Marko 4
4
1Akawokawa kulosha mbai ya ndiwa, wakawunganyika matorano meingi, mtano mwenye ekikwea hena ngalawa akaikaa ghati ya ndiwa, na matorano mose weoho mbai ya ndiwa, wanga ya si.
2Akawalosha meingi na mafwanano, akawawurra ghati ya kichei chakwe, 3Sikieni, Mhanda mbeu efumie ahande, 4ikaoka ghati ya kuhanda, iyo ikagwa wanga ya nzia, jikaza ndeghe ja wanga jikaila. 5Ingi ikagwa hena mabwe, hesina teri nyingi, chwi ikamea, 6amu teri yakwe teitongie si, mtano zano ikiwaa ikaoma, na amu teina kikolo ikafwa. 7Ingi ikagwa hena mivwa, mivwa ikaeha, ikaidudura, nete teighera. 8Ingi ikagwa wanga ya teri yedi, ikaghera ikimea na ikieha, ikaete imwe makumi matatu, na imwe makumi matandatu, na imwe ighana. 9Akateta, Ena masikio ma kusikia, asikie.
10Ekinaoka hesina wandu, wemjunguluke na wala ikumi na weri wakambujanya fwanano. 11Akawawurra, Mwaingwa unywi kutisiwa mbiso ya ufumwa wa Izuwa, wala weoho some wawurrwa vyose hena mafwanano; 12wekiyoa wayoe, nete wasiwone, na wekisikia wasikie nete wasitisiwe, wasigharuke hose, wakawushijiwa kutekwa. 13Akawawurra, Tomutisiwa fwanano ili? munetisiwaze mafwanano mose?
14Ehandaye ehandie kiteto. 15Wala weoho nzieni, kiteto kihandwaho, niwo wesikia, chwi eza Shetani, ekiuha kiteto kihandiwe ghati ya ngoro jawo. 16Na awa ni sa wawo wehandiwe wanga ya mabwe, niwo wesikie kiteto, chwi wekiuha na kuizihirwa; 17nete tewena kikolo hawo, kake ni hena magheri, mtano ukioka ukiwa kana kukinya hena lwa kiteto, chwi washishirwa. 18Nawo wengi niwo wehandiwe ghati ya mivwa, 19niwo wesikie kiteto, na lurindo lwa masanga ama, na lukengiko lwa mali, na luso lwa jingi jishighajika makaingia makadudura kiteto, nacho kiokie tekigera. 20Nawo niwo wehandiwe ghati ya teri yedi, wesikia kiteto, nawo wekikunda, na wagera, mwe makumi matatu, mwe makumi matandatu, mwe ighana.
21Akawawurra, Taa teiza igerwe si ya kizembe, kana si ya wui? isigerwa ghati ya kindu cha taa? 22Amu tehena iwiswe, isiwonwe, nete ioho ijuwiwe, nde iwone kujughuka. 23Mundu ekioka na masikio ma kusikia, asikie.
24Akawawurra, Yoeni muvisikia. Amu kighe sho mugheshawo munegheshiwa naunywi, na ineti jwa henyu musikia. 25Amu mundu ena, eneingwa, naye esina, mtano kila ena eneuhwa.
26Akateta, Huwo ni ufumwa wa Izuwa, 27ni sa mundu ekimiza mbeu ghati ya si, ekishinjia na ekiwuka kio na hemusi, na mbeu ikimea ikaeha, sa esimaije uu; 28amu si yenye igera, kuwoka ijani, la keri shamwale, ekuade ngano ikuyie ghati ya kishamwale. 29Igeraho ndunda chwi eingija ibengele, amu kufindika kuoho.
30Akateta, Nifwananije na kini ufumwa wa Izuwa? kana hena fwana ani niuarehe fwana? 31Sa ndembe ya kharadali, ikahandwa wanga ya si, niyo ndongo kukela mbeu jose jioho wanga ya si. 32Nayo ikinahandwe, ieha, mtano ikaoka mbaha kukela mani mose, na kuketa mbagha mbaha, mtano weidima ndeghe ja wanga kuikaa si ya mvuri wakwe.
33Hena mafwanano mengi sa ii akawawurra kiteto sandu weidima kusikia: 34hesina fwanano tetetie nawo; hena mbiso akawatindia waanalosha wakwe mose.
35Naye akawawurra musi ula ikioka chamagheri, Tukele mtano sela ya keri. 36Nawo wakaaghana na matorano, wakamtika sawundu eokie ghati ya ngalawa, na ngalawa jingi ndongo jioho naye. 37Ikaoka ngungu mbaha ya mbeho, mawimbi makawiritwa wanga ya ngalawa, mtano ikawoka kuizua. 38Naye eokie ghati ya shetri ekishinjia wanga ya iseto. Nawo wakambusha wekimburra, Mlosha, touyoa we ti twateka? 39Naye ekiwuka akaibohia ngungu, akaiwurra ndiwa, Huja chwi, uswijwe. Ngungu ikaiting’o, ikaoka kuhoiya kubaha. 40Akawawurra, Nikini mba fole huwo? Nize tomna kuitikija? 41Wakaondoka fole nyiingi, wekiwurrana, Uu niani, ti na ngungu na ndiwa jamwinga isikio?
Currently Selected:
Marko 4: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
