1 Korin 11

Yesus ila osep tiduni pulu

1E umakana lou elio bitna bitna eriar langka ngakana Krais ila elio. 2Aling aling omtomu sisir ngong e umedidi parerengen ka ngakare ke umu kodong. Deka ngawai langane. Ke elio ane umodue elio itau lokono. 3E ngawaiki ma umeile omur ke pelengon langane. Ida Tapolngon plau Krais e Krais plau osep arang e osep arang tiplau sasarak. 4Langka gute gesa kading apna e wai itau ke Ida Tapolngon koke napapra ila pelengon are langka iye due markan ke Krais. 5E langka apmang gesa kading apna kovok e wai itau ke Ida Tapolngon koke napapra ila pelengon ane langka iye due markan ke ila boget. Ane eriar langka apmang nini apna elilo keniye la. 6Langka apmang kading apna kovok ma iye blou apna elilo bolbolo. E langka iye mnak iye ke elio ka iye blou apna elilo bolbolo koke langka ninie keniye la ma iye kading apna. 7Gute arang ma iye kading apna kovok kesua Ida Tapolngon due iye langka iye tona e kar iye ila elio ka langka ila elio. E apmang tikading aparsak kesua Ida Tapolngon due isak ma tikakai urok soboget angainsak. 8Oglou Ida Tapolngon due gute arang ke apmang pampamu ine kovok. Aurou. Iye due apmang ke gute arang pampamu ine vala. 9E Ida Tapolngon aitno la ke apmang e iye due gute arang ma lua iye kovok. Aurou. Aitno la ke gute arang deka iye due apmang ma lua iye. 10Deka langka apmang wai itau ke Ida Tapolngon koke iye napapra ila pelengon ma iye kading apna. Kesua ane langka nisngen ma iye ini ila boget ila pelengon. E ensel tivati deka tile ine. 11E ke Ida Puda ila osua apmang vala tidong kovok e arang blang vala tidong kovok. Aurou. Apmang dong ma iye lua ila boget e gute arang dong ma iye lua ila asap. 12Mgongon Ida Tapolngon due apmang ke gute arang okurne e eknikane apmang tidivir osep arang. E Ida Tapolngon wan ka pula keniye batne. 13Umu tona ma umawade pelengon ane. Langka apmang kading apna kovok e iye wai itau ke Ida Tapolngon ane elio itau? 14Itosep udo elio nis umu langane. Langka gute arang apna elilo alang ane elio itau gesa kovok. 15E langka apmang apna elilo alang ane langka ila baresngen ka itau. Kesua Ida Tapolngon kar iye ine ma kading apna. 16E langka gute gesa waiki tuk pelengon ane ma iye ile langane. Imedidi elio silang blang kovok. E Ida Tapolngon ila sios leklou blang urok elio silang blang kovok.

Osep Korin ina tidue elio komunio ina itau kovok

17E ngawai pelengon ane ke umu e ngakaranga ngawai lumu elio itau ine kovok. Alo ka umoduni pulu elio itau polou kovok. Aurou. Lumu elio itau gesa kovok. 18Mgongon ngawaiki ma ngawai ke elio tonari. Ngaklingen pelengon langane. Alo ka umoduni pulu umadardar e umotuk opmu pulu ke umu tona. E aitno lungong mter langka pelengon tonari lokono e dau ngaile itau ine kovok. 19Deka aitno lungong mter langka lumu duningen bitna langka dar boto ma umeile itau ke osep ka aitno lisak dagar ke Ida Tapolngon ila elio itau. 20Deka alo ka umoduni pulu e umangen ngangon io ngangon tonari ka umangene ane langka Ida Tapolngon ina ngangon lokono kovok. 21Deka umu kene kene umosuong e umangen umu tona upu ngangon. E osep leklou tidong e sapanga due isak e osep leklou tinim aki wain pula ma amtarsak balilu. 22Lange? Lumu ninu ka umakaranga umangen ine e umeinim ine dong kovok koke aurou? Koke umawaiki umodue markan ke Ida Tapolngon ila osep ka tiduni pulu? E umawaiki ma umodue sudo ka inarak ngangon kovok isak mnak isak ine? Ma ngawai lange ke umu? Ma ngapakuru umu ke lumu elio koke aurou? Aurou. Ke lumu elio tonari ma ngapakuru umu ine kovok.

Ida Puda Yesus ila pelengon ka la ke elio komunio ina

(Matyu 26.26-29 e Mak 14.22-25 e Luk 22.14-20)

23Pelengon ka ngakare ke umu ngadue ke Ida Puda vala. Pelengon langane. Ke epmes ka Judas lai Ida Puda ina ine Yesus due bret. 24E iye wai tenkyu ke Ida Tapolngon ine deka tuktuke deka iye wai ke ila disaipel langane. “Wan ane pampamu lungong ka ngakare ke umu ma lua umu. Ma umangene ma omtomu sisir ngong.” 25Deka alo ka tingen inarak ngangon yagos Yesus due kap gesa ka aki wain dong ine e wai blang langane. “Aki wain ane kontrak oku ina ka ngadue ke ngau marau. Aling aling alo ka umeinim aki wain umodue langane ma omtomu sisir ngong.” 26Yesus ila pelengon nisngen langane. Aling aling alo ka umangen bret e umeinim aki wain ane umapalongo osep ke Ida Puda ina metengen la lama alo ka ma iye iding me.

Iteile ite itau lama itodue elio komunio ina soulu

27Langka gute gesa due markan alo ka iye ngen Ida Puda ina bret e inim ina aki wain deka ila elio soulu. Ila elio langka iye due agegeng ke Ida Puda pampamu ine e ina marau. 28Umu kenmu kenmu umawade lumu elio mgo deka ma umangen bret e umeinim aki wain. 29Kesua gute ka aitno mter itau ke Ida Puda pampamu ine kovok e iye ngen e inim ane ila elio ngene ma Ida Tapolngon mulu iye ine. 30Umu pula umodue elio langane kodong deka lumu arit dong kovok e umapaia e umu leklou umemete kodong. 31E langka itawade itau ke ite kente kente udo elio e itangen e iteinim ma Ida Tapolngon mulu ite ine kovok. 32E alo ka Ida Puda wade udo elio ma iye kar ite wan ka opru ite. Iye due langane ma mosi ite ma iye mulu ite kap osep ka taklak ina kovok.

33Sipmi. Alo ka umoduni pulu ma umangen ngangon umapara ke sudo leklou. 34Langka sapanga due umu ma umangen ke lumu ninu paide. Lama lumu duningen polou soulu e Ida Tapolngon mulu umu ine. E pelengon leklou dau dong e ma ngawai ine alo ka ngame ngavati umu.

Currently Selected:

1 Korin 11: ANT

Highlight

Copy

Compare