Rarava, nëuyatënda oong'e mafya.” Agankhanëa, “Andëka nkhani iyëë në ya uhuvëëka na ya tutë!” 6Agankhanëa, “Akhondaa! Nene në Alfa na Omega, Mwandyo nanë Mpeo. Në wina nyweta ngumufa gëntu ga unywa ga usoo ufuma mu murihë wa majë a ufanga. 7Gëkaku muntu nëuguhuma ugughenyifa chëëke: Nene ngutënda Muungu wakwe mweesonoo ugutënda mwanane. 8Ëgweeso antu në woova, nëvëtihuvëë, nëvëyaghee, vooraghi, alehadi, aroghi, nëvëukurya sanamu, nanë vëgheghe voong'e, itumbë rawe rëutëdeka mukhatë a irambo ëroo nëryakyë moto nanë gëbirigitë; rasëë unë ikuya ra gavëë.”

Yerusalemu në ufya

9Agaja umwedu wa vamalaëka avoo në vëmufungatë nënaa vina mabakuri ayoo në ëmufungatë nënaaijue mavë ëmufungatë a mpeo, mweeso agarigheetya na nee unkhanëa, “Njuu! Nene nguguragheera musyeda uyoo, mukhema wamwa Mwankhoo!” 10Agahanya mung'ë a Mwahu, faka gunto a getanto gërifu nanguu. Agandagheera muji Weru, unë Yerusalemu, ugutununta ufuma kunë Muungu girunde, 11weriye gwa weru wa Muungu. Weru wayo na wë mwino wa igwe në rina hela nyingë, ryeruchwi mwino wa gërore. 12Na gwina nkhando ndifu na nküü, ina vinyamwango ikumi na vivëë, na vamalaëka anyaughoja vinyamwango ikumi na vavëë. Mina a ndughu ikumi na ivëë ya Isiraeli na yiandëkiwe gunto a vinyamwango visëë. 13Muu uvaru na gwina vinyamwango vitatu: uvaru wa ukiya vinyamwango vitatu, guukuma vinyamwango vitatu, utaghama vinyamwango vitatu, na umweri vinyamwango vitatu. 14Nkhando ya muji wasuu na ëjengiwe gunto a magwe a misingi ikumi na avëë, na gunto a magwe asaa naa ëandekiwe mina a atumami ikumi na vavëë va Mwankhoo.

15Na wasuu në arë gurighëëtye nanee naa wina gatë ga sahabu ga ufimëa gusoko a uwufëma muji wasuu, vinyamwango vyayo nanë nkhando yayo. 16Muji weeso na wikhwëtë: gwa urifu na uhonga. Agaufima muji wasuu gwa gatë gasaa: na wina urifu, uhonga nanë urifu wa gwenda gunto, mwino kilomita maghana avëë a njou na maghana ane. Urifu nanë uhonga na gwenda gunto arë gwëkhwete. 17Agafiima nkhandoyayonoo; weesonoo na mëghuu maghana mutandatu gwa gëfimo ga gëuntu unë naa malaëka ugugëtumëa. 18Nkhando isiinaa ëjengiwe gwa magwe makhoku a hela nyingë, na muji weesonoo naa ujengiwe gwa sahabu njija, njeruchwe mwino gërore. 19Magwe a musingi wa nkhando isii naa wooriwe gwa magwe hiya hiya a hela nyingë. Igwe ra mwandyo ra musingi na igwe në ëkhoku, ra gavëë yakuti samawi, ra gatatu kakedoni, na ra gane samaradi, 20ra gatano sardoniki, ra mutandatu akiki, ra mufungatë kirisolito, ra munana berili, ra kenda topasi, ra ikumi kirisopraso, ra ikumi na gamwe yasinto, ra ikumi na gavëë amethisto. 21Na vinyamwango visii ikumi na vivëë na lulu ikumi na ivëë; mu gënyamwango naa gëtëndiwe na lulu ëmwedu. Ifanda në iküü ra muji naa rëtëndiwe gwa sahabu njija, njeruchwë mwino gërore.

22Ntinaonaa hekalu u muji wasuu, gusoko Müküü Muungu Munya Udaho nanë Mwankhoo unë hekalu ryëso. 23Muji wasuu utyufenja yuva mbesa mweri uwumwëkëa, gusoko weru wa Muungu uguwumwëkëa, na gëmwë gayo unë Mwankhoo uyoo. 24Ana arëmi vëjie gweenenda mu weru wayo na atëmi va muurëmi vëjie uwetëa ughwarë wawe. 25Vinyamwango vya muji wasuu vëgutëndeka vii mwaryë mumwë woong'e; gusoko gutyutëndeka na utiku mukhatë ayo. 26Veeso vëgweeta üküü na ikuryo ra ana arëmi voong'e mukhatë ayo. 27Gutië gëntu goong'e në gëlegheku nëgëngëa mukhatë; mbesa muntu woong'e nëugutëndaa mantu a uhurisya mba a wegheghe atëgëngëa fafo. Në vasaa gutufu nëvëandëkiwe mu gëtabu ga ufanga ga Mwankhoo unë vëgingëa mukhatë.

Currently Selected:

Ukunukuo 21: RIMRC

Highlight

Copy

Compare