Ukunukuo 14

Wëmbo wa antu nëvakhomowe

1Kangë nëgaona gëtanto ga Sioni, na Mwankhoo wimëkie gunto ayo; itambëëmwe nanë mweeso na nagwina antu maghana a njou ighana na makumi ane na vane gunto a masyu awe naa vëandëkiwe rina ra Mwankhoo nanë rina ramwa Tata wakwe. 2Uvii, nëgatëgheeya ruri ufuma girunde ruri në wë mwino ruri wa majë mingë nanë mwino ruri wa irunkumo iküü. Ruri nënaa nawutëgheeya na wë mwino ruri wa anyagiisa mwiruso vëukhuva masumbë. 3Naa arë vëgwëëmba ryëembo rifya usonge a itumbë ra utemi nanë usonge a ntundo ëyoo në ine në yina ufanga nanë anyampaa avoo. Gutie muntu nëagadaha gisëya ryëembo rasëë ëgweeso gutufu antu avoo maghana a njou ighana na makumi ane na vane (144,000) nëvakhomowe muurëmi. 4Antu vasaa unë avoo nëvendie gierya gwa udëa utang'ana gëmwërë na akhema veeso unë ancha në vinaraa na mughosya mbanduvë. Veeso vëumuhongaa Mwankhoo goong'e kunë winjë. Vakhomowe ufuma mukhatë a anantu vangëja vetëndeka va mwandyo ufunyiwa kunë Muungu nanë kunë Mwankhoo. 5Vinareghëgha kamwë; vëtinihondwe mbanduvë.

Vamalaëka vatatu

6Kangë nëgamwona malaëka ungëja urumie gunto wina Sayu Njija a khae a Muungu, amëtanantye gwa antu voong'e nëvëuduvaa muurëmi, gwa ana arime voong'e, ndughu yoong'e, antu va mërighëtyo oong'e nanë makeru oong'e. 7Agahanya gwa ruri në üküü, “Mukuri Muungu nanë umukumajua! Gusoko itungo rafikaa ra ufunya uramui wakwe. Mukuri mweeso nëwatundie irunde nane fang'ë, irambo nanë mërihë a majë.”

8Malaëka wa gavëë agamuhonga malaëka uyoo wa mwandyo uguhanya. “Wagwee! Nhaa, Babeli në müküü wagwee! Babeli unë agavafa ana arëmi voong'e vënywe divai në ndülü a ulehadi wakwe!”

9Na malaëka wa gatatu agavahonga va malaëka avoo në vavëë uguhanya gwa ruri në üküü, “Gëkaku muntu nëugurëkurya imwana ëroo nanë sanamu akwe nanë uyanjëtë utëndewa gëmanyëko gunto a usyu wakwe mba gunto a mukhono wakwe, 10mweeso mughonjo ugumënywa divai a ikuo ra Muungu, nëwamëkununtëe mu gatengee ga ikuo rakwe në ëtihangënkhaniywe na majë. Muntu wasuu ugukhasëka mukhatë a moto nanë gëbirigiti, usonge a vamalaëka në veeru nanë usonge amwa Mwankhoo.” 11Yuki ra moto nëuguvakhasya reunatëa gunto khae na khae. Antu vasaa nënaa vëurëkurya imwana rasëë nanë sanamu akwe, na utëndeywa gëmanyëko ga rina rakwe, vëtiuhanga bahu mbanduvë utiku nanë mumwë.

12Hafai unë fana gwina ughümu wa antu në antu veru, avoo nëvëkwatëre maraghëëyo a Muungu nanë uhuvëi wamwa Yesu.

13Kangë nëgatëgheeya ruri ufuma girunde uguhanya, “Andëka! Bahu antu në ufuma itungwee vëukuya kunu vëkhuvëe na Müküü.” Mwahu mweeso uguhanya, “Hhaa! vadahe utuya ufuma umalwe awe; gusoko ntendo yawe ivasambëye veeso.” 14Kangë nëgararaava, na ngwë, na gwina irunde ryëru faafo. Na gunto a irunde rasëë na gwina ntundo ë mwino muntu. Naa urye ngaa a sahabu gitwë, na ukwatëre njolo u mukhono wakwe. 15Na malaëka ungëja agafuma uhekalu, agamureera na gwa ruri në üküü agamwëëra malaëka uyoo nënaa wikhee gunto a irunde, “Ngugunena, tumëa njolo ako utënanga ntënangë, gusoko itungo ra matënanga rafikaa; ntënange a urëmi avëyaa.” 16Uvii, uyoo nënaa wikhee gunto a irunde agamëjughuta njolo akwe muurëmi, na ntënange a muurëmi ëgatenangwa.

17Kangë malaëka ungëja agafuma mu hekalu girunde wina njolo njëghë. 18Na malaëka ungëja ufuma gikumbëkëo ërëëo, uyoo nënaa wina udaho gunto a moto. Mweeso agamurëëra gwa ruri në üküü uyuo nënaa wina njolo njëghe uguhanya. “Veenoo tumëa njolo ako ësëë në njëghë utëne mukhoore wa sabibu ya urëmi, gusoko sabibu yayo yavëyaa.” 19Uvii, malaëka wasuu, agatënanga sabibu ya urëmi, agayitëndea mukhatë a gëfe gëkuu ga usëndëkëa sabibu, gëfe ga makuwo a Muungu. 20Sabibu ëgakhamwa mukhatë a gëfe gasëë ga usindëkëa sabibu në gëgunji a muji, na saghami ëgafuma mu gëfe gasëë musemembo urëfu gënya kilomita maghana atatu na gwenda fang'ë meta ivëë.

Currently Selected:

Ukunukuo 14: RIMRC

Highlight

Copy

Compare