Marko 3
3
1Akaingiawa ghati ya sunagogi, heokieho uko mundu mkono wakwe uwiye: 2wakamyoa, ti musi wa sabato enemhodja, wawone kumlinganya. 3Akamburra mundu mwenye mkono uwiye, Imuka ghati na ghati. 4Akawawurra, Ni kyedi musi wa sabato kuketa nezo kana kuketa owiwi? Kuhodja moo kana kukoma? Wakahuja. 5Naye ekiwayoa na oro, ekiregija hena kuoka jidindie ngoro jawo, akamburra mundu, Ronga mkono wako. Akauronga, mkono wakwe ukahojwa, wedi sa wa keri. 6Wekifuma chwi Mafarisayo wakala ngiliwata na Maherodiani wanga yakwe, wamteshe.
7Yesu akatonga hakwe hamwe na waanalosha wakwe mtano na ndiwa. Wandu weingi muno wa ghati ya Galiliya wakamratera, 8na ghati ya Uyahudi, na ghati ya Yerusalemi, na ghati ya Idumayo, na sela ya keri ya Yardeni, nawo weoho afuhi na Turo na Sidon, weingi muno, wekisikia sandu eareha, wakamzia. 9Akawawurra waanalosha wakwe ngalawa ndongo iikae afuhi yakwe, hena matorano wasimwitale. 10Amu akawahodja weingi, mtano wakamugwia, wawone kumukuwara weokie na mabigho. 11Na maluhungu mawiwi, wekinambone, wakagwa msongorana wakwe, wakaiya, wekiteta, Niwe Mwana wa Izuwa. 12Akawabohia muno wasimghambe.
13Akakwea ghati ya nduwi, akawaitanga ewakundie, wakaza hakwe. 14Akaareha ikumi na weri wawone kuoka hamwe naye, naye awone kuwatuma kutinda, 15na kuoka na zinya ja kuhodja ndwari na kukinya maluhungu. 16Na Siman akamwinga izina Petro; 17na Yakobo wa Zebedayo, na Yohana mdwawo Yakobo, akawainga izina Boanerge, niyo waana wa kururuma; 18na Andrea, na Filipo, na Bartolomayo, na Mattayo, na Tomaso, na Yakobo wa Alfayo, na Thaddayo, na Siman Mkananayo, 19na Yuda Iskariota emng’olie.
20Wakaza nyumbeni, matorano wakawunganyikawa, mtano teweidime nete kula kidjo. 21Nawo wa hakwe wakasikia, wakaza kumsingirija, amu wakaghamba, ti kucha kwakwe kwateka.
22Nawo watami weseiye ghati ya Yerusalemi wakateta, ti ena Beelzebul, na ti hena mbaha wa maluhungu amakinya maluhungu. 23Naye akawaitanga akawawurra hena mafwanano, Eidimaze Shetani kumkinya Shetani? 24Na idje ufumwa wabalijwa wanga yakwe yenye towuidima kuimuka ufumwa ula. 25Na idje nyumba ikabalijwa wanga yakwe yenye teidima kuimuka nyumba ii. 26Na Shetani ekiwuka wanga ya mwenye akakubalija, teidima kuimuka, kake awona kuidiwika. 27Teidima mundu ekiingia nyumbeni ha mundu mung’eno, kuhora vindu vyakwe, esimchunga ini ula mung’eno, niho eneidima kuhora nyumba yakwe. 28Kididi namburra, ti weneshighiriwa waana wa Adamu matekwa mose, na marigho wenemateta, 29nde ye enemteta righo Ngoma Mshenete, tena kushighiwa mtano ndarasi, 30kake imbe wuchili wa ndarasi, amu wetetie, Ena luhungu luwiwi.
31Wakaza wandwawo na mee, nawo wekiimuka some wakatuma hakwe wekimwitanga. 32Matorano wakaikaa wekimjunguluka, wakamburra, Mamako na wandwenyu some wakuenda. 33Akawatalua, ekiteta, Niani eye iya kana wandwetu? 34Ekiwayoa mbai jose weikee wemjunguluke, ekiteta, Yoeni, iya na wandwetu. 35Amu mundu enekiareha ekikundie Izuwa, uu ni mundwetu, na rumburia, na iya.
Currently Selected:
Marko 3: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
