Luka 6
6
1Ikaoka hena musi wa sabato, ekivetia ghati ya miteme ya ngano, waanalosha wakwe wakatunda vishamwale, wakala, wekisighisa mikononi hawo. 2Na wandu wa Wafarisayo wakawawurra, Hena kini kuareha kindu kisiwe misi ya Sabato? 3Akatalua Yesu, akawawurra, mtano kiteto iki tomusomie, Daudi ekiarehe, ekinaoke na zaa, ye na wala weokie hamwe naye? 4Ti eingie nyumbeni ha Izuwa, akamauha mabumunda ma kuwondja, akala, akawainga na wala waghenje; namo tekiwe kula nde hena wakara wenye? 5Akawawurra, ti, Mwana wa Adamu ni Mbaha wa Sabato.
6Ikaoka hena sabato ingi, ekiingia sunagogi akalosha; heokie na mundu, mkono wakwe wa kuume uwie. 7Watama na Wafarisayo wakamyayia ti ngea enehodja mundu musi wa sabato, natiri nesa wawone kumlinganya. 8Ye akatwarija makusaro mawo, akamburra mundu ula eokie na mkono uwie, Wuka, uimuke ghati na ghati. 9Akawuka, akaimuka. Akawawurra Yesu, Nambujanya unwi, kiwe hena musi wa sabato kuketa nezo kana kuketa kiwiwi? kukija ngoro kana kuitesha? 10Akajunguluka ekiwayoa wose, akamburra mundu ula, Ronga mkono wako: akauronga; mkono wakwe ukakia. 11Wakaizua ni kuwukwa, wakatetana wonawo wamketeze Yesu.
12Ikaoka misi ila, akafuma kutonga nduwini kuomba, akashinda kio bagha ekimwomba Izuwa. 13Na hemusi hekinaoke, akawaitanga waanalosha wake: akasawura mwondo ikumi na weri, akawainga awa izina la wasu (apostolos); 14Siman akamwinga izina la Petro, Na Andrea mundwawo, Yakobo na Yohana, Filipo na Bartolomayo, 15Mattayo na Tomaso, Yakobo wa Alfayo, na Siman eitangwe Zelote, 16Yuda wa Yakobo, na Yuda Iskariota, niye emng’olie. 17Akasea hamwe nawo, akaimuka handu heringanane, na matorano ma waanalosha wakwe na wandu weingi, wefumie Uyahudi na Yerusalemi, na kiwambara cha Turo na Sidona, wezie wemsikije, na wehodjwe ndwari jawo; 18na wala werishijwe wasi ni maluhungu mawiwi, wakahodjwa. 19Matorano mose wakakunda kumkuwara, amu zinya jifumie hakwe, jikawahodja wose.
20Akawawushijia meso waanalosha wakwe, akateta, Keba unwi wakiwa, amu ufumwa wa Izuwa ni wenyu. 21Keba unwi mna nzaa ingeriaha, amu muneighuta. Keba unwi muiya ingeriaha, amu muneseka. 22Keba unwi muneikamsuwe ni wandu, weneikawamkinye, weneikawambohie, weneikawamtaghie izina lenyu sa iwiwi, hena lwa Mwana wa Adamu. 23Izihirweni musi ula, mung’are, amu kididi awahache yenyu nyingi wanga, amu ni huwo wawawee wawo wewaketie waroti. 24Kake wukiwa wenyu wenye mali! amu muidiwa kuuhia awahache yenyu. 25Wukiwa wenyu muighute! amu munesikia nzaa. Wukiwa wenyu museka ingeriaha, amu muneshiniwa na muneiya. 26Wukiwa wenyu muneikamuisiswe ni wose, amu ni huwo wawawee wewaarehie waroti wa maongo. 27Kake namburra unwi musikije, Kundeni wazo wenyu, mbakete nezo wemusuie; 28watasieni wala wemrara unwi, waombieni wemchunganja. 29Ekubigha luhi isaa, umgharushijie na la keri; na ekusoka suke ya wanga, usimswije atike ya keri. 30Wose wekuomba, uwainge; na ekuhakua vindu vyako, usivikundewa. 31Na sandu mkundie wandu kumuketia unwi, na unwi mbaketie huwo. 32Na mukikunda wala wemkundie unwi, ni nezo ani? amu mtano wenye ng’oki wakunda wala wewakundie. 33Kana mukiwaketia nezo wala wemuketia nezo unwi, ni nezo ani? amu mtano wenye ng’oki waketa huwo. 34Kana mukiwahakua wala muwaing’idakie kuuhia hawo, ni nezo ani? amu mtano wenye ng’oki wahakua wenye ng’oki, wauhie huwo. 35Kake kundeni wazo wenyu, areheni nezo, hakueni musiing’idakie kuuhiawa, na awahache yenyu ineoka nyingi, muneoka waana wakwe eoho wanga, amu Ye ni wedi hena wala wesimwinga haika na wawiwi. 36Ni huwo muoke na lusario, sandu waweo wenyu ena lusario. 37Musichilie, tomunechiliwa: musinyale, tomunenyalwa: shigieni, muneshigiwa. 38Ng’oleni, na unwi muneng’oliwa; kighesho kyedi, kichindiwe, kikushijwe, kizue pacha, wenewainga unwi mbafuni; amu kighesho kila mugheshijia unwi, nicho na unwi munegheshijiwa.
39Akawawurra mfwanano, Ebajike meso aidima kumrongoria ebajike meso? Tewenegwa wose weri iwongoni? 40Mwanalosha si mbaha kukela mlosha wakwe, kake mundu ose eidiwika kuloshwa eneoka sa mlosha wakwe. 41Wayoaze ingeriaha kakuku ijisoni ha mundwenyu, na ikuku ijisoni hako touliwona? 42Uidimaze kumburra mundwenyu, Mundwetu, nishiga nikung’ole kakuku ijisoni hako, we mwenye wasayoa ikuku lioho ijisoni hako? Mkeleki we, kuwoka ng’ola ikuku ijisoni hako, niho uneikauwone nezo kung’ola kakuku ijisoni ha mundwenyu. 43Amu tehena muti wedi ugera ndunda mbiwi, nete tehena muti mbiwi ugera ndunda jedi. 44Muti ose unetisiwika hena ndunda jakwe; amu wandu tewefindika tini mivweni, nete tewefindika zabibu ghati ya miwero. 45Mundu wedi an’gola kindu chedi ghati ya mali medi ma ngoro yakwe, na mundu mbiwi ang’ola kindu kiwiwi ghati ya mali mawiwi ma ngoro yakwe; amu kindu kioho ngoroni, nicho kitetwa ni itumbu.
46Hena kini muniitanga, Mzuri, Mzuri, musivigura ivi niviteta? 47Mundu ose eza hangu, esikie viteto vyangu, ekiviareha, ninembondja efwanane sa ani. 48Ni sa mundu ajenga nyumba, ekikula na ekifora muno, na kugera kwakwe mabweni; mlombia ukaza, mfuro ukabigha nyumba ila hena zinya, usiidime kuidedemisha, amu iokie na kuwoka mabweni. 49Kake ula esikia esiarehe, ni sa mundu ajenga nyumba ghati ya si esiforia kuwoka; mfuro ukaibigha hena zinya, ikagwa turu na turu; kubaika kwa nyumba ila kukaoka kubaha.
Currently Selected:
Luka 6: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.