1 Korin 10

Tokngon ka polou ke osep Israel ina

1Sipmi. Ngawai ke umu ma umeile langane. Alo ka Moses dong ke taklak ane udo seia tidong moli ke gaup. E tididi gaup tonari e isak ka pula keniye kla tibru aki Edimor.#10.1 — Emritim basikngen ane ke Testamen Oglou Ina ke Kisim Bek 13.17-22 e Kisim Bek 14.1-31. 2Deka tididi Moses e elio ka polou ke iye polou ke isak blang. Elio ane langka tidue elio paunimngen ina ke gaup e ke aki. 3E tingen ngangon ka Ida Tapolngon Ano Itau kare ke isak. 4E tinim aki ka Ida Tapolngon Ano Itau kare ke isak blang. Tinim aki ka me ke Ano Itau ka baser ke opmu. Kesua Ano Itau kla kap isak. Opmu tonari ka tinim aki ka polou ine iye Krais.#10.4 — Emritim basikngen ane ke Testamen Oglou Ina ke Kisim Bek 17.1-7 e Namba 20.1-13. 5E dau Ida Tapolngon aitno itau ke osep ka pula keniye tonari urok elio kovok. Deka timete ke omur ka dong adai vala.

6Wan ka pula keniye ka ti-polou ke isak tipolou langka nisngen ka me ke ite ma itavati e itawaiki itodue wan soulu langka tidue kovok. 7Aitno lumu la ke sapingen langka isak leklou kovok. Kesua Ida Tapolngon ila pelengon wai langane.

“Tidong tingen e tinim mase titito e titirie.”#10.7 — Emritim basikngen ane ke Testamen Oglou Ina ke Kisim Bek 32.1-6.

8Ma itodue elio okwa langka isak leklou tidue kovok. Ke oklou kene osep ka inarak sasa langka 23,000 timete ine.#10.8 — Emritim basikngen ane ke Testamen Oglou Ina ke Namba 25.1-9. 9E ma itotok Ida Puda langka isak leklou tidue kovok. E mota ka amnga bitna langka mota soulu tingen isak e timete ine.#10.9 — Emritim basikngen ane ke Testamen Oglou Ina ke Namba 21.4-9. 10E ma umongurngur ke Ida Tapolngon langka isak leklou tidue kovok. E Ida Tapolngon ila ensel ka mluk osep ma timete me deka mluk isak e timete.#10.10 — Emritim basikngen ane ke Testamen Oglou Ina ke Namba 16.41-50.

11E elio ka polou ke isak langka nisngen ma osep leklou tivati e tile ine. E osep tisogo Ida Tapolngon ila pelengon ma parere ite ka oku ane itodong ane ma iteile omur ine. Kesua itodong alo ka taklak ane isuk boto ma yagos. 12E langka gute gesa waiki aitno vri dagar ma iye plau iye itau lama iye due elio epmes ina. 13E langane. Tokngon bitna bitna ka tipolou ke umu ane isak eriar langka tokngon bitna bitna ka tipolou ke osep ka pula keniye. E Ida Tapolngon didi ila elio itau e songon tokngon gesa ma polou ke umu kovok ka umakaranga ine kovok. Langka tokngon gesa polou ke umu ma Ida Tapolngon mosi ekreng e lua umu ma umepren ke tokngon tonari e ma iye due umu umakaranga umevri dagar ine.

Aitno lite la ke Ida Tapolngon vala e la ke sapingen kovok

14Sipmi. Ngong lana ngong ke umu e ma umoulou ke elio ka aitno lumu la ke sapingen. 15Umeile omur kodong deka ngawai ke umu langane. Umu tona ma umawade lou pelengon. 16Kap ka iteinim aki wain ka elio komunio ina e itawai itau ke Ida Tapolngon ine alo ka iteinime due ite ka pula keniye iteneklep ke Krais ina marau. E bret ka kene ka itotuktuke alo ka itangene due ite iteneklep ke Krais pampamu ine. 17Bret ka kene vala dong ka ite pula itangene. Deka bret tonari due ite pula itodong langka pampamu lite ka kene vala.

18Omtomu sisir osep Israel ina urok elio ka langane. Alo ka tingen ongwa okurne leklou ka tikamlue ke bota opmu ina e leklou la ke Ida Tapolngon ane langka due isak tinepir pulu e tinepir pulu kap Ida Tapolngon blang. 19E aitno lumu lange ke lou pelengon ane? Elio ka osep tidue elio opmu ina ke sapingen bitna ane wan lokono? E sapingen wan ka lokono blang? 20Aurou. Ngawai langane. Wan ka osep ka tile Ida Tapolngon kovok tidue elio opmu ina ine tidue ke angelo soulu e tidue ke Ida Tapolngon kovok. Ngawaiki ma umeneklep ke angelo soulu kovok. 21Umu ka umeinim Ida Puda ina wan ma umakaranga umeinim angelo soulu inarak wan blang kovok. E umu ka umangen Ida Puda ina wan ma umakaranga umangen angelo soulu inarak wan blang kovok. 22Langka itodue langane ma itodue Ida Puda aitno engil ke ite. Aitno lumu lange? Udo arit karanga mole ila arit? Aurou lokono.

Itakakai Ida Tapolngon angaine tito la egim

23Itakaranga itodue wan ka pula keniye. E dau wan ka pula keniye tikaranga tilua ite itau kovok. Wan ka pula keniye itau ma itodue. E dau wan ka pula keniye tikaranga tidue ite ma itopolou dagar kovok. 24Aitno lite vri ke ite kovok e silang aitno lite mter langka ma itolua ite tona vala kovok. Aurou. Aitno lite vri ke osep leklou ma itolua isak.

25Umakaranga umangen ong-wa okurne ka osep tidue burong ine ke bilmu. E aitno lumu bitna bitna ine deka umepmi gute ka due burong ine kovok. 26Kesua osep ka tisogo Ida Tapolngon ila pelengon tisogo langane.

“Taklak ane e wan ka pula keniye ka tidong ine ane Ida Puda ila wan.”#10.26 — Emritim pelengon langane ke Testamen Oglou Ina ke Buk Song 24.1.

27E langka gute gesa ka aitno dagar ke Ida Tapolngon kovok pmi umu ma umangen kap iye e umawaiki umala io umakaranga umodue. E umangen wan ka iye kare ke umu e aitno lumu bitna bitna ine kovok e umepmi iye ine kovok. 28E langka gute dong e wai langane. “Imodue elio opmu ina ke sapingen ke ongwa okurne ane.” Deka aitno lumu la ke gute ka wai ke umu e ma umangen kovok. Lama umapagolgol gute tonari aitno ka wade elio itau e elio soulu. 29Ngawai ke aitno lumu ka wade elio itau e elio soulu kovok. Ngawai ke gute silang langane. Ina lange wan ka gute silang waiki due koke waiki due kovok plau ngong? Ngakaranga ngadidi aitno lungong ka ile elio itau e elio soulu. 30Langka ngawai tenkyu ke Ida Tapolngon e ngangen wan gesa ina lange gute silang wai pelengon soulu ke ngong ke wan ka ngawai tenkyu ke Ida Tapolngon ine e ngangene?

31E langane. Langka umangen ngangon koke umeinim aki koke umodue wan silang blang ma umakakai Ida Tapolngon angaine ine. 32E umodue elio gesa ka due osep Yuda ina koke osep Grik ina koke Yesus ila osep aitno lisak soulu ke umu sakam. 33Umakana lou elio ka ngadue. Aitno lungong vri ke ngong kovok e ngadue wan gesa ka lua ngong tona vala kovok. E aitno lungong vri ke osep ka pula keniye e ngawaiki ngadue elio ka aitno lisak itau ine. Kesua ngawaiki ma Ida Tapolngon lua osep pula.

Currently Selected:

1 Korin 10: ANT

Highlight

Copy

Compare