Malumbo 106
106
MUSI 21 CHAMAGHERI
1Mwisiseni Mzuri; mng’olieni Mzuri haika, amu ni wedi: amu lusario lwakwe lwaikaa ndarasi.
2Niani eidima kuteta mihiro mibaha yakwe Mzuri: kana kutoranya luisiso lwakwe lwose.
3Wetasiwa wala wegura wuchili: na ula eketa ngalo magheri mose.
4Unikumbuke, ee Mzuri, na mvono uwaketie wandu wako: unizie na lukio lwako.
5Nesa niwone nguwari ya wasawurwa wako: nesa niisejwe na luizihiro lwa mbare yako; nesa ning’ole haika hamwe na uhoja wako.
6Twaketa ng’oki hamwe na waapa wetu: twaareha visiwe, twaketa viwiwi.
7Waapa wetu tewetwarijawo marighio mako ghati ya Misri, tewekumbukawo wiingi wa masario mako: kake weokie wegolong’e ha bahari, ha bahari ya Sham.
8Kake ewakijie hena lwa izina lakwe: nesa aioshe zinya mbaha yakwe kutisiwika.
9Akaibohia bahari ya Sham, ikaoma: huwo akawatika ghati ya heforeke, sa ghati ya shighati.
10Akawakija mkononi ha ula ewasuie: akawakombola mkononi ha mring’a.
11Mbombe jikawafinikira wazo wawo: teokie mwe wawo eshighajike.
12Niho wekaviitikija viteto vyakwe: wakavina luisiso lwakwe.
13Chwii wekaiwaa ndima yakwe: wasiinde mburi yakwe.
14Kake wakalangwa muno shighati: wakamghesha Izuwa hala hesina wandu.
15Akawainga kila wekikundie: akaingija pia kunyonga ngoroni hawo.
16Wakamneng’a Musa pia matuoni: na Harun mshenete wakwe Mzuri.
17Isanga likajughuka likammija Dathan: likaifinikira siri yakwe Abiram.
18Moto ukaaka ghati ya siri yawo: luwerwere lukawashota wawiwi.
19Wakaareha ndama ghati ya Horebi: wakaomba sanamu ichangarushwe.
20Huwo wakakoranya kirumi kyawo: hena mfwanano wa ng’ombe ila mani.
21Wakamwiwaa Izuwa mukija wawo: eketie vindu vibaha ghati ya Misri.
22Ndima ja kuing’asija ghati ya isanga la Ham: na vindu vya kuitusha mbai ya bahari ya Sham.
23Hena iyo akaghamba enewanyamara, isioke Musa msaghurwa wakwe eimuke msongorana wakwe mwanyeni: agharushe hae oro yakwe, asiwanyamare.
24Ee, wakalidaa isanga ledi lila: wasikiitikije kiteto kyakwe.
25Kake wakanunuwika hemeni hawo: wasilisikije ighonda lakwe Mzuri.
26Hena iyo akawawushijia mkono wakwe: nesa awagushe shighati.
27Na nesa aigushe mbeu yawo ghati ya mbare: na awabarasakanye ghati ya masanga.
28Wakakuguranya pia na Baal‐peori: wakamala matasi mawo wefwie.
29Wakamreghija na mihiro yawo: ndwari ikawafumiria.
30Niho Finehasi akaimuka, akaketa wuchili: huwo ndwari ikasuijwa.
31Iki ikatarwa hakwe hena ngalo: hena marika mose ndarasi.
32Wakamreghija pia ha mbombe ja Meriba: mtano ikaoka kiwiwi hena Musa hena lwawo.
33Amu weigolong’ia ngoma yakwe: mtano akateta visiwe na miomo yakwe.
34Tewejinyamarawo mbare: sandu Mzuri ewaaghanyie.
35Kake wekurunganya na mbare: wakakulosha ndima jawo.
36Wakajitumikia sanamu jawo: iji jikaoka mtegho hawo.
37Ee, wakawang’ola waana wawo wa kiume na wa kiche: kuoka matasi hena maluhungu.
38Wakaitisha sakame isina kutekwa, sakame ya waana wawo wa kiume na wa kiche: wewang’olie matasi hena sanamu ja Kanaan, isanga likagerwa ikwe hena sakame.
39Huwo wakagerwa ikwe na ndima yawo: wakatonga wekishinda ghati ya mihiro yawo.
40Hena iyo oro yakwe Mzuri ikaaka wanga ya wandu wakwe: akashishirrwa na uhoja wakwe.
41Akawagera mkononi ha mbare: wala wewasuie wakawaitoria.
42Maring’a mawo wakawainyala: wakawikwa si ya mkono wawo.
43Kandu keingi akawang’ola: kake wakamregija na mburi yawo, wakasejwa si ghati ya owiwi wawo.
44Kake akauyoa wasi wawo: ekinasikie kiiyo kyawo.
45Akawakumbukia aghanyo lakwe: akatajaiye hena wingi wa malusario makwe.
46Akawaosha pia kusariwa: na wala wose wewatika wechungiwe.
47Utukije, ee Mzuri Izuwa wetu, na utuwunganye kufuma mbare: tulianjele izina lishenete lako na tukuisise ghati ya luisiso lwako.
48Atasiwe Mzuri, Izuwa wa Israeli, too ndarasi mtano ndarasi: na wandu wose waghambe, Esai; Mwisiseni Mzuri.
Currently Selected:
Malumbo 106: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
