Mihiro ya Waondo 15
15
1Wandu weseie kufuma Uyahudi wakalosha wasiri, Ti musitawanwe hena mikaiye ya Musa, tomuidima kukia. 2Kikinaoke kilinganya na kuwujanya kwingi kwa Paulo na Barnaba wanga yawo, wakala ngiliwata Paulo na Barnaba, na wengi nawo, watonge hena waondo na waghosi weoho Yerusalemi hena mburi ii. 3Nawo wekietwe nzieni na kanisa, wakavetia ghati ya Foiniki na Samaria, wekiwonya kugharuka kwa Mbare: wakaareha luizihirwo lubaha hena wasiri wose. 4Wekinafike Yerusalemi wakasongerijwa na kanisa na waondo na waghosi, wakaliya mburi ya vindu vyose Izuwa eviketie hawo. 5Wandu wa siri ya Wafarisayo weitikija wakawuka, wekiteta, Ti yawawe kutawanwa, na wawurrwe kuigura torati ya Musa.
6Waondo na waghosi wakawunganyika wagheshijia hena vindu ivi. 7Kukinaoke kuwujanya kwingi, Petro akaimuka akawawurra,
Wome wandwetu, mwatisiwa nize kae Izuwa atusawurie, ti Mbare hena itumbu langu wakisikie kiteto kya anjili, na waitikije. 8Naye Izuwa, etisiwe ngoro, akawang’olia mburi, ekiwainga Ngoma Mshenete, sa uswi: 9Asighawe ghati ya uswi nawo, ekizerrija ngoro jawo na luitikijo. 10Amu ii ingeriaha nikini mwaghesha Izuwa, kugera igogolo wanga ya singo ya waanalosha, uswi nete waapa wetu tusiidime kuitika? 11Kake twaitikija ti hena mvono wa Mzuri wetu Yesu Masihi tunekijwa, nawo pia.
12Niho matorano mose wakahuja, wakawasikija Barnaba na Paulo, wekitinda maluwano ani na marighio Izuwa emaketie ghati ya Mbare nawo. 13Wekinahuje, Yakobo akatalwa, ekiteta, Wome wandwetu, nisikieni.
14Simeon awonya nize kuwoka Izuwa ewatongia Mbare, ang’ole hawo wandu hena izina lakwe. 15Viteto vya waroti vyagurana na iki; sandu itamiwe,
16“Kutera kwa iki ninehunduka,
Ninejengawa hema la Daudi, liguie;
Nami ninejengawa mashighajiko makwe,
Na nineliimusha:
17Nesa wandu weshighajike wamwende Mzuri,
Na mbare jose, weitangiwe izina langu, eteta Mzuri, eketie vindu ivi vyose.
18Ndima jakwe jose jatisiwika ni Izuwa too kuwoka kwa masanga.”
19Hena iyo nachila tusiwarishe wasi wala wemgharukia Izuwa ghati ya Mbare; 20Kake tuwatamie, wakutane na maikwe ma sanamu, na kushinda, na vila vyanyamwa, na sakame. 21Amu kae Musa ena ghati ya viongo vyose wala wemtinda, ekisomwa ghati ya masunagogi sabato yose.
22Ikawaiseja waondo, na waghosi, na kanisa lose, waingije wandu wesawurwa hawo mtano Antiokia hamwe na Paulo na Barnaba, Yuda eitangwa Barsaba, na Sila, wandu wabaha ghati ya wasiri. 23Wakatama hena mikono yawo huwo, Wome na waghosi na wasiri wawakezia wasiri wa Mbare weoho ghati ya Antiokia, na Shami, na Kilikia. 24Amu Twasikia ti wandu wefumie hetu wamugera wasi na viteto, wekinyamara ngoro jenyu, wekiteta mutawanwe na mugure torati: 25tusiwaaghanye: Twawona kyedi, tukiwunganyika na ngoro mwe, kumuingijia wandu wesawurwa hamwe na wakundwa wetu Barnaba na Paulo, 26wandu weng’olie kukia kwawo hena izina la Mzuri wetu Yesu Masihi. 27Twaingija Yuda na Sila, wenemuinga wenye mburi iji. 28Amu yamwiseja Ngoma Mshenete, na uswi, tusinete kumugera mwagho wanga ya vindu ivi risina huwo, 29Mukutane na vila vyang’olwa hena sanamu, na sakame, na vindu vyanyamwa, na kushinda. Mukikuswija ghati ya ivi muneketa nezo. Kiboheni.
30Wekinasamwe wakaza Antiokia: Wekinawawunganye matorano, wakawainga barua. 31Wakaisoma, wakaizihirwa hena ludindijo. 32Nawo Yuda na Sila, wekioka waroti pia, wakawawonya wasiri hena viteto viingi, wakawagera ngoro. 33Kutera kwa kuikaa uko kadongo, wakashighwa ni wasiri na luworo kutonga ha waondo. 34Sila akakunda kuikaa uko. 35Paulo na Barnaba wakaikaa Antiokia, wekilosha na wekitinda kiteto kya Mzuri, na wengi weingi pia.
36Kutera kwa misi, Paulo akamburra Barnaba, Tujungulukewa tuwawone wasiri ghati ya viongo vyose, tutindieho kiteto kya Mzuri, weikeeze. 37Barnaba akakunda kutika Yohana eitangwa Marko. 38Paulo tekundieye kumtika nawo, ewashighie ghati ya Pamfulia, asitonge nawo ghati ya ndima. 39Viteto vikaoka vikaehe ghati yawo, mtano wakatana: Barnaba akamtika Marko akazoka kutonga Kupro; 40Paulo akamsawura Sila, akafuma, eking’olwa hena mvono wa Mzuri na wasiri. 41Akavetia ghati ya Shami na Kilikia, ekiwagera makanisa ngoro.
Currently Selected:
Mihiro ya Waondo 15: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
