Luka 6:27-49

“Lino ndikuvalongela unyeenye ye mukuumulikidza, muveendage avanya wukava veenyo. Avakuvasuula navo, muvalimilage inofu. Kangi avakuvalekela ululeko, muvalapangilage ulufuunyo kwa Nguluvi. Avakuvalimila isidziivagila navo, muvalapangilage kwa Nguluvi. Ngana umuunu akukudzagula uludzeedze lumwinga, umupituhidzage nalu lungi. Kangi ngana umuunu akukunyaga ilikoote lyako, umulekage anyamule ni gwanda. Umuunu ye avedzaga ye akukunyilika kikivedzaga, umupeelage. Kangi umuunu ye iinyamula ifiinu fyako, utane ukutigila akupiluhidze. Muvalimilage avangi ngita na yuunye kye mwisaka ukulimilwa. “Ngana mukuveenda avo avakuveenda unyeenye, mwivedza nu luwumbulilo luki pe naanyi apa? Nambe vanya ndzanangifu, vakuveenda avo ve vakuveenda! Kangi ngana mukuvalimila inofu avo avakuvalimila unyeenye inofu, mwivedza nu luwumbulilo luki pe naanyi apa? Nambe vanya ndzanangifu viilima ndeeni! Pe mukuvaadzimya avo ve mwihuuvila ukutigila vakuvagomohedza, mwivedza nu luwumbulilo luki pe naanyi apa? Nambe navo avanya ndzanangifu vakuvaadzimya avayaawo, pakuva viihuuvila ukutigila, avayaawo navo vakuvagomohedza fyonda! “Lino unyeenye, muveendage avanya wukava veenyo nu kuvalimila inofu. Kangi muvaadzimyage, kitahuuvila ukugomohedzwa. Ngana mulime ewo, uNguluvi alavapeela uluwumbulilo lukomi. Kangi mulaavedza vaana va Nguluvi uMukomi, pakuva umwene musandzi nambe ku avo avasiihongedza na vahosi. Lino muvedzage vanya lusungu ku vaanu vonda, ndawuli uDadiinyo kye ali nu lusungu. “Mutanage ukuvahiga avangi, apo na yuunye musilaahigwa. Mutanage ukutigila umuunu ali ni nongwa, apo na yuunye musilaalongwa ukutigila muli ni nongwa. Muvapyanilage avayeenyo, apo na yuunye mulaapyanilwa. Muvedzage vasandzi, apo na yuunye mulaasangilwa mu kigelelo kya kusindilwa, kangi íkimemile nu kuselema. Ikigelelo kye mwigelela ku vangi, kiikyo na yuunye kye alavagelela uNguluvi.” UYesu iilongaga mu fihwananidzo iitigilaga, “Ongo, umubofu akumulongodza umubofu muyagwe? Ngana lulimike ewo, vonda vasigwila mu lilindi? Umuwulanidzwa asikumulutila umuwulanidzi vaakwe. Kangi ye ámalile ukuwulanidzwa dzonda, apo iilingʼaana nu muwulanidzi vaakwe. “Kye kiki wiilola akabandzi akagenda mu liiho lya muyago, neke kangi usikuliwona ilyangiko iligenda mu liiho lyako? Kangi kye kiki ukumulongela umuyago ukutigila, ‘Ve munyalukolo vangu! Leke ndikahedze akabandzi akagenda mu liiho lyako,’ neke kangi uveeve usikuliwona ilyangiko iligenda mu liiho lyako? Uveeve uli mukedusi! Uhedze tandi ilyangiko iligenda mu liiho lyako. Apo pe peene pe wiilola wunofu nu kuhedza akabandzi akagenda mu liiho lya muyago. “Umubiki umunofu gwiveleka ifiveleko ifinofu, kangi umubiki umuviifu gwiveleka ifiveleko ifiviifu. Avaanu vakugukagula umubiki mu fiveleko fyakwe, pakuva avaanu vasiikova ifiveleko ifya mudzombe, enewuli fya sabibu, mu fitundu fya miifwa. Luli ewo, nayu muunu umunofu iilonga inofu, idziihuma mu numbula yaakwe inofu. Nayu muunu umuhosi iilonga idza wuhosi, idziihuma mu numbula yaakwe iya wuhosi. Dze iilonga umuunu, dze dzeene ídzimemile mu numbula yaakwe. “Kye kiki mukuungʼemeela, ‘Mutwa, Mutwa,’ neke kangi musiilima dze ndikuvalongela? Umuunu ye avedzaga ye iikwadza ukwangu, nu kupulika amadzwi gangu nu kugagendela, iihwanana ni kihwananidzo iki. Iivedza ngita muunu ye aadzengile inyumba. Aatalile ukugima uluutu ukwika paanyi hiilo ukufikila pa lutalaawe, neke adzenge uwaalo wa nyumba yaakwe pa lutalaawe ulo. “Pe yaaviye yítoonyile indoonya yoloofu, kwihumilaga uwulava. Uwulava uwo wiihelelaga ni ngufu ku nyumba, neke kangi inyumba iyo yitanage ukudeguulika nambe padebe, pakuva uwaalo waakwe waali wukangafu. Umuunu ye iipulika amadzwi gangu, neke kangi atanage ukugagendela, uyo iihwananidzwa nu muunu ye aadzengile inyumba yaakwe pa luhanga kitaviika uwaalo. Kangi ululenga mu mukoga pe lwaviye lúlemwike nu kuhelela kwa ngufu ku nyumba iyo, baaho na baaho yiideguulikaga yiiguwaga yonda.”