Ukunukuo 12

Mukhema nane njokha

1Kangë ndolyo nküü ëgadwëëra girunde. Faafo na gwina mukhema urëechiywe yuva, nanë mweri fangë a mëghuu akwe, nanë ngaa a njota ikumi na ivëë gunto a ëtwe rakwe. 2Naa wë gëito, agaanga gwa uvavi na uhungu wa gitungua mwana.

3Ndolyo ëngëja ëgadwëëra girunde: ijokha iküü ikhoku na rina mpembe ikumi na matwë ëmufungatë; na mu itwe rina ngaa. 4Ijokha rasëë rëgautüta gwa gëfumbu gakwe theluthi ëmwedu a njota ya gunto na uyijughuta muurëmi. Riesonoo rëgimëka usonge amwa mukhema uyoo nënaa mwito ugitungua, gënyafaafo gutufu në mwana wafafwa, amumire. 5Kangë mukhema wasuu agagëtungua mwana wa gëghosya, unë ujie gibala ana arëmi voong'e gwa mwaanga wa chuma. Ëgweeso mwana wasuu agahukwa na utowa kunë Muungu na mwitumbë rakwe ra utemi. 6Mukhema wasuu agadurëa umbugha, küüko Muungu naa wamughondanërëye fana ugughojwa gwa matiku ëghana rëmwedu ra njou na maghana avëë na makumi mutandatu.

7Kangë urughu ugakunkana girunde: Mikaeli nanë malaëka vakwe vëgagihoma na ijokha rasëë, riesonoo rëgagëkhuva itambëëmwe na malaëka vakwe. 8Ëgweeso ijokha rasëë rinadahaa uvahuma, nampeo ayo rinadwëëra kangë iyoma girunde gusoko akwe nanë malaëka vakwe. 9Uvii, ijokha rasëë në iküü rëgajughutwa gunji, ijokha rasëë unë njokha ëyoo në akheengë në ëgwetanwa noo Ibilisi mba Setani. Unë uguwukhongaa urëmi woong'e. Haa, mweeso ëtambëmwe nanë malaëka vakwe voong'e vëgajughutwa muurëmi.

10Kangë nëgatëgheeya ruri üküü ufuma girunde uguhanya, “Itungwee ukhomoi ufuma kunë Muungu witu wafikaa! Nguu na Wibali wa Muungu witu wiraghanaa. Nanë Masihi wakwe waraghëëra udaho wakwe. Gusoko mukhasi uyoo wa vauna vitu, nënaa ugimëkaa usonge a Muungu uguvasitakaa utiku nanë mumwë, itungwee wajughutwaa gunji. 11Vauna vitu vahumie gwa saghami a Mwankhoo nanë gwa nguu ya tutë nënaa vëumëtanantyaa; gusoko vendie uwuhoocha uduvi wawe na uwoona ti gëntu, vëgabahia ukuya. 12Gusoko ësëë yanji nyee irunde nanë oong'e në ërëfo mukhatë ayo. Ëgweeso, hëhëë anyu ng'ë nanë irambo, gusoko Ibilisi wamujëa ukwete makuvo maküü, gusoko umanyie mwino matiku akwe asighaa makeevu.”

13Ijokha nënaaramanya mwino rajughutwa muurëmi, rëgandya umusempa mukhema uyoo nënaa wagëtungue mwana wa gëghosya. 14Ëgweeso mukhema wasuu agafewa mabava avëë a nümba adahe uruma kurengë nanguu na ijokha rasëë, faka itümbë rakwe umbugha kunë ugughojwa vija gwa itungo ra mëakha ëtatu na mëëri mutandatu. 15Uvii, ijokha rëgarüka majë mingi mwino yongo, amuhonga mukhema wasuu unyuma ëdahe umuhoreya. 16Ëgweeso ng'ë ëgamwarëya mukhema wasuu: ëgaamaha mwino moomo na uyamira majë asaa nëëkadua umomo wa ijokha rasëë. 17Uvii, ijokha rasëë rëgamukheefea mukhema wasuu, rëgagiheya, rigaenda gëkhuva na ufafo ungëja wa mukhema wasuu, unë voong'e nëvëyakuriye maraghëëyo a Muungu nanë ukunyatëa tutë amwa Yesu. 18Rëgagimëka untümbe a irambo.

Currently Selected:

Ukunukuo 12: RIMRC

Highlight

Copy

Compare