1 Vakolindo 7
7
Indagiilidzo dza noolane
1Amadzwi ge mwaasimbiye, lino ndiipilusa ndiitigila, “Lunofu umugoosi iikalage kitatoola.”#7:1 Umugoosi iikalage kitatoola Ikikelo pa kikelo, umugoosi aleke ukugona nu mudala. 2Neke kangi wiimila wa wugoni woloofu umwenyo, umugoosi ye avedzaga, ye átoolile avedzage nu mudala vaakwe mwene, kangi mudala ye avedzaga, ye átawiike avedzage nu mugoosi vaakwe mwene. 3Umugoosi amulimilage umudala vaakwe ingʼaani dza noolane ngita kye lwivagila, ndeeni nayu mudala amulimilage umugoosi vaakwe ingʼaani dza noolane ngita kye lwivagila. 4Umudala angaya wutawulilwe ulwa muvili gwakwe mwene hela, nda haamu, nayu mugoosi vaakwe. Ndeeni, umugoosi nave angaya wutawulilwe ulwa muvili gwakwe mwene hela, nda haamu, nayu mudala vaakwe. 5Mutanage ukwiyima nde ngana mwídiingʼiine ukulima ewo, mu musika mukeefu hela, ukuta mulapangile kwa Nguluvi. Neke pambele, mupiluungʼane kangi, ukuta uSetano alaaleka avagemye pakuva múlemiilwe ukwiwopa.
6Neke kangi ndiilonga amadzwi ago ulwa kuviidihidza, si wiimila wa kuvalagidza. 7Ndikiikeelaga avaanu vonda vavedzage ngita uneene kye ndigenda,#7:7 Vavedzage ngita uneene kye ndigenda Apa uPawulo akwilonga yumwene pakuva asaatoolile, ikyo kyali kye kipeelwa kyakwe. neke kangi siluli ewo, pakuva uNguluvi ámugaviye nayula ikipeelwa kyakwe, yumwinga ikipeelwa iki, uyungi kila.
8Lino ndikuvalongela avaanu avangaya vagoosi enewuli vadala, pamwinga na avafwile na vagoosi enewuli vadala ukutigila, lunofu vasigalage ndeeni kitatoola enewuli kitatawuka ngita kye ndigenda uneene. 9Neke kangi, ngana viilemwa ukwiwopa, apo lunofu vatoolage enewuli kutawuka, pakuva kiba ukulima ewo, sindawuli ukupyupa nu wudobofu wa muvili.
10Lino ndikuvapeela uwulagidze avo ávatoolile. Uwulagidze uwo si wangu, nda haamu, wúhumile kwa Mutwa Yesu#Matayo 5:32; 19:3-9; Maluko 10:11-12; Luka 16:18 ukutigila, umudala atanage ukumugotola umugoosi#7:10 Umudala atanage ukumugotola umugoosi Mu mivedzehedze gya Vagiliki, umudala nu mugoosi viidikwaga ukulekana, kwe kutigila ukumugotola. Neke kangi mu mivedzehedze gya Vayahudi, imilagililwe gya Mose gyaviidikaga avagoosi veene ukulima ewo. vaakwe. 11Neke kangi wone amugotole, apo atanage ukutawuka kwa mugoosi yungi, enewuli iiteepule nu mugoosi vaakwe, ukuta vapiluungʼane. Umugoosi nave atanage ukumupeela umudala vaakwe ihaate ya kumugotola.
12Lino ndiilonga na vafuuwa avangi. Idzo dze ndiilonga ge mahoodzo gangu, si wulagidze wa Mutwa Yesu. Ndiitigila, ngana umugoosi umufuuwa átoolile umudala ye asili mufuuwa, nu mudala uyo íidikiye ukwikala nave, apo atanage ukumuleka. 13Umwayuuva umufuuwa nave, ngana átawiike kwa mugoosi ye asili mufuuwa, nu mugoosi uyo íidikiye ukwikala nave, apo atanage ukumugotola. 14Ndiilonga idzo, pakuva uNguluvi akumuvaladza umugoosi ye asili mufuuwa,#7:14 UNguluvi akumuvaladza umugoosi ye asili mufuuwa Pa kukamiingʼaswa nu mugoosi, enewuli umudala mu noolane, uNguluvi akumwanukila umuunu ye asili mufuuwa ukuvedza yumwinga va vaanu vaakwe. Si kutigila, uyo ápokiilwe. wugendela wa mudala vaakwe umufuuwa. Ndeeni, umudala nave ye asili mufuuwa, iivaladzwa nu Nguluvi wugendela wa mugoosi vaakwe. Ngana lukali lutane ukuvedza ewo, avaana veenyo ngali vapiivala, neke kangi lino uNguluvi akuvaanukila.
15Neke kangi, ngana uyo ye asiifuuwa iisaka ukulekana nu muyagwe umufuuwa, mumuleke alime ewo. Apo umufuuwa umugoosi uyo, enewuli umudala iivedza si mwavike va noolane iyo, pakuva uNguluvi ávakemeeliye ukuta mwikalage mu lutengamaso. 16Uveeve mudala mufuuwa, wiilemwa ukudzeela ngana umugoosi vaako ye asili mufuuwa ahadza iipokwa wiimila wa lufuuwo lwako! Ndeeni, uveeve mugoosi mufuuwa, wiilemwa ukudzeela ngana umudala vaako ye asili mufuuwa, ahadza iipokwa wiimila wa lufuuwo lwako.
Ukusigala mu miikalile giigyo
17Napo kangi nayula asigalage mu miikalile giigyo ukuhuma umusika uNguluvi pe amukemeeliye ukumufuuwa, kangi ngita uMutwa Yesu kye amuviikile. Uwo we wulagidze wangu mu ngʼombeso dzonda. 18Umuunu ye aakemeeliilwe nu Nguluvi kuno ásingiilwe,#7:18 Ásingiilwe Lole Uwusinge ku Figanulo. uyo asigalage ásingiilwe. Ngana asinaa asingwa, uyo asigalage asinaa asingwa. 19Uwusinge si kiinu, nambe wukitasingwa si kiinu, nda haamu, ulwisakulwa ku kwinatila indagi dza Nguluvi.
20Nayula asigalage mu miikalile giigyo umusika uNguluvi pe amukemeeliye. 21Ngana umusika ugo uNguluvi akukemeeliye uli musutu, ulo lutanage ukukufwahidza. Neke kangi, ngana kuli ngʼaasi ya kukuviika mu wuvangwa, kiba ulime ewo. 22Pakuva umuunu ye aali musutu umusika pe aakemeelwaga ukumufuuwa uMutwa Yesu, uyo mwawule mwa Mutwa Yesu. Ndeeni na ye aali mwawule umusika pe iikemeelwa, uyo ali musutu va Kilisiti. 23Mwakombwidzwe nu luhombo lukomi, lwe lwene ndiilonga ukutigila, mutanage ukuvedza vasutu va vaanu. 24Vafuuwa vayangu, nayula asigalage mu miikalile giigyo umusika uNguluvi pe amukemeeliye.
Ukusigala kitatoola enewuli kitatawuka
25Lino ndiilonga ku vahindza avasivadzeeliye avagoosi, na vagoosi avasivadzeeliye avahindza. Ku avo, ndingaya lulagi ukuhuma kwa Mutwa Yesu, neke kangi ndikuvalongela ulwa mahoodzo gangu yuune ye ndili muhuuvilwa, wiimila wa lupyana lwa Mutwa. 26Lino, pakuva ifigono ifi kuli nalamu, ndiiwona lukali lunofu umugoosi asigalage ngita kye agenda. 27Útoolile? Lino utane ukumugotola umudala vaako. Siutoolile? Lino utane ukutoola. 28Neke kangi, ngana utoole, wiivedza usilimile ndzanangifu. Nayu muhindza, ngana atawuke, iivedza asilimile ndzanangifu. Neke kangi avo ávatooliine viivedza ni nalamu mu miikalile igi. Kangi uneene ndiisaka ukuvawunga, ukuta dzitane ukuvafika idzo.
29Vafuuwa vayangu, ndiilonga ukutigila, umusika úgusigiye mukeefu ukumutovela iligendwa uMutwa. Ukuvangila lino, avo ávatoolile valekage ukuhoodzehedza hela ulwa vadala vaawo. 30Avaanu aviivemba, vavedzage ngita vasiivemba. Avali nu lukeelo, vavedzage ngita avasili nu lukeelo. Aviigula ifiinu, vatanage ukwibatwa ni fiinu ifyo ngita fyawo. 31Kangi avaanu avakwituunidza ulwa ngʼaani dza mwe naanyi, valekage ukuhoodza hiilo mu idzo. Pakuva inyi iyi, ngita kye tukuyiwona, yiihelanidza.
32Lino ndiisaka mutanage ukwituunidza. Umugoosi ye asitoolile, akwituunidza na malimo ga Mutwa na kye ahadza akumukeeledza uMutwa. 33Neke kangi umugoosi ye átoolile, akwituunidza ulwa ngʼaani dza mwe naanyi, na kye ahadza akumukeeledza umudala vaakwe, 34apo amahoodzo gaakwe giivedza mbali dzivili. Umwayuuva ye asitawiike, enewuli umuhindza ye asimudzeeliye umugoosi, akwituunidza ukulima amalimo ga Mutwa, ukuta iidumulilage kwa Mutwa umuvili nu mubepo. Neke kangi umwayuuva ye átawiike, akwituunidza ukulima idza mwe naanyi umu, ngita kye ahadza akumukeeledza umugoosi vaakwe. 35Sindiilonga amadzwi ago wiimila wa kuvadindanidza, nda haamu, wiimila wa kuvatanga, ukuta mwikalage pa kumutovela iligendwa uMutwa ni numbula yonda, ngita kye lwikwidikwa.
36Umugoosi ye iiwona ukutigila, asiilima wunofu ukuleka ukumutoola umuhindza ye ámubaanyile, kangi nagi myaka gyakwe gya kutawuka gíhelaniidze, kangi ngana iiwona kiba vatoolane, alimage ngita kye iisaka vatoolane. Apo iivedza asilimile ndzanangifu. 37Neke kangi umugoosi ye álamuwe yumwene ukutigila, atane ukumutoola umuhindza ye ámubaanyile, ngana uyo asigagiiliidzwe, kangi asiilemwa ukulima ngita kye iisaka, uyo nave iivedza iilima wunofu. 38Lwe lwene, uyo ye iitoola umuhindza iilima wunofu. Nave ye asiitoola, iilima wunofu kulutila.#7:36-38 Mu ndimbili idzi ikiganulo ikingi kiitigila Udaada ye avedzaga ye iiwona ukutigila, asiilima wunofu ukuleka ukumutawudza umwalive ye ábaanyiilwe, kangi nambe myaka gyakwe gya kutawuka gíhelaniidze, alimage ngita kye iisaka. Avalekage vatoolane, iivedza asilimile ndzanangifu. Ngana udaada álamuwe yumwene ukutigila, asimutawudza umwalive, amulekage ngita kye agenda, iivedza álimile wunofu. Udaada ye akumutawudza umwalive ye ábaanyiilwe, iilima wunofu. Neke kangi ye asikumutawudza, iilima wunofu kulutila.
39Kangi umudala ye átawiike, asigalage mu noolane umusika gonda umugoosi vaakwe gwe ali muumi. Neke kangi, ngana umugoosi vaakwe áfuwe, apo iivedza mwawule ukutoolwa nu muunu ye avedzaga ye akumusaka, neke kangi umugoosi uyo avedzage mufuuwa va Mutwa. 40Neke kangi ali kitendileme umufwile uyo, ngana iisigala kitatawuka. Ago ge mahoodzo gangu, na yuune ndiihoodza ukutigila, uMubepo va Nguluvi akuundongodza ukulonga amadzwi ago.
Currently Selected:
1 Vakolindo 7: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
