1 Hena Wakorintho 12
12
1Na hena mburi ya viingijo vya ngoma, wandwetu, sikundiemi musowe kutisiwa. 2Mwatisiwa ti mukinaoke Mambare mutikwe hae hena sanamu jila jisitete, sandu mwarongojwa. 3Hena lwa iyo namuinga mutwarije, ti tehenaho mundu ekiteta ghati ya Ngoma ya Izuwa eghamba Yesu ni anathema: nete tehenaho mundu eidima kughamba, Yesu ni Mzuri, nde ghati ya Ngoma Mshenete.
4Hena kulelana kwa viingijo, kake Ngoma ni mwe. 5Na hena kulelana kwa mahirio, na Mzuri mwe. 6Na hena kulelana kwa mihiro, nde Izuwa mwe, evihira vyose ghati ya wose. 7Kake mundu ose eingiwe luwonjo lwa Ngoma hena mbucha. 8Amu mwe eingiwe hena Ngoma kiteto kya kucha: ungi kiteto kya lutwarijo, hena Ngoma ilaila: 9ungi luitikijo, ghati ya Ngoma ilaila; ungi viingijo vya kuhoja, ghati ya Ngoma ili mwe; 10ungi mihiro ya zinya; ungi kurota; ungi kutwarija ngoma; ungi mbare jingijingi ja malumi; na ungi kugharusha malumi: 11Kake ndima iji jose ejihira Ngoma mwe ilaila, ikimgawia mundu ose mwemwe sandu ikundie.
12Amu sa muri ni mwe, na una marungo meingi, na marungo mose ma muri, mekioka meingi, ni muri mwe; ni huwo na Kristo pia. 13Amu ghati ya Ngoma mwe tubatizwe wose ghati ya muri mwe, kwakicha Wayahudi kana Wayonani, kwakicha wazoro kana esiwazoro; tukanyoshwa wose Ngoma mwe. 14Amu muri si irungo imwe, nde meingi. 15Kughu kukighamba, Amu simi mkono, simi wa muri; hena lwa iyo tokuoka si wa muri. 16Na isikio likighamba, Amu simi ijiso, simi wa muri; hena lwa iyo telioka si la muri. 17Kwakicha muri ose uokie ijiso, nihi kuneoka kusikia? kwakicha ose uokie kusikia, nihi kuneoka kunyusha? 18Kake ingeriaha Izuwa emawika marungo imweimwe murini, sandu imwiseja. 19Na kwakicha meokie mose irungo imwe, nihi uneoka muri? 20Kake ingeriaha nimo marungo meingi, nde muri mwe. 21Na ijiso teliidima kuuwurra mkono, Sikuwaiya we; netewa mtwi kukuwurra kughu, Sikuwaiya we. 22Hai, muno kukela, marungo mala ma muri mewonwa kuoka manana, nimo mewaika: 23Na mala marungo ma muri, twamagheshijia kuoka ma nganyi ndongo, wanga ya ama twaneta kuwika nganyi ikelie; na marungo metu mesina uwedi, meneta muno kuoka na uwedi; 24kake marungo metu ma uwedi temewaiyamo; kake Izuwa eulunganya muri hamwe, ekiwika nganyi ikelie hena irungo lila laduhuka; 25nesa lisioke tanyo ghati ya muri; nde marungo marindane hena kuringanana. 26Na kwakicha irungo limwe lawawiwa, marungo mose mewawiwa hamwe nalo; kana irungo imwe likirumishwa, marungo mose meizihirwa hamwe nalo. 27Na unywi ni muri wakwe Kristo, na mwemwe marungo makwe. 28Na Izuwa ewika wandu kaniseni, wa kuwoka, waondo, wa keri waroti, wa katatu walosha, nawa zinya, nawa viingijo vya kuhoja, majengo, mabohio, mbare jingijingi ja malumi. 29Wose waondo? wose waroti? wose walosha? 30wose wahiri ndima? wose wena viingijo vya kuhoja? wose weteta na malumi? 31wose wegharusha viteto? Kake kundeni muno viingijo evyo vibaha. Na nambonja nzia eyo yedi hena kukela.
Currently Selected:
1 Hena Wakorintho 12: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
