1 Vakolindo 8
8
Ifyakuliya ífiteekeliilwe ku fihwananguluvi
1Lino ndiilonga wiimila wa fyakuliya ífiteekeliilwe ku fihwananguluvi.#8:1 Fyakuliya ífiteekeliilwe ku fihwananguluvi Ku wudzenge wa Kolindo kwali ni tembeli ndzoloofu wiimila wa lwifuunyo ku fihwananguluvi. AVakolindo vaateekelaga inyama ku fihwananguluvi ifyo, kangi iyaasigalilaga vaasindikaga ukugudza ku magulilo. Avafuuwa wuli vaawonaga inyama iyo lupumba, vaakaanaga nambe kuliya, neke kangi avangi vaaliyaga. Ndiidzeela mwilonga ukutigila, “Uneefwe twivonda tuli nu wuwuya.” Neke kangi uwuwuya wukuvahambusa avaanu ukuvedza nu lwinunumulo. Nda haamu, uwende we weene uwiikangadza avaanu mu lufuuwo. 2Umuunu ye iihoodza ukutigila, ákidzeeliye kiinu, uyo ye mwene ye asikidzeeliye ikyo ngita kye iisakulwa ukukidzeela. 3Neke kangi umuunu ye akumwenda uNguluvi, uyo ye mwene ye iidzeeleka nu Nguluvi mwene.
4Lino, wiimila wa kuliya ifyakuliya ífiteekeliilwe ku fihwananguluvi, twidzeela ukutigila, ikihwananguluvi si kiinu mwe naanyi. Kangi twidzeela ukutigila, kwali uNguluvi yumwinga swe. 5Nde fivedze poofili ifiinu ifiikemeelwa minguluvi, nde kuvedze kukyanya enewuli pe naanyi, nde givedze poogili iminguluvi gyoloofu na vatwa voloofu, 6neke kangi ukwesu, pwali uNguluvi yumwinga swe, ye mwene uDaada. Wugendela mwa mwene ifiinu fyonda fyagaviilwe, kangi tukwikala wiimila waakwe. Kangi ukwesu pwali uMutwa yumwinga swe, ye Yesu Kilisiti. Wugendela mwa mwene, uNguluvi aagavile ifiinu fyonda, kangi wugendela mwa mwene na yuufwe tuli vuumi.
7Neke kangi uwuwuya uwo vasili nawo avaanu vonda. Poovali avangi avaali ni mivedzehedze gya kuteekela ifyakuliya ku fihwananguluvi. Lino pe viiliya ifyakuliya ifyo mu tembeli, vaave viikwiwuka ifiteekelelo ifyo. Kangi viiwona mu lwikagulo lwawo ifyakuliya ifyo lupumba nu kufiliya kwe kulima indzanangifu, pakuva vasinaa vakangala mu lufuuwo. 8Neke kangi ikyakuliya kisikutuhegeledza biihi nu Nguluvi, nde tubihile ukuliya tusiikeepa kiinu, enewuli nde tuliye tusiikoongelehedzwa kiinu.
9Napo kangi, mwiyangalilage wunofu, ukuta uwuvangwa weenyo wutanage ukuvedza kikuvadzi ku avo avasikangiye mu lufuuwo. 10Apangi uveeve, wiimila wa wuwuya waako, uli nu wuvangwa uwa kuliya ifyakuliya mu tembeli ya kwifuunyila ku fihwananguluvi. Neke kangi umuyago ye asikangiye mu lufuuwo, ngana akukuwona, ongo, asiihoodza ukutigila, nave aliye ifyakuliya ifyo ífiteekeliilwe ku fihwananguluvi? 11Mu ulo, wiitipula ulufuuwo lwa muyago ulusikangiye wugendela wa wuwuya waako, umuyago uyo nave, uKilisiti aafuwe wiimila waakwe.
12Pe mukuvaangula ewo, avafuuwa vayeenyo avasikangiye mu lufuuwo nu kuvalemadza ulwikagulo lwawo, apo mukumwangula uKilisiti yumwene. 13Wiimila wa ulo, ngana ikyakuliya kye ndiiliya kikumuhulila umufuuwa muyangu ukulima indzanangifu, apo sindiiliyaga inyama nambi, ukuta nditane ukumuhulila alime indzanangifu.
Currently Selected:
1 Vakolindo 8: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
