1 Korin 9

Osep tikli Pol ke ila bokongon kovok

1Lange? Wan gesa dong ka plau ngong? Ngong aposel koke aurou? Koke lange? Ngavati Ida Puda Yesus koke aurou? Ngadue Ida Puda ila bokongon e umopolou osep Kristen ke lou bokongon koke aurou? 2Langka osep leklou aitno lisak mter langka ngong aposel kovok dau umeile ngong aposel gesa. Aitno lumu dagar kodong e elio langane nisngen ngong Ida Puda ila aposel.

3Osep leklou tiwade lou elio e ngakoli urok pelengon langane. 4Imi aposel imakaranga imodue ipem ngangon e ipem aki langka ipem klingen ke limem bokongon koke aurou? 5Imakaranga imegi apmang ka aitno lisak dagar ke Yesus e imodue isak kla tilila kap imi langka osep aposel leklou e Ida Puda ina saiver e Pita tidue koke aurou? 6Lange? Imorwo Barnabas vala ma imoboko ke limem mani ma lua imorwo tona e osep leklou tiboko langane kovok? 7Gute sei due bokongon langka gute ola ina e iye tona kli ila wan bitna bitna? Gute sei due yage e due ina ngangon ine kovok? Koke gute sei vaken sipsip e inim inarak sisu kovok?

8Aitno lumu lange? Ngadidi osep aitno lisak vala e ngawai langane? Aurou. Moses ila sogongon wai langane blang. 9Moses sogo langane.

“Umopono bulmakau orsak alo ka tilila e kamsak tipes wit erine ma tarna noklok la kovok.”

Aitno lumu lange? Ida Tapolngon aitno la ke bulmakau vala e iye due pelengon ane? Aurou.#9.9 — Emritim pelengon langane ke Testamen Oglou Ina ke Lo 25.4. 10Aitno vri ke ite e pelengon ane me ke ite blang. Kesua Ida Tapolngon aitno langka ma itodue elio langane. Gute ka yas taklak e usak londo koke wan esle ine e gute ka koklok wit tarna isak orwo tidue bokongon ane kesua tile isak orwo ma tidue ngangon leklou ka polou ke urok bokongon. 11Alo ka imanapapra Ida Tapolngon ila pelengon ke umu ane langka imousak londo koke wan esle ke yage. E oku ane imakaranga imodue ngangon e wan bitna bitna ke umu.

12Langka osep leklou tidue wan sasi boto ke umu deka imi blang ma imakaranga imodue wan pula ke umu. E dau wan ka imakaranga imodue ke umu imodue kovok. Imodong vala lama imodue wan ka dangdang osep leklou ma tinapapra Yesus ila omon itau kovok. 13Umeile langane itau kovok i? Osep ka tidue bokongon ke Ida Tapolngon ila ninu tidue inarak ngangon ke urok bokongon tonari. E osep ka tiboko ke bota opmu ina tidue ongwa okurne leklou ka tidue elio opmu ina ine ke osep ma inarak ngangon. 14Deka langane. Ida Puda kar pelengon langane ke ite. “Osep ka tinapapra omon itau tikaranga tidue inarak ngangon e wan bitna bitna ke osep ka tinapapra omon ke isak.”

15E ngakaranga ngadue elio langane. E dau ngadue kovok. E eknikane blang ngasogo pas ane ma ngadue wan ke umu kovok. Aurou. Ngawaiki ngamete paide lama ngadue langane. Lama osep tipi lou elio ka ngakaranga ngawai langane batne. 16Langka nganapapra Ida Puda ila omon itau ngakaranga ngakakai angain ngong ine kovok. Aurou. Ida Puda kar bokongon ane ke ngong ma ngaboko ine. Aisudo. Langka nganapapra omon itau kovok ma ngadong soulu va. 17Langka ngadidi aitno lungong e ngadue bokongon ane ma ngadue klingen ine. E Ida Puda kar bokongon ane ke ngong ma ngadue. 18E ma ngadue klingen sua? Lou klingen langane. Wan ka ngakaranga ngadue ke lou bokongon ka nganapapra omon itau ane ngadue kovok. Ngaketir lokono ke elio ka nganapapra omon itau adai ke osep. E ketirngen ka ngadue ane langka lou klingen.

Pol ila bokongon lua osep pula

19Ngadong vala e gute silang dong ka plau ngong kovok. E ke aitno lungong ngapolou langka wokboi nating ke osep pula ma ngadue osep pula tisep ke Krais ila osua. 20Alo ka ngadong kap osep Yuda ina ngadidi urok elio ma ngalua isak. E alo ka ngadong kap osep ka tididi Moses ila sogongon ngadidi urok elio ma ngalua isak. E dau Moses ila sogongon plau ngong kovok. 21E alo ka ngadong kap osep ka tididi Moses ila sogongon kovok ngadidi urok elio ma ngalua isak. E dau ngasongon Ida Tapolngon ila pelengon kovok. Aurou. Ngadidi Krais ila pelengon dagar. 22Alo ka ngadong kap osep ka aitno lisak ila dagar dau dagar kovok ngadidi urok elio ma ngalua isak. Ngadidi osep bitna bitna urok elio kesua ngawaiki ngalua isak ma tipolou Krais ila osep. 23Ngadidi elio bitna bitna tonari kesua ngawaiki nganapapra Ida Tapolngon ila omon itau ke osep e ma Ida Tapolngon lua ngong gosok osep ka aitno lisak dagar ke iye ke ila kerengen.

Pelengon ane la ke osep ka tidue resis

24Umeile langane. Osep ka tidue resis isak keniye tisuong dagar e dau gute kene vala due prais. E umu blang umosuong dagar ma umodue prais. 25E osep pula ka tiwaiki timole kolengen bitna bitna ma tiplau pampamu lisak itau ma tipolou dagar. E prais ka tiwaiki tidue mase ma polou okus. E prais ka langka itodue ma polou okus kovok. 26Deka ngasuong ulik ulik kovok. E ngong langka gute ka due evlei kap gute silang itau deka ngauri lungu ulik ulik vala kovok. 27E langane. Nganana engil ma ngakaranga ngaplau pampamu lungong itau. Lama nganapapra omon itau ke osep pula e mase ngong tona ngakaranga ngadue prais kovok.

Currently Selected:

1 Korin 9: ANT

Highlight

Copy

Compare