1 Timoti 3
3
Indagiilidzo ku vimiilidzi va lukombeso
1Ilidzwi ili lya ndakyene ukutigila, “Umuunu ye iinungʼuvalila ukuvedza mwimiilidzi va lukombeso,#3:1 Lukombeso Lole Ulukombeso ku Figanulo. uyo iidoboka amalimo amanofu.” 2Lino umwimiilidzi iisakulwa avedzage mungaya lugomehedzo, mugoosi va mudala yumwinga,#3:2 Mugoosi va mudala yumwinga Kwe kutigila, atanage ukuvedza mudumuli-noolane. munya kwiwopa, munya luhalawukagudzi, munya kuginikwa, musandzi, ye áwudzeeliye ukuwulanidza ilidzwi lya Nguluvi. 3Uyo atanage ukwilekeeledza mu wugaadzi nambe kuvedza mutalamu, avedzage muleele, mungaya mabaatu, kangi si mudobofu va magoobeli. 4Avedzage muunu umunya kwimiilila wunofu inyumba yaakwe, avaana vaakwe vamwidikage nu kumupeela uluginiyo londa. 5Pakuva, ngana umuunu asiwudzeeliye ukwimiilila inyumba yaakwe yumwene, ahadza iikwimiilila wuli ulukombeso lwa Nguluvi? 6Atanage ukuvedza muunu ye akaapitwike si musika, pakuva iisunga iiginiye nu kugwila mu luhigo, ngita kye aahigiilwe uSetano. 7Kangi iisakulwa avedzage muunu ye iikoolelwa inofu na vaanu avasili vafuuwa, ukuta alaaleka agomehedzwe nu kugwila mu lutego lwa Setano.
Indagiilidzo ku vatangilidzi va lukombeso
8Ndeeni, avatangilidzi vavedzage vanya kuginikwa, vangaya wukedusi, avasikwilekeeledza mu wugaadzi, vatanage ukuvedza vadobofu va magoobeli. 9Kangi vavedzage vaanu aviikwinatila wunofu indakyene ya lufuuwo nu lwikagulo lunofu. 10Ava navo vagelwage tandi, ngana vangaya lugomehedzo, apo viidikwage ukulima amalimo ngita vatangilidzi. 11Ndeeni, avadala vaawo#3:11 Avadala vaawo Ikiganulo ikingi kiitigila avatangilidzi avamwayuuva. vavedzage vanya kuginikwa, si vaheesi, vavedzage vanya kwiwopa, kangi aviihuuvilwa mu ngʼaani dzonda. 12Umutangilidzi avedzage mugoosi va mudala yumwinga, umuunu ye iikwimiilila wunofu avaana vaakwe na va mu kaaya yaakwe. 13Avo aviilima wunofu amalimo ga wutangilidzi, vahadza viiginikwa hiilo. Kangi viivedza nu wukangafu uwa kutagalidza imola ya lufuuwo mwa Kilisiti Yesu.
Indakyene ya lufuuwo lwesu
14Ndiihuuvila ukwadza ukwako musika mudebe ugwikwadza. Neke kangi ndikukusimbila amadzwi aga, 15pakuva ngana ndífuvaliye, ugidzeelage imigendele ígivagiye ku vaanu va Nguluvi. Avo ve veene ulukombeso lwa Nguluvi ye ali muumi, simbili, kangi waalo wa ndakyene. 16Sikooluli ulwiganiiso luluvedzaga, ukutigila imola dze átuvilatuliye uNguluvi, ndakyene dza kudzumwa, ukutigila,
UKilisiti iivilatuwe mu lwa muvili,
iikoolelwaga nu Mubepo uMwimike ukutigila, mugolofu,
iiwonekaga ku vanyamwandza,
imola dzaakwe dziidalikwaga mu nyi dzonda,
avaanu va lidugulu vakumufuuwaga,
iinyamulwaga ukuhelela kukyanya mu ndolo.
Currently Selected:
1 Timoti 3: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
