Ezequiel 47
47
Ti vo' ta xtuc talel ta ch'ulnae
1Ts'acal to un, ti vinique laj yic'un sutel ta ochebal sti' ti ch'ulnae. Laj quil un ta xtuc talel vo' ta yolon ti'na.#Is 44.3; Jl 3.18; Zac 13.1; 14.8; Jn 7.38; Ap 22.1. Ta xanav batel ta yeloval sloq'ueb c'ac'al bu oy ti ch'ulnae. Ta bats'i c'ob yu'un ti ch'ulnae, ta xyal talel yoc vo' ta yeloval yolon ti yac'ol xocon sloq'ueb c'ac'al yu'un ti altare. 2Liloc' batel yu'un ta yosilal ti ch'ulnae. Laj jtam ech'el ta ti'na ti sq'ueloj batel ta yolon ti yolon xocon sloq'ueb c'ac'ale. Laj joy ech'el ta spat xocon ti lic'ot ta ochebal ti oy ta spat ti sq'ueloj batel ta yeloval sloq'ueb c'ac'ale. Jun xa uni uc'um ta xtuc talel ti vo'e. Ta xanav batel yoc ta yeloval yolon ti yac'ol xocon sloq'ueb c'ac'al yu'un ti ochebale. 3Ti vinique loc' batel ta yeloval ti sloq'ueb c'ac'ale, sjopoj ech'el jchop jich'il ch'ojon. Laj sbis ech'el vo'ob ciento (500) metro. C'ot ta sat cacan spimil ti vo' laj jtuch' jelavel yu'une. 4Laj sbis no'ox ech'el vo'ob ciento (500) metro. Xmuquij xa sjol cacan laj jtuch' jelavel yu'un ti vo'e. Laj sbis no'ox ech'el vo'ob ciento (500) metro. Xc'ot xa ta jchucbenal spimil ti vo' laj jtuch' jelavel yu'une. 5Laj no'ox sbis batel xtoc vo'ob ciento (500) metro. Muc' ta uc'um xa un, mu'yuc xa xtuch' cu'un. Ta nux xa no'ox stac' tuch'el jelavel. 6Va'i un, xi lic yalbune: “Tuc'ulano lec ti c'u s'elan laj avile.”
Ts'acal to un, lisut talel yu'un ta sti'il uc'um. 7Laj quil yepal no'ox te'tic oy ta xcha'jotal sti'il ti uc'ume. 8Va'i un, xi laj yalbune: “Ti yoc uc'um stamoj batel ta stuq'uil sloq'ueb c'ac'ale, ta xc'ot stsob sba yoc xchi'uc ti Jordane. Ta xc'ot ta tsutsel yoc ti sbiinoj Sts'ijlajan Nabe. C'alal ta xc'ot teye, ta xlecub ti ya'lel nab ts'anale. 9Ti buyuc no'ox ta xc'ot yoc ti uc'ume, ta xlic cuxiuc ep ta tos xchanul, xchi'uc mu albajuc ep ta tos choyetic ta xlic ch'iuc. Yoc ti uc'um li'e, ta xlecub yu'un ti ch'achi' vo'e. C'usiuc no'ox chanulal ta xcuxi liquel un. 10Ta xlic ta En-gadi, ta xc'ot ta En-eglaim. Yan sba jmas-choyetic c'u sjamlej ti uc'ume, xchi'uc ta staquijesel smasobil xchoyic ti bu taje. Jaylajun-tos sts'unubal choyetic ta xlic ayanuc co'ol jech c'u cha'al ta muc' ta nab Mediterráneo sbie. 11Ja'uc ti ta ts'anal vo'e, ta lac-lac ach'ele, mi jutebuc lequil vo'. Ti bu taje, naca ch'achi' vo' ta xtun ta sventa ta xloc' ats'am. 12Ta jujujot sti'il uc'ume, ch'iemic ep ta tos lo'bolal te'etic. J'ech'el mu xcocaj ti yanale. Mu sna' xpaj ta satinel. Jujun u oy sat. Maltabil ta vo' yu'un yoc ti uc'um ta xloc' talel ta ch'ulnae. Ta xtun ta poxil ti yanale, ta tunel lajesel ti sate.#Ap 22.2.
Sts'aquil yosil ti muc' ta lume
13“Xi laj yal ti Dios ti scotol xu' yu'une: Ti ta xch'acbe sbaic yosilic ti lajcha'chop snitilul Israel ti muc' ta lum ti ta xc'ot ta xrextoique, ja' jech ti sts'aquique.#Nm 34.1-12. (Ep ta xich' ma' ti José une.) 14Laj jva'an jba ta yalbel ya'iic ti amolmuc'totic ta vo'nee, ta xcac'beic ti muc' ta lume. Co'ol xach'acbe abaic. C'otem ta arextoic ti muc' ta lum li'e.
15“Ti sts'aquil ta yeloval yolon ti yolon xocon sloq'ueb c'ac'ale, ta xlic ta muc' ta nab Mediterráneo. Ta x'ech' ta jteclum Hetlón, ta Zedad, 16ta Berotá, ta Sibraim, (ti sts'aquinoj sbaic xchi'uc sti'il yosil ti Damascoe, xchi'uc ti Hamate). Ta x'ech' ta jteclum Hasar-haticón (ti sts'aquinoj sba xchi'uc yosilal ti Haurane). 17Ti sts'aquil ta yeloval yolon ti yolon xocon sloq'ueb c'ac'ale, ta xlic ta muc' ta nab Mediterráneo. Ta xc'ot ta Hazar-enan, ti xcom ta yeloval yolon ti yolon xocon sloq'ueb c'ac'al yu'un sts'ac yosil ti Damascoe xchi'uc ti Hamate.
18“Ti sts'aquil ta sloq'ueb c'ac'ale, ta xlic ta o'lol yu'un ti Haurane xchi'uc ti Damascoe. Ta xc'ot ta jteclum Tamar ti oy ta sts'el Sts'ijlajan Nabe, sjunul c'u snatil yoc ti uc'um Jordane. Ta xc'ot ta sts'ac yu'un Galaad xchi'uc ti Israele.
19“Ti sts'aquil ta yolon ti yac'ol xocon sloq'ueb c'ac'ale, ta xlic ta Tamar, ta x'ech' ta ts'anal vo' yu'un ti Meriba-cadese. Ta stam ech'el ta biq'uit uc'um yu'un Egipto, ti ta xc'ot ta muc' ta nab Mediterráneoe.
20“Ti sts'aquil ta smaleb c'ac'ale, ja' ti ta muc' ta nab Mediterráneo ti ta xlic ta sts'ac yosil Egiptoe. Ta xc'ot ta q'uixin osil ti oy ta yeloval ochebal yu'un ti Hamate.
21“Ja' yosil ti muc' ta lum taje, ti tsots sc'oplal ta xach'acbe abaic ti lajcha'chopoxuc snitiluloxuc ti Israele. 22Ja' ta xc'ot ta arextoic xchi'uc ti jyanlumetic nacalic ta atojolic ti oy xa yalab xnich'nabique. C'otuc ta avo'ntonic ti voq'uem xa ta Israele. C'alal ta xach'acbe abaic osil jujuchop snitiluloxuc Israele, ac'beic xrextoic ec. 23Ti jyanlumetique ta xich' xrextoic ti bu c'alal amacojic ta nacleje. Vu'un ta xcal mantal ti Ajvalilune.
Currently Selected:
Ezequiel 47: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
