1 Timoti 4
4
Avawulanidzi va wudesi
1Lino uMubepo uMwimike iilonga kitafiha ukutigila, ifigono ifya wusililo avangi valaabihilaga ukuniniila ulufuuwo lwa ndakyene. Kangi valaaniniilaga imibepo gya wudzandzi, ni mbulanidzo dza Setano. 2Avaanu aviiwulanidza idzo vakedusi, kangi vadesi, nu lwikagulo lwawo lúfuwe ngita lúnyaanyiilwe ni kyuma kya mooto. 3Avaanu avo vakuvakaanidza avangi ukutoola enewuli ukutawuka, nambe kuliya ifyakuliya wuli. Neke kangi uNguluvi aagavile ifyakuliya ifyo, ukuta avafuuwa vafyanukilage mu luhongedzo, pakuva váyidzeeliye indakyene. 4Ifigawa fyonda fya Nguluvi finofu, ikiinu kikivedzaga kitane ukukaanwa, kyanukilwage ni numbula ya luhongedzo, 5pakuva ikyo kívaliidzwe wugendela wa lidzwi ilya Nguluvi ni ndapangilo.
Umutovela-ligendwa umunofu
6Ngana uvalongele avafuuwa imbulanidzo idzo, apo wiivedza uli mutovela-ligendwa munofu va Kilisiti Yesu, ye úleliilwe wunofu mu ndakyene iya lufuuwo lwesu ni mbulanidzo inofu dze wiininiila uveeve. 7Ukaanidzage mbandu isimo dza kataali idzaahela, wiidzooveledzage mbeepali ukumuginiya uNguluvi. 8Ukugudzooveledza umuvili kuli luwumbulilo padebe. Neke kangi ukwidzooveledza ukumuginiya uNguluvi, kuli luwumbulilo ukulutila ifiinu fyonda, pakuva kukutupeela uluhuuvidzo lwa wuumi wa lino nu wiikwadza. 9Ilidzwi ilyo ilya ndakyene, kangi liivagila liidikilwage ngʼaani. 10Mu ilyo twigimba ukulima amalimo, pakuva tukumuhuuvila uNguluvi ye ali muumi, uMupoki va vaanu vonda, hiilo avakumufuuwa.
11Uvawulanidzage avafuuwa amadzwi ago nu kuvalagidza vaganiniilage. 12Utanage ukwidikila umuunu ye avedzaga akubede, pakuva uveeve uli muvinano. Nda haamu, wiitangage ukuvedza kyoledzi ku vafuuwa mu ndongele, imigendele, uwende, ulufuuwo ni miikalile imiimike. 13Ugimbage ukuviimbila avafuuwa uWusimbe uWiimike, ukudalika nu kuwulanidza ukufikila pe ndilaadza. 14Utane ukubedalila ukulimila ikipeelwa ikili mugati umwako, kye waapeeliilwe kugendela mu lidzwi ilya wuvidzi, nu kuviikilwa amawoko ga vavaha va lukombeso. 15Ugimbage ukudzilima idzo ni ngufu dzaako dzonda, ukuta mu wuumi waako avaanu vonda vagawonage amalimo ge wiigina ukulima. 16Wiigelage mu migendele ni mbulanidzo dzaako, pakuva pe wiilima idzo, wiipoka uwuumi waako pamwinga navo avakukupulikidza.
Currently Selected:
1 Timoti 4: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.