Marko 6
6
1Akafuma uko, akaza ghati ya isanga lakwe ye; wakamratera waanalosha wakwe. 2Mtano ikioka sabato, akawoka kulosha ghati ya sunagogi, weingi wakasikia, wakarighiwa, wekiteta, Uu awoniahi ama? Kucha ani uku eingiwe, na zinya ani iji jioho mikononi hakwe? 3Si uu eye musongoa, mwana wakwe Maryamu, na mundwawo Yakobo, na Yose, na Yuda, na Siman? na warumburie si aha hetu? Wakashishirwa naye. 4Akawawurra Yesu ti, Mroti tesowa nganyi nde ghati ya isanga lakwe na hena mbare yakwe, na ghati ya nyumba yakwe. 5Nete teidime uko kuareha zinya, nde atewaghera mikono wewadjua wesiwengi, akawahodja. 6Akarighiwa amu wesuie kuitikija; akajunguluka ghati ya vikaa mbai jose ekilosha.
7Akawaitanga wala ikumi na weri, akawoka kuwatuma weri weri, akawainga zinya wanga ya maluhungu mawiwi. 8Akawaaghanya wasitike kindu cha nzieni, nde isibo tiki, nete kikuchu, nete ibumunda, nete pesa ghati ya ngana, 9nde wekikuchungia viratu, wasidoke kanzu mbiri. 10Akawawurra, Mneikamuingie ghati ya nyumba, muikae uko mtano munetonga henyu uko. 11Nawo wesimukundie nete wesimusikia, mukifuma uko mukutekute hae purughushe ioho maghuni henyu, hena kuwonja hawo. Amin namburra, ineoka kutikiana hena Sodoma na Gomorra musi wa wuchili, kukela kaa ila. 12Wakafuma wakatinda wagharuke; 13wakakinya maluhungu meingi; wakawira na mafuta weingi wewadjua, wakahoa.
14Akasikia mfumwa Herode, amu izina lakwe lina nguma, akateta, ti Yohana Mbatizaji atewuka ghati ya wefwie, na amu ii zinya jaketika hakwe. 15Wengi wakateta, ti ni Eliya; wengi wakateta, ti mroti, sandu umwe wa waroti. 16Ekisikia Herode akateta, ti Niye Yohana, nimtemie mtwi, ula atewuka ghati ya wefwie.
17Amu Herode mwenye etumie akamgura Yohana, akamchunga kichungoni, hena lwa Herodia mche wakwe Filipo mundwawo, amu ambaika. 18Amu Yohana amburra Herode, ti teiwe hako kuoka na mche wa mundwenyu. 19Amu ii Herodia akamsua akakunda kumkoma, asiidima; 20amu Herode eokie ekimwondoka Yohana, ekimtisiwa mundu wa kididi na wedi, akamyoa; ekimsikia, akaareha vingi, akamsikia hena kuizihirwa. 21Mtano ukioka musi wa kuwe, Herode ekinaareha itasi, musi wa kuwoneka kwakwe, hena wabaha na njama na wandu wa kuwoka wa Galilaya; 22ekiingia mwana wa kiche wa Herodia, akatoroka, akwaizihirija Herode nawo weikee naye, mfumwa akamburra mbora, Uombe hangu kila ukikundie, nami ninekuinga. 23Akamraria, ti Kila ukikundie hangu, ninekuinga, mtano kibaje cha kifumwa changu. 24Ye ekifuma akamburra mee Niombe kini? Akamburra, Mtwi wa Yohana Mbatizaji. 25Ekiingia chwi wangu ha mfumwa, akaomba, ekiteta, Nikundie uniinge ekuade ghati ya mwanje mtwi wa Yohana Mbatizaji. 26Mfumwa akaoka na wukiwa wingi, hena lwa seso nawo weikee naye tekundie kumwima. 27Chwi mufumwa akatuma njama, akamburra mtwi wakwe uetwe. 28Naye akatonga akamtema mtwi kichungoni, akaete mtwi wakwe ghati ya mwanje, akamwinga mbora, mbora akamwinga mee. 29Waanalosha wakwe wakasikia, wakaza wakatika mning’a wakwe, wakauwika mbireni.
30Mitume wakawunganyika ha Yesu, wakamliya mburi ja vindu vyose, vila weviarehe na vila waviloshe. 31Akawawurra, Zooni unywi wenye hena mbiso handu hesina wandu, musowoke hadongo: amu weoho weza na wetonga weingi, nete tehena handu mtano ha kula.
32Wakatonga hawo handu hesina wandu hena mbiso hena ngalawa. 33Matorano wakawawona wekitonga, weingi wakamtisiwa, wakasara uko na maghu ghati ya kaa jose, wakawarongoria wakaza hamwe hakwe. 34Mtano ekisea akawawona matorano meingi, akawasaria, amu weikee sa maghonji mesina mrisha, akawoka kuwalosha muno.
35Mtano ingeriaha magheri mekineta waanalosha wakwe wekimzia wakateta, ti, handu aha hesina wandu, na ingheriaha magheri maneta, 36uaghane nawo, wawone kutonga mbuweni mbai jose na vikaa, kukuzoria kidjo, amu tewena kidjo. 37Ekitalua akawawurra, Waingeni unywi wale. Wakamburra, Tutonge tuzore vidjo vya dinari maghana meri tuwainge wale? 38Akawawurra, Mabumunda amo muna? Tongeni mreyoeni. Wekitisiwa wakateta, Masano, na nguluma mbiri. 39Akawaaghanya waikae si wose, mikayi na mikayi, wanga ya mani mabisi. 40Wakaikaa si siri na siri hena ighana, na hena makumi masano. 41Naye akmauha mabumunda masano na nguluma mbiri, akayoa wanga, akang’ola haika, akamabaa mabumunda, akawainga waanalosha wakwe, wawone kuwaetie wala, najo nguluma mbiri akaghawanya hena wose. 42Wakala wose wakaighuta. 43Wakadodola malumong’o ma kuizuja mbinda ikumi na mbiri, na ghati ya nguluma. 44Wakaoka wemalie mabumunda maghana makumi masano wome.
45Chwi akawasingirija waanalosha wakwe waingie ngalaweni wakarongora sela ya Betsaida, mtano ye aneikaaghane matorano. 46Mtano ekinashighija akatonga nduwini kuomba. 47Mtano ikioka chamagheri, ngalawa ioho ghati ya ndiwa, naye niye mwenye ghati ya si. 48Akawona wekishishirwa na kujuta, amu ngungu yeokie wanga yawo. Mtano sa ngata ya kannne ya kio eza hawo, ekisela wanga ya ndiwa, akakunda kuwavetia. 49Nawo wekimbona esela wanga ya ndiwa, wakaghamba ti ni kiwuri, wakaloza. 50Amu wose wakambona, wakaitalwa. Chwi akateta nawo, akawawurra, Hujeni, nimi, musigurwe ni fole. 51Akakwea nawo ghati ya ngalawa; ngungu ikaiting’o; wakarighiwa ndeni hawo muno muno, wakaitalwa. 52Amu tewekumbuke mabumunda, amu ngoro jawo jeokie tejiwona. 53Wekikela wakaza isanga la Gennesereti, wakafika kiwambara.
54Mtano wekifuma ghati ya ngalawa, chwi wekimtisiwa, 55wakasara ghati ya isanga lila lose, wakawoka kuwatika ghati ya wui weokie wewadjua, wekisikia handu ti eoho. 56Naye ekiingia ghati ya vikaa, kana kaa, kana mtemeni, wakawawika wewadjua kichindeni, wakamsemba wawona kukuwara mtano litiriwo la suke yakwe, nawo wemkuware wakahoa.
Currently Selected:
Marko 6: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
