Marko 5
5
1Wakafika sela ya keri ya ndiwa, ghati ya isanga la Wagadareni. 2Ekisea ghati ya ngalawa, chwi akamtorana mundu ghati ya mbira mwenye luhungu luwiwi, 3eokie na maikao ghati ya mbira, nete tehena mundu eidima kumchunga, mtano hena nyise. 4Amu echungiwe keingi hena pingu na nyise, na nyise jichwiwe naye, na pingu jibajiwe naye; nete teidima mundu kumhembereza. 5Naye misi yose kio na hemusi ghati ya nduwi na ghati ya mbira, ekiiya na ekikuchwa na mabwe. 6Ekinambone Yesu hae akasara akamwinamia, 7ekiiya na ighonda ibaha ekiteta, Nina kini nawe, Yesu Mwana wa Izuwa eoho wanga? Nakuraria hena Izuwa, usiniwinye. 8Amu amburra, Luhungu luwiwi, ufume ghati ya mundu! 9Akambujanya, Izina lako niani? Akamtalua akamburra, Legioni izina langu, amu uswi weingi. 10Akamsemba muno, asiwaingije hae some ya isanga. 11Heokieho ghati ya nduwi ifio la nguwe ibaha likirishwa. 12Wakamsemba maluhungu mose wekiteta, Utuingije hena nguwe, tuwone kujiingia jila. 13Chwi Yesu akakunda. Maluhungu mawiwi wekifuma wakaingia ghati ya nguwe, ifio likatonga wanguwangu mawongowongo mtano na ndiwa, wakaoka sa maghana makumeri, wakanyamwa na ndiwa. 14Nawo werishie nguwe wakamatuka, wakatoranya mburi ghati ya kaa na ghati ya miteme: wakaza wawone nikini kiokie. 15Wakafika hakwe Yesu, na kumbona ula wa luhungu eikee edokie na mwenye kucha, eokie nawo Legioni, wakaondoka. 16Nawo wewonie wakatinda sandu eokie hakwe wa luhungu, na vindu vya nguwe. 17Wakawoka kumsemba afume ghati ya mihaka yawo. 18Naye ekiingia ngalaweni, ula eokie na luhungu akamsemba aoke hamwe naye; 19nete Isa temshigie, kake amburra, Tonga hako nyumbeni hako hena wandu wako, uwawurre mburi sandu Mzuri ekuketie, akakusaria. 20Akatonga hakwe akawoka kutinda ghati ya Dekapoli sandu emketie Yesu, wose wakarighiwa.
21Ekinaidiwe Yesu kukelawa ghati ya ngalawa mtano sela, wakakuwunganya matorano meingi mtano hakwe, naye eoho mbayi ya ndiwa.
22Akaza hakwe mwe wa wabaha wa sunagogi, izina lakwe Yairo, mtano ekimbona akagwa maghuni hakwe, 23akamsemba muno, ekiteta, ti, Mwana wangu wa kibora mdongo ni ghati ya kuidiwika kwakwe, nde uze umghere mikono awone kukia, naye eneoka na moo. 24Akatonga naye, wakamratera matorano meingi, wakamduduradudura.
25Na muche efumiwe ni sakame miaka ikumi na miri, 26eketike meingi na waghanga weingi, akaiha evihete vyose, nete teweiwaye, kake kashi mawiwi maneta, 27esikie vindu vya Isa, ekiza nyuma yakwe akaikuwara suke yakwe; 28amu etetie, ya kuoka mtano suke jakwe nikajikuwara, ninekia. 29Chwi likaoma kudofa kwa sakame yakwe, akatisiwa murini ya kuoka ahoa ghati ya ibigho. 30Chwi Yesu ekitisiwa ndeni hakwe ti zinya ifumie ekigharuka ghati ya matorano, akateta, Niani akuwara suke jangu? 31Wakamburra waanalosha wakwe, Wawona matorano mekududura, nawe uteta, Niani anikuwara? 32Akayoa kumbona ula aketa huwo. 33Muche ekiingiwa ni fole, na ekidedema, ekitisiwa, kila kioho ndeni hakwe, akaza akamgwiia, akamburra vya kididi vyose. 34Akamburra, Mwana wa kiche, kuitikija kwako kwakukija, tonga hako na kiboha, uhoe ghati ya kubighwa kwako.
35Mtano ekioka ghati ya kuteta, waza ghati ya mbaha wa sunagogi, wekiteta, ti, Mwana wa kiche wako afwa; niniwa umrisha wukiwa mlosha? 36Chwi Yesu ekisikia kiteto kitetiwe, amburre mbaha wa sunagogi, Usiondoke, itikija tiki. 37Nete teshighie mundu aratere naye, nde Petro, na Yakobo, na Yohana mundwawo Yakobo. 38Wakaza ghati ya nyumba ya mbaha wa sunagogi, akayoa kilozo nawo weiya na weareha kiiyo muno. 39Ekiingia awawurra, Nikini muketa kilozo na kuiya? Mwana tefwaye, ateshinjia. 40Wakamsekia. Naye ekiwang’ola wose, auha naye wawee wa mwana na mee, nawo weoho hamwe naye, na aingia ehayejwe mwana. 41Akamgura mkono mwana, amburra, Talitha kumi, niyo igharushwe, Kamwana, nakuwurra, wuka. 42Chwi akaimuka kamwana, akasela, amu efikie miaka ikumi na miri, wakarighiwa muno muno. 43Akawaaghanya muno, mundu asikitisiwe iki, akahamba aingwe kidjo.
Currently Selected:
Marko 5: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
