Luka 7
7
1Na ekinaidiwe viteto vyakwe vyose masikioni ha wandu, akaingia Kapernaum.
2Heokie na njama, muzoro wakwe eokie ewadjua ekienda kufwa, ekundiwe muno. 3Ekinasikie mburi ja Yesu, akamwingijija waghosi wa Wayahudi, akamuomba aze amhodje muzoro wakwe. 4Nawo wekinafike ha Yesu, wakamuomba hena lunyarki, wekiteta, ti Ni wedi aarehiwe knidu iki nawe, 5amu ekundie mbare yetu, mtano etujengie sunagogi. 6Yesu akatonga nawo. Na ekinaoke si hae na nyumba, njama ula akatuma hakwe wambuyae, ekimburra, Mzuri, usikurishe wukiwa: amu mi siidima uingie we si ya ghu yangu: 7nete hena iyo siidime mwenye kuza hako, kake utete hena kiteto tiki, na mwana wangu enehoa. 8Amu na mi ni mundu nigeriwe si ya wabaha, mwenye wabwange si yangu; nikimburra mwe, Tonga, etonga; na ungi, Izoo, eza; na muzoro wangu, Areha huwo, careha. 9Yesu ekinasikie ivi akarighiwa hena lwakwe, akawagharukia matorano wemratere, akaghamba, Namburra unwi, mtano ghati ya Israeli siwoniemi luitikijo sa ulu. 10Nawo wetumiwe wekinahunduke nyumbeni, wakambona muzoro ahoa.
11Ikaoka ikuade, akatonga kiongo kiitangwa Nain; wakatikana naye waanalosha wakwe na wandu weingi. 12Na ekinasongeria mbenge ya kiongo, heokie na kimba kitikiwe some, mwana mjenye wa mce, na efwiwe ni mume; na wandu weingi wa kiongo hamwe naye. 13Na Mzuri ekinambone akamsaria, akamburra, Usiiya. 14Akaza akilikuwara ilalo: wala watiki wakaimuka. Akaghamba, Mbwange, nakuwurra, wuka. 15Ula efwie akaikaa, akawoka kuteta. Akamwinga mee. 16Fole ikawagura wose, wakamwisisa Izuwa, wekiteta, Mroti mbaha awuka hetu: na, Izuwa awazia wandu wakwe. 17Mburi jakwe iji jikafuma ghati ya Uyahudi wose, na ghati ya masanga mose mejunguluka.
18Na waanalosha wakwe Yohana wakamtindia vindu ivi vyose. 19Yohana akawaitanga waanalosha wakwe weri, akamwingijia Mzuri, ekiteta, We niwe ula eza, kana tumyoyie ungi? 20Na wandu awa wekinamzie wakaghamba, Yohana Mbatizaji atutuma hako, ekiteta, We niwe ula eza, kana tumyoyie ungi? 21Hena magheri mala akahodja weingi ndwari jawo, na kuwadjua, na maluhungu mawiwi, webajike‐meso weingi akawainga kuwona. 22Akatalua akawawurra, Tongeni, mremtindia Yohana vila mwaviwona na mwavisikia; webajike‐meso wewona, wechingilika wetonga, wenye kusumura wezerrijiwa, weming’ani wasika, wefwie wawuka, wakiwa watindiwa sumu yedi. 23Na keba niye esishishirwa hangu.
24Wekinatonge hawo wasu wa Yohana, akawoka kuteta na matorano mburi yakwe Yohana, Nikini mufumie mtano ishighati kuyoa? Igugu likidedemishwa ni ngungu. 25Kake nikini mufumie kuwona? Mundu edokie suke nana? Wenye suke ya kuisiswa na kidjo chedi waikaa nyumbeni ha wafumwa. 26Kake nikini mufumie kuwona? Mroti? Kididi, namburra, na mbaha kukela mroti. 27Uu niye etamiwe,
Yoa, namtuma msu wangu msongorana wa wusho wako,
Eneareha nzia yako msongorana wako.
28Namburra unwi, Ghati ya wandu wewoniwe ni wache tehena mbaha kukela Yohana: kake ula mdongo ghati ya ufumwa wa Izuwa ni mbaha kukela ye. 29Na wandu wose wekinasikie, na weuha lushango, wakamwisisa Izuwa, wekibatijwa hena lubatijo lwa Yohana. 30Kake Wafarisayo na waana wa Kiteto wakasua mburi ya Izuwa wekioka tewebatizwa naye. 31Ninewafwananisha na kini wandu wa irika ili? 32Na nikini wafwanana nacho? Wafwanana na waana weikaa si kichindeni, wekighambana wekiteta, Twamubighia unwi mtorito, nete musiwine; twamuiyiya, nete musiije masoji. 33Amu Yohana Mbatizaji eza, esila kidjo nete esinywa mawa, mukateta, Ena luhungu. 34Mwana wa Adamu eza ekila na ekinywa, mukaghamba, Yoa mundu mkunda kula na mwengeji, mbuyae weuha lushango na wenye ng’oki! 35Kucha kukaisiswa hena waana wakwe wose.
36Mfarisayo mwe akamuomba ale hamwe naye, akaingia nyumbeni hakwe Mfarisayo, akaikaa si. 37Na mche wa kiongo kila mwenye ng’oki, ekinatisiwe aikaa nyumbeni ha Mfarisayo, akaete alabastro ya marhamu, 38akaimuka nyuma maghuuni hakwe, eiya, akawoka kumiminia masoji maghuni, akamahaija na nyui ja mtwi wakwe, akamanyonyoza muno maghu makwe, akamawira marhamu. 39Ekinawone Mfarisayo ula emwitanga, akaghamba ngoroni hakwe ekiteta, Uu kwakicha ni mroti kwakicha ekitisiwe niani na ni mche ani uu emkuwara, ya kuoka ni mwenye ng’oki. 40Akatalua Yesu akamburra, Siman, nina kiteto cha kukuwurra. Akateta, Mlosha, teta. 41Heokie na mundu muhakui fetha mwenye wasile weri; mwe eawa niye denari maghana masano, wa keri makumi masano. 42Wekioka tewena cha kuiha, akawashigia wose weri. Haya, ni uhi enemkunda muno? 43Akatalua Siman, akaghamba, Nagheshijia, ula eshigiwe muno. Akamburra, Waghamba kididi. 44Ekimgharukia mche akamburra Siman, Wambona mche uu? Niingie nyumbeni hako, touniinga mbombe ya maghu; uu animiminia maghu masoji makwe na amahaija na nyui jakwe. 45Touninyonyoze we; uu too nikinaingie, teshiga kuninyonyoza muno maghuu. 46Twaniwira mafuta mtwi; uu aniwira maghu na marhamu. 47Hena lwa ii, nakuwurra, ashigiwa ng’oki jakwe nyingi, amu akunda muno: naye eshigiwe kadongo akunda kadongo. 48Akamburra, Washigiwa ng’oki jako. 49Wala weikee naye wakawoka kuteta ngoroni hawo, Niani uu ashighia ng’okiwa? 50Akamburra mche, Luitikijo lwako lwakukija; tonga na kiboha.
Currently Selected:
Luka 7: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.