Mihiro ya Waondo 20
20
1Kutera kwa kilozo kuhuja, Paulo akawaitanga waanalosha akawakezia, akafuma azoke kutonga Umakedoni. 2Ekivetia ghati ya masanga mala akawawonya muno, akafika Uyonani. 3Akaikaa uko mieji mitatu. Wayahudi wekinamyayie, ekikunda kutweka kutonga Shami, akagura mburi ya kuhunduka hena nzia ya Umakedoni. 4Wakaraterana naye mtano Asia Sopater Mberoya; Wathessalonika, Aristarko na Sekundo; na Gayo Mderbe, na Timoteo; Waasia, Tukiko na Trofimo. 5Awa wekirongora wakatuinda hena Troa. 6Tukatweka kufuma Filippi kutera kwa misi ya mabumunda mesifushwe, tukawazia ghati ya Troa hena misi misano; tukaikaa uko misi mifungate.
7Musi wa kuwoka wa juma, tukinawunganyike tubae mabumunda, Paulo akateta nawo, ekikunda kuzoka heyawo; akaongeja viteto mtano kio ghati. 8Taa nyingi jikaoka ghuuni tuwunganyikeho. 9Mbwange mwe eitangwa Eutuko akaikaa dirisheni, akagurwa ni luwohe lubaha; naye Paulo ekineta kuteta, ekilelwa ni luwohe lwakwe akagwa kufuma ghuu ya katatu, akawushijwa efwie. 10Paul akasea, akamguiya, akamshushudira, ekiteta, Musioke na wukiwa; moo wakwe uoho ndeni hakwe. 11Ekinakwee, akamabaa mabumunda, akachama, akateta nawo muno mtano marekero, huwo akafuma. 12Wakamwete mbwange mzima, wakadindijwa muno.
13Uswi tukarongora hena merikebu tuka tonga mtano Asso, tukikunda kumwuhia Paulo uko: amu ni huwo eaghanyie, ekikunda kutonga mwenye hena maghuu. 14Ekitorana na uswi ghati ya Asso, tukamwuhia, tukaza Mitulene. 15Tukitweka kufuma uko, tukaza musi wa keri afuhi na Kio. Musi ungi tukaingia ghati ya Samo, tukaikaa Trogullio; musi wa kuratera tukafika Mileto. 16Amu Paulo ewona ni kyedi kuvetia Efeso merikebuni, asiwone kutesha magheri ghati ya Asia: amu esara, kwakicha eidima, kuoka ghati ya Yerusalemi musi wa Pentekote.
17Ghati ya Mileto akatuma mtano Efeso, akawaitanga waghosi wa kanisa. 18Wekinaze hakwe akawawurra,
Mwatisiwa, too musi wa kuwoka nikinafike ghati ya Asia, nize niokie henyu magheri mose, 19nikimtumikia Mzuri hena kinyenya kyose, na masoji, na maghesho menigura hena ukeleki wa Wayahudi: 20Nisisue kumutindia kindu kyedi, nisimbonye, nisimuloshe msongorana wa wandu nyumba hena nyumba. 21Nikiwang’olia Wayahudi na Wayonani mburi ya kuchwamuti kuoho hena Izuwa, na luitikijo luoho hena Mzuri wetu Yesu Masihi. 22Na ingeriaha, yoeni, natonga Yerusalemi nikichungwa ngoroni, nisitisiwe vindu vinenizia hala: 23nde ti Ngoma Mshenete ening’olie mburi ghati ya viongo vyose, ekiteta ti machungo na mawukiwa maniinda. 24Kake siuwonami moo wangu kuoka kindu, niwone kukurija nzia yangu, na luindo niluuhie hena Mzuri Yesu, kung’ola mburi ya anjili ya mvono wa Izuwa. 25Na ingeriaha, yoeni, natisiwa ti unywi wose, ghati yenyu nijunguluke nikitinda ufumwa, tomuneniwina wushowa. 26Amu ii namung’olia mburi yoo, ti nazerra hena sakame ya wandu wose. 27Amu sisuiemi kumbonya mburi yose ya Izuwa. 28Kuyoeni, na ifio lose, ghati yakwe Ngoma Mshenete emuosha waaskofu, murishe kanisa la Izuwa, elizorie na sakame yakwe. 29Natisiwa kutera kwa kufuma kwangu mabau mawiwi meneingia ghati yenyu, wasilishighie ifio: 30na ghati yenyu wenye wenewuka wandu weteta vila visirongeke, wajute waanalosha nyuma yawo. 31Hena iyo cheweni, mukikumbuka ti hena miaka mitatu sishighami kumbonya wose hemusi na kio na masoji. 32Na ingeriaha namuwika ha Izuwa, na kiteto kya mvono wakwe, kyaidima kumujenga, na kumuinga uhodjo ghati yawo wose weshenetijwa. 33Silangwami nete fetha ya mundu, nete thahabu, nete suke. 34Mwatisiwa unywi ti mikono ii yaniindia hena vyose nivikundie mwenye, nawo weokie hamwe nami. 35Ghati ya vindu vyose nimuingie fwana, ti mukihira huwo yambe kuwaghenja wanana, na kukumbuka viteto vya Mzuri Yesu, nize etetie mwenye, Keba kung’ola kukela kuuhia.
36Ekinatete huwo, akadung’uta, akaomba nawo wose. 37Wose wakaiya muno, wakamguiya Paulo singoni, wakamnyonyoza, 38wekishiniwa kukela yose hena kiteto ekitetie, ti tewenembona wushowa deng’e. Wakamfunya mtano merikebu.
Currently Selected:
Mihiro ya Waondo 20: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
