Ukunukuo 13

Maimwana avëë

1Kangë nëgaona imwana rëmwendu rëufuma girambo. Naa rina matwë ëmufungatë nane mpembe ikumi, muu ufembe naa wina ngaa. Rina ra maraghanëyo në mavëë naa rëandëkiwe mu matwe asaa. 2Imwana rasëë nënaa narëona naa rë mwino ng'uvë; mëghuu akwe naa ë mwino a dubu, na itwë rakwe rë mwino ra ng'imba. Ijokha rasëë rëgarëfa imwana rasëë nguu yakwe, itumbë rakwe ra utemi nanë udaho wakwe üküü. 3Itwe rëmwedu ra imwana rasëë rëgadwëëra mwino ratümüwa vivë nanguu, ëgweeso nkhomee asëë naa aforaa. Urëmi woong'e ugatachwa na imwana rasëë na urëhonga. 4Antu voong'e vëgarëkurya ijokha rasëë gusoko rëgarëfa imwana rasëë udaho wakwe. Vëgarëkurya no imwana rasëë na uhanya, “Anyu në wë mwino imwana ërëë? Anyu nëugudaha gikhuva na ryeso?”

5Kangë imwana rasëë rëgarekewa urighëtya nkhani ya gëkhajimba ya ümüraghanëya Muungu; rëgarekewa rëtende rina udaho gwa itungo ra mëëri makumi ane na ëvëë. 6Uvii, rëgaandya ümutüka Muungu, urëtuka rina rakwe, wikhoo wakwe nanë voong'e nëvëgëkha girunde. 7Regarëkewa gihoma urughu nanë uvahuma antu va Muungu. Regafewa udaho gunto a antu va muu ndughu, mwango, mirëghëtyo nane ana arëmi. 8Voong'e nëvëgëkhaa muurëmi vëgarëkurya ëgweeso gutufu avoo unë mina awe ëandëkiwe ufuma mwandyo wa urëmi mu gitabu ga ufanga ga Mwankhoo niwakigitëwe. 9“Në wina makütwë, uvii, nëategheeye! 10Nëvëuhumwa guurughu na uhorwa na arughu vawe inoneye vëhorwe; nëvëguraghwa gwa itëmeo vëguraghwa gwa itëmeo. Uhonga na asaa inoneye antu va Muungu vëtënde vina ughimu nanë uhuvëi.”

11Kangë nëgarëona imwana rëngëja rëufuma fang'ë. Naa rina mpembe ivëë mwino mpembe ya nkhoo, na rigarëghëtya mwino ijokha. 12Rëgafewa udaho nëukhondekekie ufuma kunë imwana ra mwandyo, na rigautumëa udaho wasuu usonge a imwana rasëë. Rëgawonyeeya urëmi woong'e nanë voong'e nëvëmukhatë ayo urëkurya imwana ra mwandyo nënaa rina nkhomee a ikuya nënaa ëgafora. 13Uvii, imwana rasëë ra gavëë rëgatënda maküra maküü mbesa usacha moto ufuma girunde utununte muurëmi usonge a antu. 14Rëgavayaghaya vikhai va muurëmi gwa makura asaa nërëgadahisiwa uyatënda usonge a imwana ëroo ra mwandyo. Regavakhanëa vikhai va muurëmi vëtënde sanamu gwa ikuryo ra imwana na ëroo nënaa ratumuwe gwa itëmeo ëgweeso rëgaduva kangë. 15Kangë rëgadahisiwa umëeherea mwahu sanamu ëyoo a imwana ëroo ra mwandyo, mbesa vëgadaha urighëtya nanë uvauragha antu avoo nëvënarikuryaa. 16Rëgawonyeya voong'e, anyughu nanë akuu, aghwarë nanë atuki, antu në vina uhagharo nanë atughwa, vëtëndewe gëmanyëko gunto a mëkhono awe a gëlëlo mba gunto a masyu awe. 17Rëgamonyeeya mu muntu woong'e ughura nanë urinja intu ëgweeso gutufu muntu nëwatëndeywe gëmanyëko gasëë, unë rina ra imwana ëroo mba itarakimu ra rina rakwe.

18Afaa inoneye utumëa ihaa. Munya ihaa ugudaha umanya ryiana ra itarakimu ra imwana rasëë, gusoko në itarakimu në rina ryiana ra muntu. Itarakimu rasëë unë maghana mutandatu na makumi mutandatu na mutandatu.

Currently Selected:

Ukunukuo 13: RIMRC

Highlight

Copy

Compare